Iet Sapwellimen Siohwa Laduwo Me E Ketin Kupwurperenki

“Iet ei laduwo me I , . . . kin kupwurperenki.”—AIS. 42:1.

1. Pwehki kataman en kamatalahn Sises kerendohr, dahme sapwellimen Siohwa aramas akan anahne en wia? Dahme kahrehda?

PWEHKI e kerenlahngehr rahnen kataman en kamatalahn Krais, sapwellimen Koht aramas akan anahne idawehn kaweid en wahnpoaron Pohl en “kainenehiongete kapehditail kan ong Sises, me tepin atail pwoson oh me kaunsekala atail pwoson.” (Ipru 12:2, 3) Pohl pil kapatahiong: “Medemedewe uwen me e ketin lokolongki, oh duwen eh ketin kanengamahiong kailok me e ketin alehsang rehn me dipan akan! Eri, kumwail dehr mworusala oh nan kapehd tikitikla.” (Ipru 12:2, 3) En tehk kanaiehng sapwellimen Krais elen lelepek, me imwikihla eh meirongkihla eh mour, pahn sewese Kristian keidi kan oh iengerail sihpw teikan en doulahte papah Siohwa ni lelepek oh dehr “mworusala oh nan kapehd tikitikla.”—Pil kilang Kal. 6:9.

2. Dahme kitail kak sukuhlki sang kokohp kan en Aiseia me pid sapwellimen Koht Ohl?

² Ki soukohp Aiseia, Siohwa ketikihda kokohp kei me pidada sapwellime Ohl. Kokohp pwukat kin sewese kitail en “kainenehiongete kapehditail kan ong Sises, me tepin atail pwoson oh me kaunsekala atail pwoson.”a Kokohp pwukat padahkihong kitail duwen soangen aramas dah men ih, eh lokolok kan, oh pil eh kesepwilda wiahla atail Nanmwarki oh Sounkamaiaupatail. Re pahn kalaudehla atail wehwehkihla duwen Rahn en Kataman wet me kitail pahn kasarawi nan pahret, Niepeng, April 9, mwurin kihrlahn ketipin.

Laduo Sansalda

3, 4. (a) Nan pwuhken Aiseia, dahme lepin mahsen wet “ladu” kin wehwehki? (b) Ia duwen Paipel kasalehda ihs Ladu me kileldi nan Aiseia irelaud 42, 49, 50, 52, oh 53?

³ Lepin mahsen wet “ladu” kin pwarada pak tohto nan pwuhken Aiseia. E kin kalapw wehwehki pein soukohpo. (Ais. 20:3; 44:26) Ekei pak e kin kadoadoahk ong Wehin Israel pwon de Seikop. (Ais. 41:8, 9; 44:1, 2, 21) Ahpw ia duwen kokohp teikan me pid Ladu me kileldi nan Aiseia irelaud 42, 49, 50, 52, oh 53? Palien Pwuhk Sarawi ni Lokaiahn Krihk kamehlelehiong kitail ihs me sapwellimen Siohwa Laduwo me mi nan irelaud pwukat. Ohl en Idiopia me pwuhken Wiewia kin koasoakoasoia kin wadewadek ehu kokohp pwukat ni ahnsou me sapwellimen Koht manaman kaweidih tohnpadahk Pilip en kohla reh. Ni ohl menet wadekehr iren Paipel en Aiseia 53:7, 8, ih eri idek rehn Pilip: “Komw padahkihong ie, ihs me soukohpo koasoakoasoia duwe? Ma pein ih de emen tohrohr?” Pilip ahnsowohte kawehwehiong ih me Aiseia kin koasoakoasoia Mesaia me iei Sises.—Wiewia 8:26-35.

