Mie Tohnleng Suwed kan?

Ei, mie tohnleng suwed kan. Ia wasa irail kohsang ie? Taman me Koht ketin kapikada tohnleng kan ren ahneki saledek en pilipil. Mwurinte tepin ohl oh lih, Adam oh Ihp kepikipikda, ngehn unsek men doadoahngki eh saledek en pilipil ni ahl sapwung oh kahrehda uhwong ehu nin sampah. E pweida ni eh kahrehiong Adam oh Ihp en uhwongada Koht. (Senesis 3:1-7; Kaudiahl 12:9) Paipel sohte kasalehda ni oaritik ia eden ngehn menet nin tapio de ia eh pwukoa nanleng mwohn eh uhwong. Ahpw mwurin eh uhwong, Paipel kihong ih ahd ehu me konehng iei Sehdan, me wehwehki “Sounpelian,” oh Tepil, me wehwehki “Sounkaraun likamw.”​—Madiu 4:8-11.

E kansensuwed pwe uhwong wet me wiawihong Koht sohte uhdi ni ahnsowo. Ni mwehin Nohao tohnleng kei “kesehla uhdahn ar wasa” nan sapwellimen Koht peneinei nanleng ahpw e sohte sansal irail meh depe. Irail kohdihdo sampah oh alehda paliwar uduk pwehn wia soangen mour me kanamenek oh tiahk suwed, me uhdahn weksang kahrepen arail kepikipikda.​—Sud 6; Senesis 6:1-4; 1 Piter 3:19, 20.

Dahme wiawihong tohnleng suwed pwukat? Ni ahnsou me Koht ketikihdo nohlik lapalap ehu nin sampah pwehn kamwakelehda sampah, irail wiahla ngehn oh pwuradahla nanleng. Ahpw, Koht sohte ketin mweidohng tohnleng kanamenek pwukat en pwurala “nan uhdahn dewerail.” E ketikihong irail nan irair kanamenek ehu me adaneki Tartarus iei “rotorot mosul” me dohsang Koht. (Sud 6; 2 Piter 2:4) Ngehn pwukat pein mweidohng irail en mihla pahn manaman en Sehdan me Tepil, “kaunen ngehn suwed kan,” me kin “kawekala pein ih, oh mwomwehda tohnleng en marain!”​—Madiu 12:24; 2 Korint 11:14.

Paipel kin padahngki me Wehin Mesaia, koperment ehu nanleng, kokoudahr nan pahr 1914.a Mwurinte ahnsowo, Sehdan oh nah ngehn suwed kan pisikensang nanleng oh mihla nin sampah. Ar lingeringer oh manaman suwed kan kin sansal sang paraparlahn soahng suwed kan oh tiahk suwed kan nin sampah.​—Kaudiahl 12:9-12.

Ahpw, tohtohlahn tiahk samin oh tiahk lemei kan kadehdehda me imwin arail kaunda suwed kerendohr. Ni ahnsou keren, ngehn limeidihd pwukat pahn kasohrala. Mwurin Wehin Koht eh pahn kaunda paradais nin sampah erein pahr 1,000, ngehn suwed pwukat pahn ahneki ahnsou mwotomwot ehu, ren wia kaimwiseklahn kasongosong ong aramas akan. Mwuri irail pahn kasohrala soutuk.​—Madiu 25:41; Kaudiahl 20:1-3, 7-10.