Anahn Ong​—⁠Onop en Paipel Tohto

¹ Siohwa Koht kin ketin kapaiakihda sapwellime pwihn nan sampah arail tohtohla. Sounpahr en kalohk samwalahro, meh 375,923 papidaisla nan sampah pwon​—⁠me wehwehki tohnpadahk kapw 1,000 samwa ehu ehu rahn, de mpen meh 43 awa koaros! Mendahki erein sounpahr eisek samwa me riatail Kristian kan nan sampah kin lellong kalokolok, doadoahk en Wehio kin wie pweida oh me tohto kin iangala padahk mehlel. Ia uwen kaperen en wadek duwen deilahn kaparekiseli rongamwahuwo!

² Nan deke kan me mih pahn rahn ohpis en Guam pahr en kalohk samwalahro, kitail pil kilang duwen kekeiradahn sounkalohk oh auxiliary pioneer kan, awahn kalohk, oh nempehn booklet kan, brochure kan, makasihn kan me kohpeseng. Pil mie kekeiradahn irail me papidaisla oh pil tohtohn me iang towehda Katamano. Iaduwen return visit kan oh Bible study kan? Return visit oh Bible study kan wie malaulaula. Ahpw, ih wiepen kalohk pwukat me kin katohnpadahki aramas. Dahme emen emen kitail kak wia pwehn kapwungala de katohtohla return visit kan oh Bible study kan?

³ Kakehlailla Ineng en Wia ehu Onop: Pein kitail anahne nantiong en kehlail oh pwerisek ni pali ngehn. Sapwellimen Krais sounidawehn lelepek kan kin “ngoangki doadoahk mwahu.” (Taitus 2:​14) Ni atail kin kousapahlih atail kalohk, kitail kak nda me kitail uhdahn inengieng pwurala rehn irail kan koaros me kitail pwilikihdi rehrail pwuhk kan? Kitail kin ngoangki wia onop en Paipel ong irail kan koaros me perenki rong? (Rom 12:11) De kitail anahne kekeirada ineng laud en wia return visit oh tepiada onop en Paipel?

⁴ Pein wadek Paipel, iang towehda mihding kaukaule, oh onopki pwuhk kan pahn kakehle kitail ni pali ngehn oh ngehnin Koht. (Episos 3:​16-​19) Met pahn kakehle atail pwoson oh koapworopworki Siohwa oh kakehle atail limpoak ong iengetail aramas teikan. Kitail pahn mwekidki padahkihong emen tohrohr padahk mehlel, oh wiahkihla atail kalohk en kaperen, pweida mwahu, oh pahn kamwekidada aramas kan. Ehi, kitail men wia onop en Paipel tohto!

⁵ Onop Rehn Peneinei Mahs: Pahpa oh nohno Kristian kan me neirail seri kan koukousoante rehrail anahne en nsenohki arail koasoandi en onop en Paipel kaukaule nin duwen peneinei ehu. (Deud. 31:12; Melkahka 148:12, 13; Lepin Padahk 22:6) E inenen katapan ong pahpa oh nohno kan en onopki ong neirail seri kan brochure Kupwurki oh mwuri pwuhko Mour Kohkohlahte pwehn kaunopada irail pwe ren kak wiahla sounkalohk me saikinte papidais oh ong inou oh papidais. Ni mehlel, re pil anahne onopki ekei ire kan, me pahn poahsoanda pohn anahn oh sounpahr en serio. Pahpa oh nohno men me kin onop rehn seri men me saik papidais pahn wadeki onopo, ehu onop, oh awahn onop, oh pwurehng pwurala, duwen me sansalda nan Atail Doadoahk Ong Wehio en April 1987 nan Kopwahn Peidek.

