Kitail Sapwellimen Siohwa Aramas

1. Dahme kahrehda kitail kak nda me Siohwa sapwellimanki soahng koaros? (Menlau kilang tepin kilel.)

SIOHWA sapwellimanki soahng koaros! E sapwellimanki “pahnlahng oh sampah oh pil audepe kan koaros.” (Deud. 10:14; Kaud. 4:11) Pwehki Siohwa me ketin kapikada aramas akan, kitail koaros wia sapwellime. (Mel. 100:3) Ahpw nanpwungen aramas koaros me wie momour, Koht ketin pilada ekei pwehn wia sapwellime ni ahl tohrohr ehu.

2. Nin duwen me Paipel mahsanih, ihs me wia sapwellimen Siohwa aramas ni ahl tohrohr ehu?

² Karasepe, nin duwen sapwellimen Siohwa tohnkaudok lelepek kan en wehin Israel mahso, nan Melkahka 135 kawehwehda me e ketin “sapwellimanikinirailla.” (Mel. 135:4) Pil Oseia kohpada me ekei aramas me kaidehn mehn Israel pahn wiahla sapwellimen Siohwa aramas akan. (Os. 2:23) Kokohp wet pweida ni ahnsou me Siohwa ketin pilada aramas akan me kaidehn mehn Israel pwehn iang Krais kakaun nanleng. (Wiewia 10:45; Rom 9:23-26) Irail pwukat me keikihdi sapwellimen Koht manaman adaneki “wehi sarawi ehu.” Irail iei me “Koht ketin sapwellimankilahr.” (1 Pit. 2:9, 10) Ahpw ia duwen Kristian lelepek kan koaros rahnwet me ahneki koapworopwor en mour soutuk nin sampah? Siohwa ketin kahdanekin irail “nei aramas akan” oh nei me pilipil kan.​—Ais. 65:22.

3. (a) Ihs me ahneki nanpwungmwahu tohrohr rehn Siohwa rahnwet? (b) Dahme kitail pahn koasoiapene nan iren onop wet?

³ Rahnwet, “kisin pwihn sihpw” me ahneki koapworopwor en mour soutuk nanleng, oh pil “sihpw teikan” me ahneki koapworopwor en mour soutuk nin sampah, kin ehupene kaudokiong Siohwa nin duwen “pelin sihpw teieu.” (Luk 12:32; Sohn 10:16) Kitail men kasalehiong Siohwa ia uwen atail kalahnganki atail ahneki nanpwungmwahu tohrohr reh. Nan iren onop wet, kitail pahn koasoiapene ia duwen atail kak kasalehda kalahngan ong Siohwa ni ahl tohrohr wet.

KITAIL INOUKIHONG SIOHWA ATAIL MOUR

4. Ia duwen atail kak kalahngankihong Siohwa eh ketin mweidohng kitail en ahneki nanpwungmwahu reh, oh ia duwen Sises eh ketin wia duwehte met?

⁴ Kitail kin kasalehiong Siohwa atail kalahngan ni atail inoukihong ih atail mour oh papidaisla. Eri koaros kak kilang me kitail sapwellimen Siohwa oh kitail men peikiong ih. (Ipru 12:9) Sises ketin wia duwehte met ni eh ketin papidaisla. Mendahki e ketin wia kisehn wehi ehu me inoudahr ong Siohwa, e patohwanda pein ih ong Siohwa. Mwomwen me e patopatohwan: “Maing ei Koht, ia uwen ei kin ngoangki kapwaiada kupwuromwien!”​—Mel. 40:7, 8.

5, 6. (a) Dahme Siohwa ketin mahsanih ni ahnsou me Sises papidaisla? (b) Karasaras dahieu me kak sewese kitail en wehwehki duwen sapwellimen Siohwa pepehm ong atail inou ong ih?

