Pwuhken Pahr​—⁠Pwuhk me Kin Kihda Kangoang Laud

¹ E kin wia kangoang laud ong sapwellimen Koht ladu kan en wadek ripoht kan oh ekspiriens kan me pid sapwellimen Siohwa doa­doahk kapwuriamwei kan. (Sohp 38:4, 7; Lepin Padahk 25:25; Luk 7:22; Wiewia 15:31) Ihme kahrehda, sangete pahr 1927, Pwuhken Pahr en Sounkadehdehn Siohwa kan wiawihda oh pwuhk pwukat kin kihda kangoang laud.

² Ehu ehu Pwuhken Pahr kin koasoia ripoht kangoang kan sang wasa kan nan sampah me pid duwen wiewia oh pweida mwahu en doadoahk en kalohk me Sounkadehdehn Siohwa kan kin wia. Ekspiriens kan me kin kakehlailih atail pwoson kin kasalehda me Siohwa kin kahluwa, pere oh kapaiada sapwellime aramas akan. Pwuhken Pahr kin koasoia duwen irail ohl oh lih kan me eimah oh iaduwen re kohkohsang arail pe­nei­nei kan oh kompoakparail kan pwehn kalohki padahk mehlel sang Pai­pel ong aramas akan nan sahpw laud kan oh pil pali laud en deke kan nan sehd.

³ Pwuhken Pahr kin kamwekid sounwadawad kan en kalaudehla arail papah Koht. Emen me kin perenki wadek Pwuhken Pahr koasoia: “I kin perenki wadek pwuhk wet​—⁠likamwete pwuhko nohn mwotomwot. Dahme I wadek lel met kin wia kangoang laud ong ie. E kin sewese ie en men kalaudehla ahi ahnsoun kalohki Rongamwahu ni ahnsou me I kin wadek duwen dahme meteikan kin wia nan kalohk oh met mendahki kahpwal kan me kin lelohng irail.”

⁴ Ke kin paiekihda laud sang kangoang me kin kohsang Pwuhken Pahr? Ma ke men wia met, nantihong wadek Pwuhken Pahr ahnsou me ke ale. Mwurin ahmw kanekehla pwuhko, erein pahr wet, ke kak kousapahlih dahme ke wadek oh pein ale kangoang oh koasoia ekspiriens kan pwehn kangoange ahmw peneinei.