⁶ Kamwahuiala Pein Ahmw Koasoandi: Ni atail tehk duwen nempehn makasihn kan, brochure kan, oh pwuhk kan me pwildi rehn aramas kan, ni mehlel wahr tohto me kamwermwerdi. Wahr en padahk mehlel pwukat me kamwerimwerdi kak kapwarehda tohnpadahk kapw kan. Ahpw soumwet men de sounmwetuwel men kak uhdahn nsenamwahu ma e kaukaule padokedi oh mwurin ah nannanti koaros sohte kin dolung? Soh. Me duwehte met, pwurehng pwurala me kesempwal.

⁷ Ke kin kaukaule koasoanehdi ahnsoun pwurehng pwurala? Anahne ken mwadang pwurala rehn irail kan koaros me men rong. Pwurehng pwurala pwehn tepiada ehu onop en Paipel. Mie noumw rekord me ke kolokol me soana mwahu oh kapw, oh sohte ping me ke kin ntingihong eden irail kan me ke pwurehng pwurala rehrail? Iangahkihte eden aramaso oh nah adres, en pil kileledi rahno me ke tepin tuhwong, oh pwuhk kan me ke pwilikihdi reh, oh pil kileledi ni mwotomwot dahme kumwa koasoiapene, oh ire ehu me kumwa kak koasoia mwurin omw pwurodo. Wiahda wasakis nan noumw rekord me ke pahn kapataiong ire teikan mwurin ehu ehu ahnsou me ke pwurehng pwurala reh.

⁸ Kasawih Iaduwen en Pwurehng Pwurala: Ia ekei ire kan en tamataman ni omw pwurehng pwurala rehn emen me men rong? (1) En kasalehda limpoak, peren ong aramaso, ngoangki. (2) Koasoia oaralap kan de peidek kan me e perenki. (3) Ahmw padahk en mengei oh poahsoanda pohn Pwuhk Sarawi. (4) Ni ehu ehu ahnsou kan me ke pwurehng pwurala reh, nantiong en padahkihong tohnihmwo mehkot me e pahn pohnese me pahn pein katapan ong ih. (5) Koasoia oaralap ehu me e pahn kasikasik ahnsou me ke pahn pwurodo mwuhr. (6) Dehr mihmi rehn aramaso ahnsou werei. (7) Dehr idek peidek kan me pahn kanamenekihla tohnihmwo. (8) Doadoahngki loalokong pwehn dehr kadeik lamalam sapwung de tiahk sapwung en tohnihmwo mwohn e kekeirada ah kalahngan ni pali ngehn.​—⁠Kilang doaropwehn Atail Doadoahk Ong Wehio en May 1997 ong ekei sawas kan ong iaduwen en pweida mwahu ni omw pwurehng pwurala rehn mehteikan oh tepiada onop en Paipel kan.

⁹ Kasawih Wiepe Koaros: Nan ehu mwomwohdiso, tohn mwomwohdiso kin kak alehda eden irail kan me kin kousoan nan ihmw (high-security) oh nempehn arail pere kan. Re kin ntingihda kisin likou kan ong emen emen tohn pere ko, oh re kin kapataiong nan kisin likouwo tract riau. Ni kaimwseklahn kisin likouwo, re kin idek ma tohn pereo men onop Paipel nan imweo oh re kin kapataiong nempehn telephone en wasao pwe aramaso me ale kisin likou en sapeng ma e pwung. Erein rahn keite, emen ohl pwulopwul dengwado me e men onop. Emen pwurehng pwurela reh mwurin rahno, oh e tepiada onopki pwuhken Knowledge. Pwongohte e towehda Onop en Pwuhk en Mwomwohdiso, oh e pousehlahte towehda mihding kan koaros. Ni ahnsou mwadang, e tepiada wadek Paipel rahn koaros oh wie kekeirada pwehn papidaisla.