⁵ Ia sapwellimen Siohwa pepehm ni ahnsou me Sises papidaisla? Paipel mahsanih: “Mwurin Sises eh ketin papidaisla, e mwadang ketida sang nan pihlo; a kilang! nanleng pa ritpeseng, Sohn eri kilangada sapwellimen Koht manaman me kohkohdi pohn Sises ni mwomwen mwuroi men. Kilang! Pil ngihl ehu kohsang nanleng me mahsanih: ‘Iet nei Pwutak kompoake me I kin kupwurperenki.’” (Mad. 3:16, 17) Sises uhdahn wiahier sapwellimen Koht. Ahpw Siohwa ketin kupwurperenkihda ni eh mahsanihada me Sises men doadoahngki eh mour pwehn papah Ih kelehpw. Siohwa pil ketin kupwurperenki ni atail inoukihong ih atail mour, oh e pahn ketin kapaikitailda.​—Mel. 149:4.

⁶ Ahpw Siohwa ketin sapwellimankiher soahng koaros! Dahme kitail kak patohwanohng ih? Medewehla ohl men me ahneki mwetuwel en rohs kaselel ehu. Ehu rahno, nah kisin serepeino dolungada ehu rohs ko oh kihong ih. Mendahki pahpao me ahneki rohs ko koaros, e uhdahn perenkihda kisakiso. Met kasalehda me nah serepeino poakepoake ih. Rohso me nah serepeino kihong ih uhdahn kesempwal sang rohs teikan koaros nan eh mwetuwelo. Pil duwehte met, Siohwa kin ketin kupwurperenkihda ni atail kin men inoukihong ih atail mour.​—Eks. 34:14.

7. Ia duwen Malakai eh sewese kitail en wehwehki duwen sapwellimen Siohwa pepehm ong irail kan me men papah ih?

⁷ Wadek Malakai 3:16. Dahme kahrehda e uhdahn kesempwal ken inoukihong Siohwa omw mour oh papidaisla? Ni mehlel, ni ahnsowohte me ke tepida miehla, Sounkapikadao Siohwa ketin sapwellimankiher uhk. Ahpw medewehla ia uwen Siohwa eh pahn ketin kupwurperenki omw wiahki ih omw Kaun oh inoukihong ih omw mour. (Lep. Pad. 23:15) Siohwa ketin mwahngih irail kan me men papah ih, oh e kin ketin ntingihedi adarail nan sapwellime “pwuhk” en kataman.

8, 9. Dahme Siohwa ketin kupwurki rehn irail kan me adarail ko ntingdi nan sapwellime “pwuhk” en kataman?

⁸ Ma kitail men adatail kan en mihmihte nan sapwellimen Siohwa “pwuhk” en kataman, mie mehkot me kitail anahne wia. Malakai nda me kitail anahne ‘lemmwiki Siohwa oh wauneki mwareo.’ Ma kitail kaudokiong emen de mehkot tohrohr, Siohwa pahn ketin irisasang adatail nan sapwellime pwuhko!​—Eks. 32:33; Mel. 69:28.

⁹ Eri e sohte itar en ihte inoukihong Siohwa en wia kupwure oh papidaisla. Kitail wia mepwukat pak ehute, ahpw kaudokiong Siohwa kin pidada mwomwen atail mour. Rahn koaros, erein atail mour, kitail anahne kadehdehda sang ni atail wiewia kan me kitail kin peikiong Siohwa.​—1 Pit. 4:1, 2.

SOIKALA INENG KAN EN SAMPAH

10. Wekpeseng dahieu me sansal nanpwungen irail kan me kin papah Siohwa oh irail kan me sohte kin papah ih?

¹⁰ Nan iren onop en mwoweo, kitail sukuhlkiher me Kain, Solomon, oh mehn Israel ko nda me dene irail kin kaudokiong Siohwa ahpw re sohte loalopwoatohng ih. Karasaras pwukat padahkihong kitail me e sohte itar en ihte nda me kitail kin kaudokiong Siohwa. Kitail anahne tateki dahme suwed oh poakohng dahme mwahu. (Rom 12:9) Siohwa ketin mahsanih me e pahn mie ‘wekpeseng en aramas pwung kan oh aramas suwed kan, me kin papah ih oh me sohte kin papah ih.’​—Mal. 3:18.

