Iang Siohwa Ketin Doadoahk Ehuehu Rahn

1. Ni ahl dah kan me kitail kak iang Siohwa ketin doadoahk?

MWURIN Siohwa eh ketin kapikada aramas akan, e kupwurki irail en iang ih ketin wia sapwellime doadoahk. Mendahki rahnwet aramas akan sohte unsek, irail me lelepek kan kak iang Siohwa ketin doadoahk ehuehu rahn. Karasepe, kitail wia “iengen Koht tohndoadoahk kan” ni atail kin kalohki rongamwahu en sapwellime Wehio oh katohnpadahk. (1 Kor. 3:5-9) E uhdahn wia pai kaselel ehu me Sounkapikpatail me keieu manaman ketin pilada kitail en wia doadoahk ehu me inenen kesempwal! Ahpw, kalohk kaidehn ihte elen atail en iang Siohwa ketin doadoahk. Nan iren onop wet, kitail pahn sukuhlki ia duwen atail kak iang ih ketin doadoahk ni atail kin sewese atail peneinei oh irail kan nan mwomwohdiso, kasamwo meteikan ni kadek, sewese doadoahk kan me sapwellime pwihn kin wiewia nan sampah pwon, oh kalaudehla atail papah ih.​—Kol. 3:23.

2. Dahme kahrehda kitail en dehr kapahrekihong dahme kitail kak wia ong Siohwa dahme meteikan kak wia?

² Ni atail onopki iren onop wet, e kesempwal kitail en tamataman me aramas koaros wekpeseng. Atail sounpar, roson, irair, oh koahiek kan sohte duwehpene. Eri dehr kapahrekihong dahme ke kak wia ong Siohwa dahme meteikan kak wia. Wahnpoaron Pohl nda: “Emenemen en kasawih pein eh wiewia kan, e ahpw pahn perenkihda pein ih, a kaidehn en kapahrekiong ih meteikan.”​—Kal. 6:4.

SEWESE OMW PENEINEI OH METEIKAN NAN MWOMWOHDISO

3. Dahme kahrehda kitail kak nda me koaros me kin apwalih arail peneinei kin iang Koht ketin doadoahk?

³ Siohwa ketin kasik kitail en apwalih atail peneinei. Karasepe, ele ke anahne koadoahkihada mwohni pwehn apwalihala anahn en omw peneinei. Tohto nohno kan kin anahne mihmi imwarail pwehn mi rehn neirail kisin seri kan. Oh ni atail pahpa nohno kan ar sohla kak apwalih pein irail, ele kitail pahn anahne apwalih irail. Mepwukat wia soahng kesempwal kei. Paipel mahsanih: “Ma emen sohte kin apwalih pein eh peneinei, ahpw mehlel irail kan me kousoan nan imwe, e kahmahmkilahr eh pwoson oh e suwedsang emen me sohte eh pwoson.” (1 Tim. 5:8) Ma mie omw pwukoa ong omw peneinei, ele ke kin pehm me ke sohte kak wia laud ong Siohwa nin duwen me ke men wia. Ahpw dehr mworusala! Siohwa kin ketin kupwurperenki ni omw kin apwalih omw peneinei.​—1 Kor. 10:31.

4. Ia duwen pahpa nohno kan ar kak mwohneki mahs Wehio, oh dahme kin wiawi ni arail wia met?

⁴ Pahpa nohno Kristian kan kak iang Siohwa ketin doadoahk sang ni arail sewese neirail seri kan en wiahda mehn akadei kan me pid papah Siohwa. Pahpa nohno tohto wiahier met. Imwilahn met, neirail pwutak oh serepein kan pilada mwuhr en doadoahngki pali laud en arail ahnsou ong papah Siohwa, pil lella wasa kan me dohsang imwarail. Ekei wia misineri, ekei kin pioneer wasa me anahn laud mie ong sounkalohk, oh ekei kin papah nan Pedel. Ei mehlel, ni neirail seri kan ar kin dohsang irail, pahpa nohno kan sohte kak ehupene rehrail ni uwen me re mwahuki. Ahpw re kin kangoange neirail seri kan en pousehlahte papah Siohwa sohte lipilipil wasa re mi ie. Dahme kahrehda? Pwehki re uhdahn perenki me neirail seri kan kin mwohneki mahs Siohwa nan arail mour. (3 Sohn 4) Tohto pahpa nohno pwukat ahneki pepehmohte me Ana ahneki ni eh nda me e “patohwanohng” Siohwa nah pwutako Samuel. Re pehm me e wia pai kaselel ehu en iang Siohwa ketin doadoahk ni ahl wet.​—1 Sam. 1:28.

