Koht Song Pwoson en Apram

KE KAK kilang dahme Apram wia met? Mie apwoat naip nan peh, oh likamwete e pahn kamehla nah pwutako. Dahme kahrehda e pahn kak wia soahngo? Keieu, kitail pahn mahs kilang iaduen Apram oh Sarah kak naineki pwutak menet.

Tamataman, pwe Koht inoukiong ira me ira pahn naineki pwutak men. Ahpw met likamwete sohte kak, pwehki Apram oh Sarah mahlahr. Ahpw Apram kamehlele me Koht kak wia dahme likamwete sohte kak. Eri dahme wiawi?

Mwehrin Koht wiahda ah inou, sounpahr ehu dower powe. Eri, ni ansou me Apram sounpahr 100 oh Sarah sounpahr 90, ira nainekiehr pwutak emen me adaneki Aisek. Koht kin kolokol oh kapwaiada ah inou!

Ahpw ni ansou me Aisek ekis laudla, Siohwa kasonge ahn Apram pwoson. E likweri: ‘Apram!’ Oh Apram sapeng: ‘Iet ngehi!’ Koht eri mahsanih: ‘Alehda noumw pwutak, noumw ieros, Aisek, oh kohla nan nahna me I pahn kasaleong uhk. Wasao ke pahn kamehla noumw pwutako oh meirongki ih ong ie.’

Met uhdahn kainsensuwed ong Apram, pwehki Apram limpoak ong nah pwutako laud. Oh tamataman, Koht inoukiong Apram me nah seri pahn tohto me pahn kousoan nan sahpwen Kenaan. Ahpw iaduen met kak wiawi ma Aisek mehla? Apram sohte wehwehki, ahpw e peikiong Koht.

Ni ah lela nan nahnao, Apram eri pirepene Aisek oh kihong ih pohn pei sarawio me e kauwada. Ih eri pwekada nah naip pwen kamehla nah pwutako. Ahpw ni ansouohte, tohnleng en Koht mahsanih: ‘Apram, Apram!’ Oh Apram sapeng: ‘Iet Ngehi!’

‘Dehr wia mehkot kamadak ong pwutako,’ Koht mahsanih. ‘Met I eseiehr me ke pwoson ie, pwehki ke sohte koledi noumw pwutak, noumw ieros, sang ie.’

Met kasalehda me Apram ahniki pwoson laud rehn Koht! E kamehlele me koaros kak rehn Siohwa Koht, oh me Siohwa kak pil kaiasada Aisek sang mehla. Ahpw kaidehn insenen Koht me Aisek en uhdahn kamakamala. Eri Koht kahreong emen sihpw en tengala nan tuhke limwah, oh e padahkiong Apram en meirongki sihpwo, ah kaidehn nah pwutak.