Ke Kin Ese Duwen Met?

Ia duwen mehn mahs ako ar kin saunda kisiniei ni ar seiloakseli?

PWUHKEN Senesis 22:6 mahsanih me Koht ketin mahsanihong Eipraam en seiloakla wasa dohsang eh wasahn kousoano pwehn wia meirong. Paipel mahsanih me Eipraam “kihong Aisek en wahda tuwien meirong ko, a pein ih wahda samwit en kisiniei oh pil naip pwoat,” ni ara kohkohla nanialo.

Paipel sohte kasalehda ia mwomwen mehn mahs ako ar kin saunda kisiniei. Eri ia duwe, Eipraam oh Aisek saunda kisiniei oh mwuhr wahda mpwul en kisinieio ni ara seiloak? Emen me samanih poadopoad en Paipel kamehlele me mpwul en kisinieio “sohte kak wie mpwumwpwul erein seiloak reireio.” Ahpw Eipraam oh nah pwutako ele kakete wahda soahng koaros me ira anahne pwehn saunda kisiniei.

Ekei pil nda me e sohte mengei ong mehn mahs ako en saunda kisiniei. Eri ahnsou me re kak, aramas ako ele kin saunkihda arail kisiniei ko mwoalus ngkengken kan sang ahn mehn mparail ko arail kisinieio. Me samanih poadopoad en Paipel tohto kamehlele me Eipraam wahda mwoalus mpwumwpwul sang eh kisinieio mwohn eh mweselda. Ele e kihong mwoalus ko nan kisin sah ehu me sihn kolada oh wahda saho ni eh seiloak. (Ais. 30:14) Mwuhr, ele e doadoahngki mwoalus ngkengken ko oh diper en tuhke kan pwehn saunkihda kisiniei.