Ke Kin Ese Duwen Met?

Ia duwe, mouren kaweid kan nan Kosonned en Moseso kin kadoadoahk nan kopwung akupwung kan nan Israel mahso?

EKEI pak, ei. Tehk ehu karasepen met. Deuderonomi 24:14, 15 mahsanih: “Ke dehpa kasapwungehla pweinen tohndoadoahk emen me semwehmwe oh paisuwed, mehnda ma riomw mehn Israel de mehn liki men me kin kousoan nan ehu amwail kahnimw kan. . . . e pahn lipahnedkihla mwohn silangin KAUN-O; eri, ke ahpw pahn dipikihda irair wet.”

Kisinlikou en pekipek wet ntingdi nan pahr 632 mwohn Krais. E dierek limwahn Ashdod. Ele e ntingda ong soumwet men me sohte wiahda oh wahla uwen paun en wihd me koasoandi en wiahda, kisinlikou wet ntingdi pohn diper en sah ehu me koasoia: “Mwurin omw lidu [me wia pekipeko] nekidala wahn sahpw kan rahn kei mwoweo, Hoshayahu nein Shobay kohdo oh kihsang en noumw liduwo eh sekido. . . . Koaros me iang ie dolung wahn sahpw kan me mi pahn karakar en ketipino pahn kadehdehda . . . me dahme I nda mehlel. I sohte pwukoahki sapwung wet. . . . Ma kepinao sohte medewe me eh pwukoa sewese kapwurehdo en liduwo eh sekido, en kasalehda kadek oh poakehla liduwo! Ken dehr nennenla ni omw laduwo eh sohla eh sekid.”

Soupoad Simon Schama nda me pekipek wet “kasalehda laudsang ihte pekipek ngidingid en soumwet men me men kapwurehdo [eh sekido]. E pil kakete kasalehda me aramas me wia pekipeko ese duwen kosonned en Paipel, ahpw mehlel kosonned kan nan pwuhken Lipai oh Deuderonomi me keinapwih wiewia lemei ong me semwehmwe kan.”