Peidek Kan Sang Sounwadawad Kan

Melkahka 144:12-15 kin dokedoke sapwellimen Koht aramas akan de mehn liki suwed kan me iretikitik 11 pil kasalehda?

Lokaiahn Ipru me mi nan iretikitiko kak mie wehwe tohto. Eri, ire kesempwal pwukat me kileldi pah pahn sewese kitail en wehwehki ire pwukat ni pwung:

1. Tehk audepen melkahkao pwon. Lepin lokaiao “eri” nan iretikitik 12 kin wehwehki me kapai kan me sansalda nan iretikitik 12 lel iretikitik 14 kin dokedoke me pwung kan, irail kan me peki Koht en ketin “kapitala oh doareirailla” sang aramas suwed kan (iretikitik 11). Madamadau wet pil sansalda nan iretikitik 15, wasa me lepin lokaia pwukat “meid pai” pwarada pak riau oh kin dokedoke soangen aramas kohte, me “arail Koht iei Siohwa!”

2. Kawehwe wet kin pahrekiong iren Paipel teikan me kin inoukihda kapai kan sang rehn Koht ong sapwellime aramas lelepek akan. Melkahka wet kasalehda koapworopwor me Depit ahneki me mwurin Koht eh ketin doarehla wehin Israel sang eh imwintihti kan, E pahn ketin kapaiahda aramas ako pwe ren ahneki nsenamwahu oh pweida mwahu. (Lip. 26:9, 10; Deud. 7:13; Mel. 128:1-6) Karasepe, Deuderonomi 28:4 mahsanih: “KAUN-O pahn ketin kupwuramwahwihkin kumwail seri ngeder, reken wahnsahpw, iangahki kou oh sihpw tohto.” Ni mwehin kaundahn nein Depit pwutako Solomon, wehin Israel ahneki irair en popohl oh pweida mwahu me inenen laud. Ahpw laudsang met, mwomwen kaundahn Solomon kin kasalehda ahnsou me kaundahn Mesaiao pahn wiawi.​—1 Nan. 4:20, 21; Mel. 72:1-20.

3. Eri, kawehwe pwung wet en Melkahka 144 kin kahrehiong melkahkao pwon en kasalehda ni sansal koapworopwor kaselel en sapwellimen Koht ladu kan, me iei Koht pahn ketin kasohrehla me suwed kan oh kahrehda popohl poatopoat oh pweida mwahu en miehla ong me pwung kan.​—Mel. 37:10, 11.