5. Ia duwen omw kak sewese riomw Kristian kan nan omw mwomwohdiso? (Menlau kilang tepin kilel.)

⁵ Ma sohte omw pwukoa en apwalih omw peneinei ahnsou wet, ke kak sewese riomw Kristian kan me soumwahu de mahlahr de ahneki soangen anahn teikan? De ke kak sewese irail kan me kin apwalih irail pwukat? Rapahki irail kan nan omw mwomwohdiso me ele anahne soangen sawas pwukat. Karasepe, ele mie sister men me apwahpwalih eh pahpa nohno me mahlahr. Ke kak mwemweit rehn eh pahpa nohno pwe sistero en kak apwalihala irair teikan? De mwein ke kak sewese emen ni omw wahla ih ni mihting kan, netinet, de mwemweit rehn emen me mi nan imwen wini. Ni omw wia met, ele ke kin iang Siohwa ketin doadoahk ni omw sewese sapengala en emen eh kapakap.​—Wadek 1 Korint 10:24.

KASAMWO METEIKAN NI KADEK

6. Ia duwen atail kak kasamwo meteikan ni kadek?

⁶ Me tohto kin ese duwen kadek me iengen Koht tohndoadoahk kan kin kasalehda ni arail kin kasamwo meteikan. Nan Paipel, lepin lokaia kan “kasamwo meteikan ni kadek” ni lokaiahn Krihs kin wehwehki “kadekohng mehn keiru kan.” (Ipru 13:2; ntp.) Nan Mahsen en Koht, kitail kak wadek duwen karasepe kan me padahkihong kitail ia duwen atail kak kasamwo meteikan ni kadek. (Sen. 18:1-5) Kitail kak oh anahne sewese meteikan ni ahnsou sohte lipilipil me kitail kak, mehnda ma irail “kisehn atail pwoson” de soh.​—Kal. 6:10.

7. Kamwahu dah kan me kin kohsang omw kasamwo ni kadek irail kan me kin doadoahngki pali laud en arail ahnsou ong papah Siohwa?

⁷ Ia duwe, ke kak iang Siohwa ketin doadoahk sang ni omw kasamwo irail kan me kin doadoahngki pali laud en arail ahnsou ong papah Siohwa en mi rehmw? (Wadek 3 Sohn 5, 8.) Ni atail wia met, e kin wia kamwahu ehu ong irail oh pil kitail. Paipel mahsanih me “kitail en kangoange emenemen.” (Rom 1:11, 12) Tehk dahme wiawihong Olaf. Ni eh pwulopwul, brother kiripw men me wia sounapwalih me kin seiloak mwemweitdo ni eh mwomwohdiso oh anahne wasahn kousoan, ahpw sohte emen nan mwomwohdiso kak sewese ih. Olaf peki rehn eh pahpa nohno, me kaidehn Sounkadehde kei, ma sounapwalih me kin seiloako kak mihmi rehrail. Ira nda ei ahpw Olaf pahn anahne meir pohn arail sehr laudo. Ih met me Olaf wia, oh e sohte koluhkihla. E uhdahn peren erein wihk me sounapwalih me kin seiloako mi rehrail! Ni menseng en ehuehu rahn ira kin pirida oh koasoiapene soangen ire tohto erein ara kin mwengehn ni menseng. Sounapwalih me kin seiloako uhdahn kangoange laud Olaf me kahrehda Olaf pilada en tepida doadoahngki pali laud en ahnsou ong papah Siohwa. Erein sounpar 40, Olaf papahier nin duwen misineri men nan ekei sahpw.

8. Dahme kahrehda kitail en kadek mehnda ma meteikan ar sohte kasalehda kalahngan? Menlau kihda ehu karasaras.

⁸ Ke kak kasalehda kadek ong mehn keiru kan ni soangsoangen ahl tohto mehnda ma re sohte perenki omw wia met nin tapio. Karasepe, sister men nan Spain kin onop Paipel rehn Yesica, lih emen sang Ecuador. Ehu rahno erein ara onop Paipel, Yesica sohte kak uhdihsang eh sengiseng. Eri sistero idek reh dahme kahrehda. Yesica nda me mwohn eh keseudo Spain, e uhdahn semwehmwe. Ehu rahno sohte douluhl mwenge me e kak kihong nah serepeino, pihlte me mie. Yesica kapakapki sawas erein eh songosong en kameirihala nah serio. Mwurinte mwo, Sounkadehde riemen mwemweitla rehn Yesica oh kihong ih nah makasihn ehu. Ahpw e lemei ong ira oh tehrpeseng makasihno, nda: “Ih met mwenge me kumwa men ien kihong nei serepeino?” Sister ko song en kansenamwahwihala ih, ahpw Yesica sohte rong ira. Mwuhr, sister ko pwilikihdi ehd en mwenge ni eh wenihmwo. Ahnsou wet, erein ara onop, e sengiseng pwehki e tehkada me e pohnsehsehla sapwellimen Koht pasapeng ong eh kapakapo. Ahpw Yesica uhdahn koasoanehdi teng en papah Siohwa. E sansal me mie imwila mwahu en sister ko ar kadek.​—Ekl. 11:6.

