Mehn Kalimeng Ehu ong Kristian Sounkaweid kan
“DAHME ke lingeringerki oh pohtoutouki?” Ki peidek kadek wet, Siohwa men kamwekid Kain en medemedewe dahme e wia. E sohte ketin idingki Kain en wekila, pwehki Kain ahneki saledek en pilipil. (Kilang Deuderonomi 30:19.) Mendahki met, Siohwa sohte pweiek sang en kasalehda dahme pahn imwikihla en Kain wiewia suwed. E kehkehlingkiohng Kain: “Ma ke sohte wukila pwehn uhd wia dahme mwahu, dihp rasehng mahn lawalo men me nektehn poar pohmw. E men kaunuhkada.”—Senesis 4:6, 7, New World Translation.
E konehng kitail en tehk me ki kaweid kehlail wet, Siohwa sohte ketin wiahki Kain me e solahr kak ale sawas. Ahpw, e padahkihong Kain kapai kan me e pahn ale ma e wekidala ah mour, oh kasalehda ah likih me Kain kak powehdi kahpwal wet ma e pilada en wia met. “Ma ke wia mehkot pwung,” Siohwa mahsanih, “ke pahn pereperen.” E pil kalelepek rehn Kain me pid en Kain lingeringer me kak imwikihla kemehla aramas: “Ke pahn powehdi met?”
Nan rahnwet, elder kan nan mwomwohdisohn Kristian anahne en kahlemengih mehn kalimeng mwahu en Siohwa. Duwen me sansalda nan 2 Timoty 4:2, ekei pak, re anahne “kihda kaweid kehlail,” ni ahr pahn, ni inen, kasalehda dahme pahn imwikihla wiewia suwed en emen. Ni ahnsouwohte, elder kan anahne en “kaweidih.” Lepin lokaiahn Krihk pa·ra·ka·leʹo kin wehwehki “en kangoange.” “Kaweido sohte pahn wiawi pwehn kauwe,” Theological Dictionary of the New Testament koasoia. “Ehu wehwehpe iei kamweit.”
Lepin lokaiahn Krihk ehu me duwehte met iei pa·raʹkle·tos, me kin wehwehki emen sounsawas nan pelien kosonned. Ihme kahrehda, pil ni ahnsou kan me elder kan kin kihda kaweid kehlail inen kan, re anahne tamataman me re wiahte sounsawas kei—kaidehn imwintihti kei— en meno me anahne kaweid. Duwehte Siohwa, elder kan en ahneki lamalam me aramaso pahn ale kaweido oh pweida ni eh pahn doadoahngki kaweido, oh elder kan pahn kasalehda me re koapworopworki me meno me ale kaweid oh kak powehdi kahpwalo.—Pil tehk Kalesia 6:1.
Ahpw ni mehlel, pein nsenen aramaso ma e pahn kapwaiada kaweid kan de soh. (Kalesia 6:5; Pilipai 2:12) Sounkaweid kan ele kak diarada me ekei sohte pahn rong arail kaweid kan, duwehte Kain ah pilada en pohnsowehla kaweid sang rehn pein Sounkapikadao. Ahpw, ni ahnsou me elder kan kin kahlemengih Siohwa, Mehn Kahlemeng unsek ong Kristian sounkaweid kan, re kak ese me re wiahier dahme re anahne wia.