Emen Pwutak Mwahu oh Emen Suwed

KILANG Kein oh Eipel. Ira laudlahr. Kein wiahla emen soumwet. E kin padokedi krein kan oh wahn tuhke kan oh soahngen wahn mwetuwel kan me adaneki petstapel.

Eipel wiahlahr emen soun sinsile sihpw. E kin mwahuki apwali kisin sihpw kan. Mwuhri kisin sihpw kan pahn laudla oh wiahla sihpw laud, ihme ansoukis mwuhri Eipel naineki sihpw tohto me e kin apwahpwali.

Rahn ehu Kein oh Eipel wiahda ara kisakis ong Koht. Kein wahdo wahn tuhke kan en ah mwetuwel. Ah Eipel wahdo emen sihpw me keieu kasehlel sang nah sihpw ko. Siohwa uhdahn pwungki kisakis me Eipel wahdo. Ahpw e sohte pwungki kisakis me Kein wahdo. Ke ese dahme kahrehda?

Kaidehn ihte pwehki ahn Eipel kisakis me mwahu sang ahn Kein. Ahpw pil pwehki Eipel uhdahn ohl mwahu men. E limpoak ong Siohwa oh rie ohlo. Ahpw Kein aramas suwed men; e sohte poakong rie.

Ihme Koht padahkiong Kein en wekidla ah wiewia. Ahpw Kein sohte men rong. E inenen mwakar pwehki Koht poakepoake Eipel sang ih. Ihme Kein indaiong Eipel, ‘Kita mwemweitala nan mohso.’ Ni ara kelehpwla wasao, Kein wetih rie ohl Eipel. E wetih ih kehlail oh kamehla ih. Kaidehn met mehkot suwed me Kein wiahda?

Mehndahki Eipel mehla, Koht kin tamataman ih. Eipel me mwahu, oh Siohwa sohte kak manokehla aramas mwahu men duwehte met. Ihme ehu rahn Siohwa pahn kasapahldo Eipel ong mour. Ansouo Eipel sohlahr pahn pwurehng mehla. E pahn kak en kousoan nan sampah kohkohlahte. Kaidehn e pahn wia mehkot mwahu en tuhong aramas duwehte Eipel?

Ahpw Koht sohte kin perenki soahngen aramas duwehte Kein. Ihme kahrehda mwehrin Kein kamehla rieo, Koht kaloke ih oh kausla ih sang wasao ong ehu wasa doh sang rehn ah peneinei. Ni ansou me Kein kohieila pwen mi ekis wasa tohrohr nan sampah, e kahrehda iang ih emen rie lih ko, oh wiahkihla rie liho ah pwoud.

Kadekadeo Kein oh ah pwoud pil naineki seri. Nain Adam Oh Ewa serepein oh pwutak teikan pil pwopwoudla, oh irail pil naineki seri. Ansoukis sohte werei mwuhri aramas eri tohtohla nan sampah. Kitail pahn sukuhliki ekis duen irail.