⁴ Ni ahnsou me Sises wie seri pwelel men, Simion, me sapwellimen Koht manaman tih powe, kasalehda me “serio” pahn wiahla “marain ehu mehn kamarainih me rotorot akan oh kalinganahla tohn sapwellimomwi wehi” nin duwen me kohpada nan Aiseia 42:6 oh 49:6. (Luk 2:25-32) Pil nan Aiseia 50:6-9, e pil kohpada duwen kanamenek me Sises lelohng nipwong me e wisikla nan mwoalen kopwung en mehn Suhs kan. (Mad. 26:67; Luk 22:63) Mwurin Pendekos 33, wahnpoaron Piter kasalehda ni sansal me Sises iei sapwellimen Siohwa “Ladu.” (Ais. 52:13; 53:11; wadek Wiewia 3:13, 26.) Dahme kitail kak sukuhlki sang kokohp en Mesaia pwukat?

Siohwa Ketin Padahki Sapwellime Ladu

5. Kasukuhl dah me Laduwo ketin paiekihda?

⁵ Ehu kokohp en Aiseia me pid duwen sapwellimen Koht ladu kin kasalehda nanpwungmwahu me Siohwa oh sapwellime Iehros ahneki mwohn Iehroso ketido sampah. (Wadek Aiseia 50:4-9.) Pein Laduwo kin kasalehda me Siohwa kin ketin padapadahki ih, oh e mahsanih: “E kin ketin koangngoangehkin ie I en rong sapwellime padahk.” (Ais. 50:4) Erein ahnsou ko, sapwellimen Siohwa Laduwo kin patohwan rongorong oh suksukuhlsang rehn Semeo oh wiahla tohnpadahk peik men. Ia uwen met wia pwais kaselel ehu en kin ale kasukuhl sang Sounkapikadahn lahng oh sampah!

6. Ia duwen Laduwo ketin kasalehda eh uhpah ni unsek Semeo?

⁶ Nan kokohp wet, Laduwo ketin mahsanihki Semeo me iei “KAUN-O, Wasa Lapalahpie.” Met kin kasalehda me Laduwo pohneseiehr me Siohwa iei me sapwellimaniki pwung en kaunda lahng oh sampah. Pwehn kasalehda eh kin uhpah ni unsek Semeo, e mahsanih: “KAUN-O ketikihong ie ei dehdehki, oh I sohte kahngohdiong de sohpeisang.” (Ais. 50:5) E “mi limwah [Siohwa], duwehte sounsawas emen” ni kapikipikda en lahng oh sampah oh pil aramas. “Sounsawas” menet ‘pil perenkihda eh patopato reh [Siohwa]—E perenkihda sampah, oh E pil perenkihda aramas akan koaros.’—Lep. Pad. 8:22-31.

7. Dahme kasalehda me Laduwo kin kamehlele me Semeo pahn ketin sewese ih erein eh kin lokolok?

⁷ Kasukuhl wet me Laduwo alehdi oh pil eh kin ketin perenkihda aramas kin kaunopada ih ong ahnsou me e ketido sampah oh lelohng kalokolok laud. E ketin doulahte perenki wia kupwuren Semeo mendahki e kin lelohng kalokolok laud. (Mel. 40:8; Mad. 26:42; Sohn 6:38) Erein kalokolok pwukat, Sises patohwan kamehlele me Semeo kin ketin kupwurperenki ih oh pil pahn sewese ih. Nin duwen me Aiseia kohpada, Sises kak mahsanih: “Koht kin ketin karanih ie, oh e pahn ketin kasalehda eh sohte dipei. Mie me eimahiong kedipa ie? . . . Pein KAUN-O me pahn ketin doare ie.” (Ais. 50:8, 9) Siohwa ketin sewese ni mehlel sapwellime Ladu lelepeko erein e kalokalohk sampah, nin duwen ehu kokohp tohrohr en Aiseia pil kasalehda.

