Dahme Kahrehda Ken Wiahda Pein Omw Library?

Ehu kahrepe laud iei pwehki wia pein onop iei mehkot kesempwal ong Sounkadehdehn Siohwa kan. (Sohn 17:3) E wia sawas mwahu ehu en ahneki library nan imwatail pwe kitail en kak wia pein atail roporop, sapengla peidek kan oh kaunopada ong mihting en Kristian kan. Kitail en dehr mwamwahliki kesempwalpen ahneki ehu library nan imwatail me audaudki sawaspen Paipel mwahu kan.

Pil ehu kahrepen atail anahne ahneki ehu library nan imwatail iei pwehki emenemen Kristian anahne “pein wa eh wisik.” (Kal. 6:5) Ni ahnsou me peidek kan kin kohda, e mwahu kitail en kaiahnehda pein kitail en kin mwadang wia mahs pein atail roporop oh kowe eri idek peidek rehn meteikan ma mie anahnepe. Kitail kak kakairada atail koahiek en ese kasawih dahme mwahu de suwed oh wehwehki soahng kan ni atail kin pwerisekiong wia tohnsukuhl en Mahsen en Koht oh doadoahngki mwahu library en imwatail.—Ipru 5:11-14.

Pwe kitail en wehwehkihla mahsen en Koht, kitail anahne sawas en sapwellimen Siohwa manaman oh sawas kan me sapwellime pwihn kin kihda. (Wiewia 8:30, 31) Ehu neitail sawas me keieu kesempwal iei Kahn Iroir. Ehuehu Kahn Iroir pwukat anahne mi nan omw library. Ni atail kin wadek kawehwe kan oh ia duwen atail kak doadoahngki ire kan, kitail pahn kilelehdi mehnia Kahn Iroir oh pali depe limwahn iretikitik kan nan pein neitail Paipel kan pwehn mengei ong kitail en mwadang diar iren sawas kan mwuhr.

Ekei seri kan kin alehdi sawas rehn arail pahpa oh nohno kan ni arail wiahda pein arail library. Met pahn sewese arail anahn akan met oh pil ni ahnsou kohkohdo. Ke kak doadoahngkihte ehu de riau kisin dana ongete sawaspen Paipel kan ong pein omw onop de onop en peneinei. Ni mehlel, ahneki library mwahu ehu nan imwomw iei mehkot kesempwal ong nan imwen Kristian akan.