Nsenohki Riatail Kristian Kapw kan
1. Dahme kitail anahne wia pwehn ‘wia mwahu’ ong riatail Kristian akan?
1 Nin duwen sapwellimen Siohwa ladu inouda kei, kitail pwukoahki en “wia mwahu ong aramas koaros; ahpw mehlel ong irail kan me kisehn atail pwoson.” (Kal. 6:10) Pwehn wia met kitail anahne wehwehki duwen riatail Kristian kan. Kitail ahneki pwukoa tohto oh pwunod rahn koaros, kahrehda kitail anahne nanti laud pwe kitail en kak kalaudehla atail limpoak en pil pidada me kapw kan pwe ren dehr pehm me aramas sohte kin tehk irail.
2. Dahme kahrehda kitail anahne medemedewe laud duwen dahme me kapw kan ele kin lelohng?
2 Kitail anahne medemedewe laud duwen dahme riatail me kapw kan ele kin lelohng. Ekei mwein mi rehn arail peneinei me sohte pwoson me kin kakete kapailoke oh kaloke irail. Kompoakparail en mahs kan mwein kin uhwong irail. Pwehki soahng pwukat, irail me kapw kan ele pahn kin pahtou oh pehm me irail kin kelekelehpw. Ma kitail ese dahme irail kin lelohng, kitail pahn kak kangoange irail oh kahrehiong ren pehm me aramas kin anahne oh kalahnganki irail.
3. Mwurin atail kin medemedewe mahsen en Sises kan nan Mark 10:29, 30, soangen peidek dah kan kitail kak pein idek rehtail?
3 Sises Krais mahsanihki irail kan me wiahla sapwellime tohnpadahk: “Mehmen me pahn mweidala imwe, de rie kan, de ine de seme de nah seri kan, de sapwe, pwehki ngehi oh pil rongamwahu, e pahn ale me laudsang nan mouren dih wet. E pahn ale pahn pak epwiki ni imwe, ni rie kan, ni ine, ni nah kan, nin sapwe.” (Mark 10:29, 30) Pein emenemen kitail kak idek rehtail: I kin kalaudehla ei nsenohki riei Kristian kan pwehn pil pidada me kapw kan, pwe ren pehm me tohtohlahr riarail oh arail pahpa oh nohno oh neirail seri kan? I kin kasamwo irail ong nan imwei duwehte I kin wiahiong ei peneinei? Uwen me I kin kakohng, I kin kalaudehla ei tehk iahd me I pahn sewese irail kan me anahne sawas?
4. Ia duwen kitail kin alasang Koht oh Krais?
4 Mehlel, meteikan sohte pahn mwadang wiahkin uhk riarail me keren, de wiahkin uhk duwehte pahpa de nohno men, de neirail seri kan. Kitail anahne kasalehda me kitail men ren wiahkin kitail met, kaidehn ahnsou koaros kasikasik me irail me pahn kin wia mwahu ong kitail. Kitail en dehr awiawih meteikan en mwekid mahs ahpw kitail alasang Koht oh Krais me kin tiengla mwowe oh kasalehda limpoak ong meteikan. (1 Sohn 4:19) Kitail koaros en kaukaule ‘kihkihwei’ atail ahnsou, kehl, oh kepwe kan. Eri, atail kin kihkihwei pahn kahrehda peren laud sang ni atail kin ale.—Luk 6:38; Wiewia 20:35.