OARALAP | MIE KATEPEN KAPAKAP?
Mie me Wie Rongorong?
Ekei aramas pehm me kapakap kin kauwehla mwahl ahnsou pwe sohte me kin wie rongorong. Meteikan song en kapakap ahpw pehm me re sohte alehdi pasapengpen arail kapakap kan. Emen ohl me sohte kamehlele me mie Koht kawehwehda dahme e pein medewehki duwen Koht oh eri kapakap: “Mwengininginkihdohte mehkot.” Ahpw e nda me Koht sohte kin ketin mweseisei.
Ahpw, Paipel kamehlelehiong kitail me mie Koht men oh me e kin ketin karonge atail kapakap kan. Paipel kilelehdi mahsen pwukat ong pwihn en aramas ehu mahso: “KAUN-O me kupwurkalahngan, oh ni amwail pahn peki sapwellime sawas, e pahn ketin kupwurei kumwail.” (Aiseia 30:19) Pil ehu iren Paipel mahsanih: “KAUN-O kin ketin kupwurperenki en aramas mwahu kan ar kapakap.”—Lepin Padahk 15:8.
Sises patohwan kapakapohng Semeo oh “Koht ketin karonge sapwellime pekipeko.”—Ipru 5:7
Paipel pil kasalehda karasaras en irail kan me Koht ketin karonge arail kapakap. Ehu ire mahsanih me Sises ketin “loulou oh peki ni ngidingid . . . ong Koht me kak doarehsang pwoula” oh “Koht ketin karonge sapwellime pekipeko.” (Ipru 5:7) Karasaras teikan pil kak dierek nan Daniel 9:21 oh 2 Kronikel 7:1.
Eri, dahme kahrehda ekei aramas pehm me arail kapakap kan sohte pasapengla? Pwe atail kapakap kan en pasapengla, kitail anahne kapakap ong Koht en Paipelo kelehpw, me iei Siohwa,a kaidehn ong koht teikan de kisehtail kan me mehla. Koht pil kupwurki kitail en peki soahng kan “nin duwen kupwure.” Koht ketin kamehlelehiong kitail me ma kitail kapakap ni ahl wet, e pahn ketin “karonge atail pekipek kan.” (1 Sohn 5:14) Eri, kitail anahne esehla Koht en Paipelo oh sukuhlki duwen dahme e kupwurki pwe en kak ketin karonge atail kapakap kan.
Aramas tohto kamehlele me kapakap kaidehn ihte tiahk ehu me pelien lamalam kan kin wia ahpw me Koht kin uhdahn ketin karonge oh sapengala kapakap kan. Isaac, sang Kenya, nda: “I kapakap peki sawas I en wehwehkihla Paipel. Mwurinte mwo, aramas emen kohdo tuhwong ie oh kihong ie sawas me I anahneo.” Nan Philippines, Hilda men uhdihsang simoak. Mwurin eh kin songosong oh sohte pweida, eh pwoudo nda, “Ke sou kapakapki sapwellimen Koht sawas?” Hilda wia met oh nda: “I pwuriamweikihla ia uwen Eh ketin seweseiehla. E mwomwen me I tepida sohla inangih simoak. Met I kakehr uhdihsang.”
Ia duwe, Koht pahn ele kupwurki sewesehkin uhk omw iren kapwunod kan me pahrekiong kupwure?
a Siohwa iei mwaren Koht me sansalda nan Paipel.