Sapwellimen Laduwo Doadoahk en Kalohk Sampah

8. Dahme kadehdehda me Sises iei me Siohwa ketin “piladahr,” nin duwen Aiseia 42:1 kohpada?

⁸ Paipel ketin kilelehdi dahme wiawi ahnsou me Sises ketin papidaisla nan pahr 29. E mahsanih me sapwellimen Koht manaman “ahpw ketidiong powe . . . a ngihl ehu ahpw peidihdo sang nanleng, me mahsanih, ‘Kowe, me iei nei pwutak kompoake, me I kin kupwurperenki.’” (Luk 3:21, 22) Siohwa ketin kasalehda ni sansal ihs me e ketin “piladahr,” nin duwen me Aiseia kohpada. (Wadek Aiseia 42:1-7.) Erein eh ketin kalokalohk sampah, Sises ketin kapwaiadahr kokohp wet ni ahl kaselel ehu. Nan Rongamwahu en Madiu, Madiu kin doadoahngki mahsen kan en Aiseia 42:1-4 pwehn kadoadoahk ong Sises.—Mad. 12:15-21.

9, 10. (a) Ia duwen Sises ketin kapwaiada kokohp en Aiseia 42:3 erein e kin wia doadoahk en kalohk? (b) Ia duwen Sises “ketikihong koaros pwuhng” erein e ketiket sampah? Iahd me e pahn ketin “kauwada tiahk pwung nin sampah”?

⁹ Kaun en pelian lamalam en Suhs akan kin kailongki aramas en Suhs semwehmwe kan. (Sohn 7:47-49) Irail kin wiakau irail oh re rasehngala “ahlek pwoat me raukdier” de “lamp ehu me pahn kunlahr.” Ahpw Sises kin ketin kupwurehla me semwehmwe oh me pahtoula kan. (Mad. 9:35, 36) E ketin luke irail oh mahsanih: “Kumwail kohdo rehi, kumwail koaros me pwangadahr oh toutoukilahr amwail mehn wisik kan, I ahpw pahn kommoaleikumwailla.” (Mad. 11:28) Sises pahn pil “ketikihong koaros pwuhng” ni eh pahn padahngki sapwellimen Siohwa koasoandi en dahme pwung oh sapwung. (Ais. 42:3) E pil doula kasalehda me sapwellimen Koht kosonned kan anahne en kadoadoahk ni ahl pwung oh kalahngan. (Mad. 23:23) Sises pil kasalehda tenek pahrek ni eh ketin kalohk ong aramas sohte lipilipil kan, me kepwehpwe oh pil me semwehmwe kan.—Mad. 11:5; Luk 18:18-23.

¹⁰ Kokohp en Aiseia pil kohpada duwen ih me Siohwa ketin ‘piladahro’ en “kauwada tiahk pwung nin sampah.” (Ais. 42:4) E pahn ketin kapwaiada met ni ahnsou keren mwurin e pahn kasohrehla kaun en politik kan koaros oh wiliankihdi sapwellime kaunda pwung nin duwen Nanmwarki en Wehin Mesaia. E pahn ketin kauwada sampah kapw ehu, wasa me “pwungen kalahngan en Koht pahn poadada ie.”—2 Pit. 3:13; Dan. 2:44.

“Marain” Ehu oh “Inou” Ehu

11. Ia duwen Sises ketin wia ‘marain en wehi koaros’ ni mwein wahnpoaron akan? Ia duwen e ketin wia met rahn pwukat?

¹¹ Pwehn kapwaiada kokohp en Aiseia 42:6, Sises ketin kadehdehda ni mehlel me iei ih ‘marain en wehi koaros.’ Erein sapwellimen doadoahk en kalohk sampah, e ketikihong padahk mehlel me pid duwen Koht ong mehn Suhs kan. (Mad. 15:24; Wiewia 3:26) Sises mahsanih: “Ngehi me marain en sampah.” (Sohn 8:12) E wiahla marain ehu ong mehn Suhs kan oh pil wehi kan koaros sang ni eh ketikihda padahk mehlel me pid duwen Koht oh pil meirongkihla eh mour unsek nin duwen tomw ehu ong tohnsampah koaros. (Mad. 20:28) Mwurin e kaiasada, e ketin kehkehlikihong sapwellime tohnpadahk kan en kadehde duwen ih lao mehn kadehde wet “lelohng ni irepen sampah.” (Wiewia 1:8) Erein ara kin kalokalohk, Pohl oh Parnapas kin doadoahngki ong irail akan me kaidehn mehn Suhs lepin mahsen kan me pid duwen “marain ehu ong mehn liki kan.” (Wiewia 13:46-48; pil kilang Aiseia 49:6.) Doadoahk wet kin doulahte wiawi ni en rien Sises me keidi kan sampah oh pil iengerail kan kin kalohki rongamwahu oh sewese aramas kan en pwosonla Sises, me iei ‘marain en wehi koaros.’

