OARALAP | WEHIN KOHT—IA DUWEN OMW KAK PAIEKIHDA?

**Wehin Koht—Ia Duwen Omw Pahn Paiekihda?**

Ele ke wehwehkihier sang oaralap kan mwoweo me Wehin Koht kin kesempwal ong Sounkadehdehn Siohwa kan. Oh ele ke pil mwekidki me oaralap ko koasoiahda duwen ekei kapai kan me Wehin Koht pahn wahdo. Ni ahnsowohte, ele ke kin medemedewe ma inou pwukat uhdahn pahn pweida.

E wia elen loalokong en kanahieng oh dehr kamehlele soahng koaros me ke rong. (Lepin Padahk 14:15) Ele mwomwen omw kin kanahieng kak pahrekiong mehn Peria kan mahs.a Ahnsou me re tepin rong duwen rongamwahu en Wehio, mehn Peria ko pwungki dahme re rong, kaidehn ihte pwehki re men en mehlel. Ahpw, re kin kasawih kanahieng Paipel “pwe re en kadehde ma . . . mehlel de soh.” (Wiewia 17:11) Met wehwehki me mehn Peria ko kin kapahrekihpene rongamwahwo me re rong ong dahme Paipel mahsanih. Mwuri, irail eri kamehlele me rongamwahwo uhdahn poahsoankihda Mahsen en Koht.

Sounkadehdehn Siohwa kan men ken pil wia duwehte. Sang ni at kin wia prokram en onop en Paipel ni soh isepe, se men sewese iuk en kapahrekihpene dahme Sounkadehdehn Siohwa kan kin kamehlele duwen Wehin Koht ong dahme Paipel kin padahngki.

Patehngete omw sukuhlki duwen Wehin Koht, omw onopki Paipel kak sewese iuk en diarada ekei pasapengpen peidek kesempwal kan nan omw mour.

Ia wasa kitail tepisang ie?
Ia kahrepen mour?
Dahme kahrehda Koht ketin mweidohng lokolok en mie?
Dahme kin wiawi ni ahnsou me kitail mehla?
Sampah pahn sohrala?
Dahme pahn kahrehda mour en peneinei nsenamwahu?

Keieu kesempwal, omw onopki Paipel pahn sewese iuk en karanihala Koht. (Seims 4:8) Ni omw karanihala Koht, met pahn kalaudehla omw pahn kilang ia duwen Wehin Koht eh kak wiahda soahng mwahu kan ong uhk, kaidehn ongete ahnsou wet ahpw pil kohkohlahte. Sises patohwanohng Semeo ni kapakap: “Oh iet mour [“mour soutuk,” NW]: aramas akan en eseikomwihla, me komwihte Koht mehlel, oh pil esehla Sises Krais me komw ketin poaronedohr.”—Sohn 17:3.

Sounkadehdehn Siohwa kan kak doadoahngki pwuhk wet pwehn onop Paipel rehmw.

Ma ke men emen en onop Paipel rehmw, idek rehn Sounkadehdehn Siohwa kan de audehda doaropwehn peki onop en Paipel nan www.jw.org. (Menlau kilang PEKI ONOP EN PAIPEL nan home page)

a Peria iei kahnimw ehu nan Masedonia mahso.

Dahme Kahrehda Wehin Koht Kesempwal ong Ih

Me keren, serepein men me sounpar eisek me adaneki Folake anahne ntingihada doaropwe ieu ong sukuhl me oaralape koasoia “Dahme I Keieu Perenki nan Sampah.” Folake pilada en ntingihada dahme kahrehda e perenki padahkihong meteikan duwen Wehin Koht.

Folake nda: “Wehin Koht uhdahn koperment ehu, ahpw ke sohte kak kilang, mehnda ma ke pil doadoahngki kilahs!”

Folake pil ntingihdi duwen kapai kan me e kin keieu kasikasik me Wehi wet pahn wahdo. Ni eh koasoia duwen ekei kahpwal kan me Wehi wet pahn kamwahwihala, e ntingihdi, “I kin nsensuwed ahnsou me I kilang aramas akan me sohte imwarail mihmihseli pohn ahl akan” oh pil “seri kan me mehkihla duhpek nan soangsoangen sahpw kan nan sampah.” E pil nda, “I kin perenda ni ei wadek Aiseia 65:21.” Ong aramas akan me pahn mihmi pahn kaundahn Wehin Koht, ireo inoukihda: “Aramas akan pahn kauwada imwarail kan oh kousoanla loale . . . Re pahn wiahda ar mwetuwel en wain oh pahn kin nsenamwahuki wahn wain kan.”

Folake nda me e pil kin kasikasik ahnsou me Koht pahn ketin doadoahngki sapwellime Wehi pwe en ketikihsang soumwahu koaros. Nan nah ripohto, e doadoahngki Kaudiahl 21:4, me mahsanih me Koht “pahn kin ketin limwihasang pilen masarail koaros. Mehla solahr pahn wiawi, solahr mwahiei, solahr nsensuwed, solahr medek.” Ni kaimwiseklahn eh koasoi, e pwurehng nda me en koasoakoasoia duwen Siohwa oh sapwellime Wehi iei me e keieu perenki nan sampah. E sansal me serepein pwulopwul menet uhdahn kesempwalki Wehin Koht.