11. Dahme kahrehda e pahn mengei ong koaros en kilang me kitail kin kaudokiong Siohwa kelehpw?

¹¹ Kitail kalahnganki me Siohwa ketin pilkitailda en wia sapwellime aramas! E pahn mengei ong koaros en kilang me kitail kin men ieiang Siohwa. (1 Tim. 4:15; Mad. 5:16) Pein idek rehmw: ‘Ia duwe, meteikan kak kilang me I kin uhdahn loalopwoat ong Siohwa? I kin pohlki ei padahkihong aramas akan me ngehi emen Sounkadehdehn Siohwa?’ Medewehla uwen Siohwa eh pahn ketin nsensuwedla ma kitail namenengki padahkihong meteikan me kitail sapwellime aramas.​—Mel. 119:46; wadek Mark 8:38.

12, 13. Ia duwen ekei ar kin kahrehiong meteikan en apwalki ese ma irail Sounkadehdehn Siohwa kan?

¹² E kansensuwed me ekei Sounkadehdehn Siohwa kin alasang “elen madamadau en sampah.” Pwehki met, irail duwehte irail kan me sohte kin kaudokiong Siohwa. (1 Kor. 2:12) “Elen madamadau en sampah” kin kahrehiong aramas akan en medemedewehte pein arail ineng roporop kan. (Ep. 2:3) Karasepe, mendahki kaweid koaros me kitail aleier, ekei pilada en likouki likou me sohte konehng. Irail kin likawih likou me it oh kasal paliwar, pil ni arail kohla ni mihting en Kristian kan. De irail kin pilada mwomwen seisei de sidail en wiahda pitenmoang me sohte konehng. (1 Tim. 2:9, 10) Pwehki met, e kin apwal ong meteikan en ese ma irail Sounkadehdehn Siohwa kei de soh.​—Seims 4:4.

¹³ Pil mie soahng kei me kasalehda me ekei Sounkadehde kan kin duwehte sampah wet. Karasepe, ni kamadipw kan, ekei kin kahlek oh mwekid ni ahl ehu me sohte konehng Kristian kan. Meteikan kin kihda kilel en pein irail oh nda soahng kan duwen irail nan Internet me kasalehda madamadau me sohte konehng. Ele irail saikinte ale peneu nan mwomwohdiso pwehki dihp ehu me re wiahda, ahpw irail kak wia mehn kahlemeng suwed ong riarail Kristian kan me kin nannanti en weksang sampah wet.​—Wadek 1 Piter 2:11, 12.

14. Dahme kitail anahne wia pwehn pere atail nanpwungmwahu tohrohr rehn Siohwa?

¹⁴ Soahng koaros nin sampah wet wiawihda pwehn kahrehiong kitail en medemedewehte “ineng en uduk oh ineng en mesen aramas oh pohnmwahsohki dahme emen kin ahneki.” (1 Sohn 2:16) Kitail sapwellimen Siohwa aramas akan, eri kitail weksang meteikan. Kitail kin “soikala wiewia kan me kasohwauwih Koht oh ineng en sampah,” oh kitail “kin momourki madamadau pwung oh idawehn elen pwung oh kasalehda poadidiong Koht nan koasoandi en mwehi wet.” (Taitus 2:12) Atail mour pwon, pil mwomwen atail kin koasoi, mwenge, nim, likou, oh doadoahk anahne sansal ong koaros me kitail sapwellimen Siohwa aramas akan.​—Wadek 1 Korint 10:31, 32.

KITAIL EN “UHDAHN LIMPOAKPENE”

15. Dahme kahrehda kitail anahne kadek oh poakohng riatail Kristian kan?

¹⁵ Kitail kin kasalehda me kitail kesempwalki atail nanpwungmwahu rehn Siohwa sang ni mwomwen atail wiewia ong riatail Kristian kan. Duwehte kitail, irail pil wia sapwellimen Siohwa aramas kei. Ma kitail tamataman met, kitail pahn ahnsou koaros kasalehda kadek oh limpoak ong irail. (1 Des. 5:15) Ia uwen met eh kesempwal? Sises mahsanihong sapwellime tohnpadahk kan: “Pwe koaros pahn esehki me kumwail nei tohnpadahk kan​—ma kumwail kin limpoakpene nanpwungamwail.”​—Sohn 13:35.

