Ihs Me Riatail?

EHU pako, Sounpadahk Lapalapo ketin idek peidek kapwuriamwei ehu. Peidek wet iei: “Ihs me inei? Ihs me riei?” (Madiu 12:48) Ke kak sapeng peidek wet? Mwein ke ese me sapwellimen Sises nohno adaneki Mery. Ahpw ke ese eden rie pwutak ko?— Mie rie serepein?—

Paipel mahsanih me rien Sises pwutak ko adaneki “Seims, Sosep, Saimon, oh Sudas.” Pil mie rien Sises serepein kan me momour ni ahnsou me e kin ketin kalokalohkselio. Pwehki Sises eh ketin wia mesenih, rie ko koaros tikitik sang ih.​—Madiu 13:55, 56; Luk 1:34, 35.

Ia duwe, rien Sises pwutak ko iang wia sapwellime tohnpadahk?— Paipel mahsanih me nin tapio irail “sohte pwoson Sises.” (Sohn 7:5) Ahpw mwuhr, Seims oh Sudas (me pil adaneki Sud) wiahla sapwellime tohnpadahk, oh ira pil iang ntingihdi kisin pwuhk kan en Paipel. Ke ese mehnia pwuhk me ira ntingihdi?— Iei pwuhken Seims oh Sud.

Mendahki eden rien Sises serepein ko sohte kileldi nan Paipel, kitail ese me mie meh riemen de pil tohto sang. Ia duwe, rie serepein ko wiahla sapwellime tohnpadahk?— Paipel sohte mahsanih kahrehda kitail sehse. Ahpw ke ese dahme kahrehda Sises ketin idengki peidek wet, “Ihs me inei? Ihs me riei?”— Eri kita pahn kilang.

Sises ketin padapadahki sapwellime tohnpadahk ko ni ahnsou me aramas emen ndaiong ih: “Komw mwahngih pwe inomwi oh riomwi kei patopato liki, oh men tuhwong komwi.” Eri Sises ketin doadoahngki ahnsou mwahu wet pwehn padahngki mehn kasukuhl kesempwal ehu ni eh ketin wia peidek kapwuriamwei wet: “Ihs me inei? Ihs me riei?” Ih eri ketin kapahla limeo oh idihada sapwellime tohnpadahk ko, mahsanih: “Ien inei oh riei kan!”

Sises eri ketin kasalehda wehwehn sapwellime mahsen, mahsanih: “Pwe me kin kapwaiada kupwur en Semei me ketiket nanleng, iei riei ohl, riei lih, oh inei.” (Madiu 12:47-50) Met kin kasalehda ia uwen Sises eh ketin karanih sapwellime tohnpadahk ko. E ketin padahkihong kitail me sapwellime tohnpadahk ko duwehte uhdahn rie ohl oh lih akan oh pil ine kan.

Ni ahnsowo, pein rien Sises pwutak ko, Seims, Sosep, Saimon oh Sudas sohte kamehlele me Sises iei sapwellimen Koht Ohlo. Irail mwein sohte kamehlele dahme tohnleng Kapriel padahkihong arail nohno. (Luk 1:30-33) Eri mwein irail sohte kin kadek ong Sises. Koaros me kin wia met sohte kin wia uhdahn riatail. Mie me ke ese me kin lemei ong rie pwutak de serepein kan?—

Paipel mahsanih duwen Esau oh Seikop oh duwen Esau eh uhdahn lingeringer oh nda: ‘I pahn kemehla Seikop.’ Ara nohno Repeka uhdahn masepwehkada, ih eri kadarala Seikop pwe Esau en dehr kemehla ih. (Senesis 27:41-46) Ahpw mwurin sounpar tohto, Esau wekila oh ih eri pwoalehdi Seikop oh metik ih.​—Senesis 33:4.

Mwuri, Seikop ahpw nainekihda pwutak 12. Ahpw nein Seikop pwutak laud ko sohte kin poakepoake riarail pwutak tikitik Sosep. Irail kin luwangki ih pwehki arail pahpao kin kesempwalki ih. Irail eri netikihla ih ong soun pwainda lidu kan me wie kohkohlahng Isip. Irail eri ndaiong arail pahpao me mahn lawalo men kemehla Sosep. (Senesis 37:23-36) Met sou inenen suwed?—

Mwuhr rien Sosep pwutak ko peki mahkki dahme re wiahdahro. Sosep eri mahkohng irail. Ke kak kilang duwen Sosep eh duwehte Sises?— Pein sapwellimen Sises wahnpoaron ako tangasang ih ni ahnsou me e ketin lelohng nan apwal. Piter pil kahmahmkihla Sises. Ahpw Sises duwehte Sosep me ketin mahkohng irail koaros.