TOUKIHDA PEIN UHK EN IANG WIA DOADOAHK KAN ONG SAPWELLIMEN SIOHWA PWIHN

9, 10. (a) Mehn Israel ko ahneki ahnsou mwahu dah kei en toukihda pein irail? (b) Ni ahl dah kan me brother kan kak sewese mwomwohdiso rahnwet?

⁹ Mahso, mehn Israel kan ahneki ahnsou mwahu tohto en toukihda pein irail. (Eks. 36:2; 1 Kron. 29:5; Neh. 11:2) Rahnwet, ke pil ahneki ahnsou mwahu tohto en toukihda pein omw ahnsou, kepwe, oh omw koahiek en sewese riomw Kristian kan. Ni omw wia met, ke pahn uhdahn peren oh ale kapai tohto.

¹⁰ Mahsen en Koht kangoange ohl akan nan mwomwohdiso en iang Siohwa ketin doadoahk sang ni arail papah meteikan nin duwen sounsawas oh elder kan. (1 Tim. 3:1, 8, 9; 1 Pit. 5:2, 3) Irail kan me wia met kin sewese meteikan ni soangsoangen ahl mwahu kan pil iangahki nan arail kaudok. (Wiewia 6:1-4) Ia duwe, mie pak elder kan peki rehmw ken wia emen me kin sewese tohn mihting de wasahn kihla sawaspen Paipel kan, kihla wasahn kalohk, kamwahwihala soahng kan nan Wasahn Kaudok, de mehkot tohrohr? Brother kan me kin sawas ni ahl pwukat nda me re uhdahn perenki arail wia met.

11. Ia duwen emen sister eh paiekihda eh kompoakepahnkihla irail kan me iang ih doadoahk en kauwada ihmw kan?

¹¹ Irail kan me kin toukihda pein irail en iang doadoahk en kauwada ihmw kin kalapw wiahda kompoakepah kapw kan. Emen sister me adaneki Margie kin iang doadoahk en kauwada Wasahn Kaudok kan erein sounpar 18. Nan doadoahk pwukat, e kin esehla sister pwulopwul kan oh sewese kaiahnehda irail. E nda me doadoahk pwukat wia ahl kaselel ehu ong irail kan me kin toukihda pein irail en kangoange emenemen. (Rom 1:12) Ni eh kin lelohng ahnsou apwal nan eh mour, irail kan me e kompoakepahnkihla nan doadoahk pwukat kin kangoange ih. Mie pak ke iang toukihda pein uhk en iang doadoahk en kauwada ihmw? Mehnda ma ke koahiek de soh, ke kak toukihda pein uhk en wia met.

12. Ia duwen omw kak sawas mwurin kahpwal laud ehu eh wiawi?

¹² Kitail pil kak iang Siohwa ketin doadoahk sang ni atail sewese riatail Kristian kan mwurin kahpwal laud kan me duwehte melimel de rerrer en sahpw ape ar wiawi. Karasepe, kitail kak toukihda mwohni. (Sohn 13:34, 35; Wiewia 11:27-30) Pil ehu ahl me kitail kak sawas iei kamwakele de kamwahwihala soahng kan me ohkihla kahpwal laud kan. Gabriela, sister men sang Poland me imweo uhdahn ohkihla lapake, kalahnganki eh kilang rie Kristian sang mwomwohdiso kan me karanih ih ar kohdo sewese ih. Ni eh medewehla duwen dahme wiawihong iho, e nda me e sohte pwunodki kepwe ko koaros me e sohla ahneki, ahpw e kin medemedewehte dahme e alehdi. E nda: “Dahme wiawio kamehlelehiong ie me ei iang kisehn mwomwohdisohn Kristian wia pai kaselel tohrohr ehu oh pil kin kahrehiong ie en peren oh nsenamwahu.” Me tohto me ale sawas mwurin kahpwal laud ehu kin nda me re pil ahneki soangen pepehmohte. Oh irail kan me kin iang Siohwa ketin doadoahk pwehn sewese riarail Kristian kan kin uhdahn peren oh nsenamwahuki arail wia met.​—Wadek Wiewia 20:35; 2 Korint 9:6, 7.

13. Ia duwen atail kin kakehlakahda atail limpoak ong Siohwa ni ahnsou me kitail kin toukihda pein kitail? Menlau kihda ehu karasaras.