12. Ia duwen Siohwa ketikihong sapwellime Ladu “inou ehu ong aramas koaros”?

¹² Nan kokohpohte, Siohwa mahsanihong sapwellime Ladu pilipildahro: “Pwehki kowe, I pahn wiahda inou ong aramas koaros.” (Ais. 42:6) Sehdan kin songosong en kemehla Sises oh katokehdi ih sang eh pahn kaunsekala sapwellime doadoahk en kalohk sampah, ahpw Siohwa kin ketin pere oh apwahpwalih ih lao lel ahnsou me kileldi ong ih en pwoula. (Mad. 2:13; Sohn 7:30) Siohwa eri kaiasada Sises oh wiahda “inou” ong aramas akan en sampah. Inou wet kin kihda mehn kamehlel me sapwellimen Koht Ladu lelepek pahn doulahte wia ‘marain en wehi koaros,’ pwehn kasaledekla irail akan me mihmi nan rotorot oh sehse duwen Koht.—Wadek Aiseia 49:8, 9.b

13. Ni ahl dah me Sises kasaledekihala “me kin wonohn nan rotorot” erein eh kalokalohk sampah? Ia duwen e kin usehlahte wiewia met?

¹³ Pwehn pahrekiong inou wet, sapwellimen Siohwa Ladu pilipildahro pahn “kapehdpeseng me maskun kan, oh kasaledekihala me kin wonohn nan rotorot en imweteng kan.” (Ais. 42:7) Erein e ketin kalokalohk sampah, Sises ketin kapwaiada met ni eh kasansalehda tiahk en kaudok likamw akan oh pil kalohki rongamwahu duwen Wehio. (Mad. 15:3; Luk 8:1) Ih eri kasaledekla mehn Suhs kan sang kaudok likamw oh irail wiahla sapwellime tohnpadahk kan. (Sohn 8:31, 32) Ni ahlohte, Sises pil ketin sewese me rar kei me kaidehn mehn Suhs en esehla padahk mehlel. E kehkehlikihong sapwellime tohnpadahk kan en “kohwei . . . oh padahkihong tohn wehi kan koaros; pwe re en wiahla nei tohnpadahk,” oh ketin inoukihong irail me e pahn ketin ieiang irail ahnsou koaros “lel ni imwin kawa.” (Mad. 28:19, 20) Sang wasa me e ketiket nanleng, Sises Krais kin mahmahsanih doadoahk en kalohk wet sampah pwon.

Siohwa Ketin Kasapwilada “Laduwo”

14, 15. Dahme kahrehda Siohwa ketin kasapwilada sapwellime Laduwo? Ia duwen E ketin wia met?

¹⁴ Pil nan ehu kokohp tohrohr me pid duwen Ladu Mesaia, Siohwa mahsanih: “Ei laduwo pahn pweida mwahu nan eh doadoahk; e pahn lapalapala oh waunla kowahlahpie.” (Ais. 52:13) Siohwa ketin kasapwilada sapwellime Ohl pwehki uhpa me e kasalehda ong Eh pwung en kaunda lahng oh sampah oh pil eh lelepek pahn kalokolok laud kan.