Pil mie pirien ehu me adaneki Kain oh Eipel. Kitail pil kak sukuhlki mehkot sang rehra. Koht mwahngih mohngiong en Kain me e sohte uhdahn poakohng rie pwutako. Koht eri mahsanihong Kain me e anahne wekidala eh madamadau. Ma Kain uhdahn poakohng Koht, e pahn rong Koht. Ahpw e sohte poakohng Koht. Ehu rahno, Kain ahpw ndaiong Eipel: “Kita kolahng mwemweit nan mohso.” Eipel eri iangada Kain. Ni ara kelehpwla nan mohso, Kain wokiete rieo kemehla.​—Senesis 4:2-8.

Paipel mahsanihong kitail me mie mehn kasukuhl kesempwal ehu me kitail anahne sukuhlki sang met. Ke ese dahkot met?— “Pwe iei met padahk me kumwail rongehr nin tapio: kitail en limpoakpene. Kitail dehr duwehte Kain, me uhdahn kisehn Me Suwedo.” Ihme kahrehda pirien kan anahne poakpene. Irail en dehr duwehte Kain.​—1 Sohn 3:11, 12.

Dahme kahrehda kitail sohte men duwehte Kain?— Pwehki Paipel mahsanih me e “kisehn Me Suwedo,” me iei Sehdan me Tepil. Eri pwehki mwekid en Kain duwehte Tepilo, e duwehte me Tepilo me iei seme.

Ke kilang dahme kahrehda e kesempwal en poakohng riomw kan? Ma ke sohte poakohng irail, nein ihs seri me ke kin alasang?— Nein Tepilo seri kan. Ke sohte men alasang irail, kaidehn?— Eri, ia duwen ahmw pahn kak kadehde me ke men wia sapwellimen Koht seri?— Met sang ni ahmw pahn uhdahn poakohng riomw kan.

Ahpw dahkot limpoak?— Limpoak iei pepehm loal ehu me mi loalatail, me kin kamwakid kitail en men wia me mwahu ong aramas teikan. Kitail kin kasalehda me kitail poakohng meteikan ni atail ahneki pepehm mwahu ong irail oh pil wia me mwahu ong irail. Eri, ihs riatail kan me kitail anahne poakohng?— Tamataman me Sises kin ketin padahngki me irail iei tohnpeneinei en Kristian akan.

Ia uwen eh kesempwal kitail en poakohng riatail Kristian akan?— Paipel mahsanih: ‘Mehmen me kin kailongki rie, ih aramas likamw men; pwe e sohte kak poakohng Koht me e sohte kilang, ma e sohte poakohng rie me pein ih kilikilang.’ (1 Sohn 4:20) Ihme kahrehda kitail sohte kak poakohng ekeite irail akan nan peneinei en Kristian. Kitail anahne poakohng irail koaros. Sises mahsanih: “Pwe ihme aramas koaros pahn esehki me kumwail nei tohnpadahk, ma kumwail pahn limpoakpene.” (Sohn 13:35) Ke kin poakohng riomw kan koaros?— Taman me ma soh, ke sohte kak uhdahn poakohng Koht.

Ia duwen atail kak kasalehda me kitail uhdahn poakohng riatail kan?— Eri, ma kitail uhdahn poakohng irail, kitail sohte pahn pohnsehse irail pwehki atail sohte men koasoiong irail. Kitail pahn kadek ong irail koaros. Kitail pahn ahnsou koaros wia mwahu ong irail oh ehukihong irail soahng kan. Oh ma irail kin lelohng nan apwal, kitail pahn kin sewese irail pwehki kitail wia peneinei laud ehu.

Ni atail kin uhdahn poakohng riatail kan koaros, dahme met kin kadehde?— E kadehde me kitail tohnpadahk kan en Sounpadahk Lapalapo, Sises. Kaidehn ih me kitail mwahuki en met?—