16. Dahme kitail sukuhlkihsang Kosonned en Moseso duwen Siohwa eh ketin poakohng sapwellime aramas akan?

¹⁶ Karasaras ehu sang Kosonned en Moseso kak sewese kitail en wehwehki ia pahn mwomwen atail wiewia ong meteikan nan mwomwohdiso. Nan sapwellimen Siohwa tehnpas sarawio, mie dipwisou en doadoahk kan me kin kadoadoahk ongete kaudok. Kosonnedo kawehwehda ni sansal ia duwen mehn Lipai kan ar pahn apwalih dipwisoun doadoahk pwukat, oh mehmen me sohte idawehn kaweid pwukat pahn kamakamala. (Nemp. 1:50, 51) Ma Siohwa kin ketin uhdahn kesempwalki mwomwen aramas akan ar doadoahngki dipwisou pwukat me kin kadoadoahk ong kaudok ong ih, ia uwen e kin ketin nsenohki duwen mwomwen aramas akan ar wiewia ong sapwellime tohnkaudok loalopwoat kan! E kin ketin padahkihong kitail ia uwen atail kesempwal mwohn silangih ni eh mahsanih: “Mehmen me pahn sair kumwail pahn sair mehkot me keieu kesempwal rehi.”​—Sek. 2:8.

17. Dahme Siohwa kin “ketin karonge oh kupwure”?

¹⁷ Malakai nda me Siohwa kin “ketin karonge oh kupwure” mwomwen wiewiahn sapwellime aramas akan ong emenemen. (Mal. 3:16) Siohwa “ketin mwahngih irail kan me e ketin sapwellimanki.” (2 Tim. 2:19) E uhdahn ketin mwahngih soahng koaros me kitail kin wia de nda. (Ipru 4:13) Ni atail sohte kin kadek ong riatail Kristian kan, Siohwa kin ketin mwahngih. Ahpw kitail kak kamehlele me Siohwa pil kin mwahngih ni atail kin kasamwo meteikan, kasalehda kadek, sapan, oh mahk.​—Ipru 13:16; 1 Pit. 4:8, 9.

SIOHWA SOHTE PAHN KETIN KESEHLA SAPWELLIME KAN

18. Ia duwen atail kak kalahngankihong Siohwa eh ketin pilkitailda en wia sapwellime?

¹⁸ Kitail men kasalehiong Siohwa ia uwen atail kalahnganki me kitail wia sapwellime aramas akan. Kitail ese me ni atail inoukihong ih atail mour, e wia pilipil me keieu mwahu me kitail kak wiahda. Mendahki kitail kin momour “nanpwungen dih ehu me suwed oh dipan,” kitail pil kak ‘mwakelekel oh sohte karaunpatail’ oh kin lingaling “duwehte marain nin sampah.” (Pil. 2:15) Eri kitail kin koasoanehdi teng en dehr wia soahng kan me Siohwa kin ketin kalahdeki. (Seims 4:7) Oh kitail kin poakohng oh wauneki riatail Kristian kan pwehki irail pil wia sapwellimen Siohwa aramas.​—Rom 12:10.

19. Ia duwen Siohwa eh ketin katingih irail kan me wia sapwellime?

¹⁹ Paipel inoukihda: “KAUN-O sohte pahn ketin kesehla sapwellime kan.” (Mel. 94:14) Inou wet uhdahn mehlel. Sohte lipilipil dahme pahn wiawi, Siohwa pahn ketin ieiang kitail. Mendahki ma kitail mehla, e sohte pahn ketin meliehla kitail. (Rom 8:38, 39) “Ma kitail momour, kitail kin momour ong Siohwa, oh ma kitail mehla, kitail kin mehla ong Siohwa. Eri ma kitail momour de mehla, sapwellimen Siohwa kitail.” (Rom 14:8) Kitail kin kasikasik ahnsou me Siohwa pahn ketin kaiasada kompoakepah loalopwoat kan koaros me melahr. (Mad. 22:32) Pil ni ahnsouwet, kitail kin ahneki kisakis kaselel tohto sang Samatailo. Ni duwen me Paipel mahsanih, “meid pai wehi me eh Koht, iei KAUN-O; meid pai aramas akan me e ketin piladahr pwe en sapwellimankihla!”​—Mel. 33:12.