¹³ Sister men me adaneki Stephanie oh sounkalohk teikan nan eh wasao iang Koht ketin doadoahk sang ni arail sewese Sounkadehde kan me tangasang sapwarailo kohdo Wehin Amerika pwehki mahwen. Re sewese irail pwukat en diarada imwarail oh ale kepwehn nan ihmw. Stephanie nda: “Se mwekidkihda ni at kilang arail peren oh kalahngan ni arail pehm limpoak sang riarail Kristian kan nan sampah pwon. Peneinei ko medewe me kiht me sewese irail, ahpw ni mehlelo, irail me sewese kiht laud.” E pil nda, “Limpoak, miniminpene, lelepek, oh likih Siohwa me se kilang uhdahn kakehlakahda at limpoak ong Siohwa, oh met kahrehiong kiht en uhdahn kalahnganki soahng koaros me se alehdi sang sapwellime pwihn.”

KALAUDEHLA OMW PAPAH SIOHWA

14, 15. (a) Soangen madamadau dah me Aiseia ahneki? (b) Ia duwen Kristian kan ar kak alasang ahn Aiseia elen madamadau?

¹⁴ Ia duwe, ke men kalaudehla omw kin iang Siohwa ketin doadoahk? Ke pahn men keseula wasa kan me anahn laud mie ong sounkalohk? Ei mehlel, kitail sohte anahne keseula wasa doh pwehn papah Siohwa. Ahpw mie ekei riatail Kristian me kak wia met. Arail elen madamadau pil duwehte ahn soukohp Aiseia. Ni Siohwa eh ketin mahsanih: “Ihs me I pahn kadarala, oh ihs me pahn wia atail meninkeder?” Aiseia patohwan sapeng: “Iet ngehi, Maing, komwi ketin poaroneiehla.” (Ais. 6:8) Ke kak oh men sewese sapwellimen Siohwa pwihn? Ia ekei ahl me ke kak sawas?

¹⁵ Sises mahsanih duwen kalohk oh katohnpadahk: “Rahket me laud, ahpw tohndoadoahk kan me malaulau. Ihme kahrehda, kumwail peki rehn Soumas en rahket en ketin poaronehdo tohndoadoahk kan ong sapwellime rahk.” (Mad. 9:37, 38) Ia duwe, ke kak papah nin duwen pioneer men wasa me anahn laud mie ong sounkalohk? De ke kak sewese emen tohrohr en wia met? Riatail Kristian tohto pehm me ahl me keieu mwahu en kasalehda arail limpoak ong Koht oh mehn mparail iei en pioneer wasa kan me anahn laud mie ong sounkalohk. Ke kak medewehda ahl teikan me ke kak kalaudehla omw papah Siohwa? Ma ke wia met, ke uhdahn pahn nsenamwahu.

16, 17. Ahl dah teikan me ke kak kalaudehla omw kin papah Siohwa?

¹⁶ Ke pahn men papah nan Pedel de sewese doadoahk en kauwada ihmw kan, mehnda ma ke doadoahk erein ahnsou kis de pak ehu de tohtohsang nan wihk ehu? Sapwellimen Siohwa pwihn kin ahnsou koaros anahne aramas akan me men papah wasa sohte lipilipil me anahn mie oh pahn men wia sohte lipilipil dahme meteikan ndaiong irail mehnda ma re ahneki koahiek nan ehu soangen doadoahk tohrohr. Siohwa ketin kesempwalki koaros me kin men wiahda tounmetei kan oh papah wasa sohte lipilipil me anahne mi ie.​—Mel. 110:3.

¹⁷ Ke pahn men ale kaiahn laud pwe ken kak kalaudehla omw kin papah Siohwa? Mwein ke kak audehda doaropwe pwehn iang Sukuhl ong Sounkalohki Wehio kan. Sukuhl wet kin kaiahnehda brother oh sister koahiek kan me kin doadoahngki pali laud en arail ahnsou ong papah Siohwa pwe sapwellimen Siohwa pwihn en kak doadoahngki irail en wia soahng kan me laudsang dahme re kin wia mwoweo. Irail kan me audehda doaropwe pwehn iang sukuhl wet anahne men papah wasa sohte lipilipil me re pekederla ie mwurin arail kesepwil. Ke pahn men isaneki ahnsou mwahu wet en kalaudehla omw kin papah Siohwa?​—1 Kor. 9:23.

18. Kamwahu dah kan me kin kohsang omw iang Siohwa ketin doadoahk ehuehu rahn?

¹⁸ Pwehki kitail wia sapwellimen Siohwa aramas, kitail kin mwahu oh kasalehda sapan, kadek, oh limpoak. Kitail kin nsenohki meteikan rahn koaros. Ni atail wia mepwukat, kitail kin ahneki peren, popohl, oh nsenamwahu. (Kal. 5:22, 23) Sohte lipilipil irair dah ke mi loale, ke pahn nsenamwahu ma ke alasang sapwellimen Siohwa irair en kadek oh wiewiahte emen ienge tohndoadoahk me kesempwal!​—Lep. Pad. 3:9, 10.