¹⁵ Wahnpoaron Piter ntingihdi duwen Sises: “Me ketidiongehr ni palimaun en Koht, oh ketin kakaun tohnleng koaros, me manaman akan oh me lapalap akan.” (1 Pit. 3:22) Wahnpoaron Pohl pil ntingihdi: “E ketin mpahi, oh e ketin weid nan elen peik lao lel mehla—eh pwoula pohn [tuhkehn kalokolok]. Pwehki kahrepe wet Koht ketin kasapwiladahng nan wasa me keieu ileile, oh ketikihong mwar ehu me lapalapasang mwar akan koaros; pwe mehkoaros me momour nanleng, oh nin sampah, oh pil pahn sampah,en kelehpwikihdi, pwe re en wauneki mwaren Sises; oh koaros en sakarkihda ni sansal me Sises Krais me Kaun, ong ni kalinganpen Koht Sahm.”—Pil. 2:8-11.

16. Ia duwen Sises ketin “lapalapala oh waunla kowahlahpie” nan pahr 1914? Dahme e ketin kapwaiada sang ahnsowo kohdo?

¹⁶ Nan pahr 1914, Siohwa pil ketin kasapwilada Sises laudsang met. E ketin “lapalapala oh waunla kowahlahpie” ni ahnsou me Siohwa kasapwilada ih nin duwen Nanmwarki en Wehin Mesaia. (Mel. 2:6; Dan. 7:13, 14) Sang ahnsowo kohdo, Krais kin ketin doulahte ‘kaunda sapwellime imwintihti kan.’ (Mel. 110:2) Keieu, e ketin kalowehdi Sehdan oh ienge ngehn saut akan oh pisikendihdo irail ong sampah. (Kaud. 12:7-12) Eri, nin duwen Sairus Lapalap, Krais ketin kasaledekla luhwen rie keidi kan nin sampah sang ‘Papilon Lapalap.’ (Kaud. 18:2; Ais. 44:28) E ketin kaweidih doadoahk en kalohk nan sampah pwon me imwikihla rikirikpene en “luhwen” rie me keidi kan oh pil me rar kei en ‘sihpw teikan’ me kin lelepek wia iengen “kisin pwihn sihpw” kan.—Kaud. 12:17; Sohn 10:16; Luk 12:32.

17. Dahme kitail sukuhlkiher sang atail onopki kokohp en Aiseia me pid “Laduwo”?

¹⁷ Onop en kokohp kapwuriamwei pwukat nan pwuhken Aiseia kin kalaudehla atail kalahnganki atail Nanmwarki oh Sounkamaiaupatail, Sises Krais. Sapwellime irair en uhpah nin duwen sapwellimen Koht Ohl erein e wie kalokalohk sampah kin kasalehda duwen kasukuhl me e alehdi ni e ketiket limwahn Semeo mwohn e ketidihdo sampah. E ketin kadehdehda me ih me ‘marain en wehi koaros’ sang eh doadoahk en kalohk me pein ih wia oh pil duwen e kin kaukaweidih doadoahk wet leledo rahnwet. Kitail pahn kilang mwuhr duwen ehu kokohp me pid duwen Ladu Mesaia me kasalehda duwen eh ketin lokolok oh kakerehdi sapwellime nta pwehn wia kamwahupatail. Kitail anahne “medemedewe uwen” kesempwal en ire pwukat pwehki Kataman en sapwellime pwoula pahn kereniong lel.—Ipru 12:2, 3.

[Nting tikitik me mi pahs]

Kousapahl

• His me wia “ladu” nan kokohp en Aiseia? Ia duwen kitail ese met?

• Kasukuhl dahieu me Laduwo ketin paiekihda sang rehn Siohwa?

• Ia duwen Sises wia ‘marain en wehi koaros’?

• Ia duwen Laduwo kesepwilda?

[Kilel nan pali 21]

Pilip kasalehda me Sises, me wia Mesaia, iei “ladu” me Aiseia kohpada

[Kilel nan pali 23]

Laduwo me Siohwa ketin piladahr, Sises, ketin kupwurehla me semwehmwe oh soumwahu kan

[Kilel nan pali 24]

Sises ketin kasapwilda nin duwen Nanmwarki en Wehin Mesaia