¹⁰ Ekei sounkalohk kan me koasoanehdi ren dake sidohsa pwoat pwehn pwurehng pwurala rehn irail kan me re tuhwongehr me perenki rong. Ni ahnsou me emen sister pwurehng pwurala rehn emen aramaso, aramaso sohte mih nan ihmwo, ahpw emen lih pwulopwul me sapeng sistero, oh koasoia: “I kin awiawih uhk.” Lih menet aleiehr pwuhken Knowledge mwowe sang rehn emen me e tuhwong. Ni ahnsou me sister ko kohla ni imweo, e wadeklahr pwuhko pak riau oh inenen perenki audepe. Liho koasoia me e sohte pwuriamweiki en Sounkadehde ko kohla reh rahno pwehki e kin wie kapakapki me ren kohdo oh onop Paipel reh. Ehu onop en Paipel tepiada reh, oh e tepiada towehda mihding en mwomwohdiso kan, oh e wia kekeirada mwadang.

¹¹ Emen sister, me papidaisla kerenieng sounpahr 25 samwalahro, ni ahnsou keren kihong ah nohno ehu pwuhken Knowledge. Ah nohno, me wia emen tohn sarawi, tepiada wadek pwuhko. Mwurin ah kanekehla wadek oaralap riau, e likwerih nah serepeino oh serepeino pwuriamweiki ah koasoia: “I men wiahla emen Sounkadehdehn Siohwa!” En sistero nohno eri tepiada onop oh ahnsouwet papidaislahr.

¹² Song Iren Sawas Pwukat: Mie pak me ke doadoahngki wiepen tepiada onop en Paipel me ni ahmw tepin tuhwong aramaso, ke pahn mwadangete padahkihong ma e men onop? Ke kak ndahte: “Ma ke men onop Paipel ni soh isepe, I kak kasalehong uhk ni minit keite iaduwen met kin wiawi. Ma ke perenki, ke kak pousehlahte.” Aramas tohto sohte kin pweiek en pwungki koasoandi wet, oh re kin men kilang kamwomwada en ehu onop en Paipel.

¹³ Nan tepin amwa onop, kasalehong tohnsukuhlo iaduwen en kaunopada mwowe ong onopo ni ah pahn wadek iren Pwuhk Sarawi kan me kileledi oh lainihla pahn lepin lokaia kan me sapengla peideko nan kilekilel. Koasoiahte mouren iren padahko. Mendahki atail anahne materek tepin atail onop, e kesempwal me onop en Paipel ehu en wiawi kaukaule. Tamataman iaduwen ke pahn kapidelong kapakap me e wia kisehn ire kesempwal en onopo oh iaduwen ke pahn doadoahngki iren Pwuhk Sarawi kan pwehn kaunopada tohnsukuhlo ong uhwong kan. Wia onopo ni ahl ehu me kaperen!

¹⁴ Ni mehlel, kaidehn tohnsukuhl en Paipel koaros kin wia soahngen kekeirada mwadang tehieu. Ekei sohte kin ahneki lamalam ngehnin oh sohte kak mwadang koledi mehkan me re sukuhliki duwehte mehteikan. Mouren ekei me inenen kedirepw oh sohte kak ahneki ahnsou laud en onopkihla irelaud ehu pwon ehu ehu wihk. Ihme kahrehda, nan ekei irair e pahn konehng en wia onop tohtohsang ehu pwehn onopkihla ekei oaralap kan oh pil sounpwong kilang pahn mahs tepikihda onopki brochure Kupwurki oh mwuri keseulahng nan pwuhken Mour Kohkohlahte. Met, oh pil patohng arail towehda mihding en mwomwohdiso, pahn sewese emen emen tohnsukuhl en poahsoandi teng nan padahk mehlel.

¹⁵ Mwohn mehkoaros, kapakapki ehu onop en Paipel! (1 Sohn 3:​22) Ehu ekspiriens me keieu katepe ong Kristian men iei Siohwa en doadoahngki ih pwehn sewese emen en wiahla tohnpadahk en Sises Krais. (Wiewia 20:35; 1 Korint 3:​6-9; 1 Deselonika 2:8) Met iei ahnsoun kasalehda ngoangki doadoahk en onop Paipel rehn mehteikan, oh uhdahn likih sapwellimen Siohwa kapai pohn atail nannanti en tepiada onop en Paipel tohto!

[Blurb]

Komw kin kapakapki en tepiada ehu onop en Paipel kapw?