Kitail en Wia Sounpadahk kan, Kaidehn Ihte Sounkalohk kei
1 Aramas kan kin kilang me “Sounkadehdehn Siohwa kan wiaier arail kadehde lelohngehr ni irepen sampah.” Dahme met kin pweikihda? Kaidehn pwehki kehl de manaman en aramas, ahpw pwehki ngehnin Koht ah kin kamwekidada sapwellime ladu kan ni ahr kin doadoahngki soangsoangen sawas kan pwehn kapwaiada arail pwukoahn kalohk oh katohnpadahk.—Sekaraia 4:6; Wiewia 1:8.
2 Pwuhk kan kin wia ahl lipwalipw ehu en kapwaiada atail doadoahk en kalohk. Erein sounpahr kan me dower powe, pwuhk, booklet, brochure, makasihn, oh tract lik kei me Sounkadehdehn Siohwa kan wiahda oh kihpeseng pwehn sewese kadehde rongamwahu en Wehio. Ripoht sang nan 1997 Yearbook kasalehda me wiawihdahn pwuhk kan me inenen tohtohsang mahso. Sang mahs leledo nan ahnsouwet, pohnangin kopi rar 91 en New World Translation me ntingda. Nan sounpahr ehu nempehn Watchtower oh Awake! me ntingda nan United States keirkihda persent 71. Nan Sehmen, tohtohlahn wiawihdahn makasihn keirkihda persent 35. Pohnangin makasihn silikis ehu me wiawihda wasaht kin ntingda ong mehn Russia.
3 Dahme kahrehda kitail anahnehki uwen tohtohn pwuhk pwukat? Nan sampah pwon, me tohto mwekideki kangoang me kohwong kitail en kadehde ong aramas wasa soh lipilipil ie me re kak diarekda. Pwehki tohtohn kitail kin kalaudehla atail doadoahk en kadehde—ni wehi pokon, pohn ahl akan, nan wasahn pisnes kan—pwuhk kan, booklet kan, brochure kan, makasihn kan oh tract tohto kin kohieng aramas kan me perenki wadek. Pali moron en aramas pwukat saikinte rong rongen Wehio mahso. Pwehn apwaliala anahn wet, mwomwohdiso kin kolokol soangsoangen pwuhk kan me re kak doadoahngki nan soahngen wiepen kalohk koaros.
4 Ia Atail Mehn Akadei ni Atail Kihla Pwuhk kan? Atail mehn akadei kaidehn ihte pwehn kihla pwuhk kan. Kehkehlik en katohnpadahk kin pidada ire riau—kalohk oh padahk. Keieu, kitail ahneki kapai en kalohki rongamwahu en Wehio, oh kehsehki aramas me Wehi wet ihte koapwoaroapwoar ong tohnsampah. (Madiu 10:7; 24:14) Neitail pwuhk kan me poahsoanda pohn Paipel kin wia ahl ehu me kadoadoahk sangete mahs oh lipwalipw en kamwekidada mehteikan en men rong oh padahkiwei loalokong duwen Wehio ong mehteikan.
5 Keriau, ma kitail pahn katohnpadahki mehteikan, kitail anahne padahki soahng kan koaros me Sises kehkehlingki. (Madiu 11:1; 28:19, 20) Pwuhk kan kin kesempwal ni atail kin doadoahngki en padokedi padahk mehlel nan mongiong en irail kan me kin onop Paipel, oh sewese irail en wiahla tohnpadahk kan.
6 Irail ko me kin ale pwuhk kan ele pahn ‘rong mahseno,’ ahpw re sohte pahn kak kapwaiada ma sohte me sewese irail. (Seims 1:22-25) Me malaulau pahn wiahla tohnpadahk ihte ma emen sewese irail. (Wiewia 8:30, 31) Re anahne emen sounpadahk en sewese irail kadehde ong pein irail padahk mehlel me diarekda nan Pwuhk Sarawi. (Wiewia 17:2, 3) Atail mehn akadei iei en sewese irail kekeirada lau re inoukihda arail mour oh papidaisla oh en kaiahne irailda pwe re koahiekla pwe ren pil kak padahki mehteikan.—2 Tim. 2:2.
7 Anahn Keieu Laud iei Sounpadahk Tohto: Ni ahnsou me kitail kin kalohk, kitail kin wia kadehde ong wehi pokon. Ahpw, padahk kin pidada kaweidih aramaso en kekeirada. Nin doken kalohk kin karehong mehteikan en pohnese duwen rong en Wehio, padahk kin sewese aramas kan en pwungkihla rongamwahuwo oh kapwaiada. (Luk 8:15) Sounpadahk men kin wia laud sang ihte pakairki; e kin kawehwe, doadoahngki mwahu iren Paipel kan pwehn kamwekid lamalam en aramaso, oh kihda mehn kadehde kan, oh kin kamwekidada mehteio en kamehlele.
8 Uwen tohtohn kitail anahne wia sounpadahk kan, kaidehn wiahte sounkalohk. (Ipru 5:12a) Kihla pwuhk kan kin wia mehkot kesempwal nan atail doadoahk, ahpw kapwaiada pali keriau en atail mehn akadei en atail kalohk kin poahsoanda pohn dahme kitail wia nin duwen sounpadahk kan. Mendahki atail kin perenkihda atail kak kihla pwuhk kan, pwehn kak kapwaiada douluhl atail kalohk, kitail en dehr kilangwohng kihla pwuhk kan me iei ihte atail mehn akadei. (2 Tim. 4:5) Kihla pwuhk kan kin wia ahl lipwalipw ehu en ritingada ahnsou mwahu kan en padahkihong mehteikan padahk mehlel.
9 Pwurehng Pwurala Rehn Mehteikan Pwehn Tepiada Onop en Paipel kan: Kitail koaros ele kihlaier pwuhk, brochure oh makasihn tohto, oh ntingihdaier eden irail kan me kitail pahn pwurehng pwurala rehrail. Kitail anahne koasoanehdi ahnsou me kitail pahn ahnsou koaros pwurehng pwurala pwehn kamwekid irail en men rong. Kahrepe keieu me kitail kin pwurkihla rehrail kaidehn ihte en pwilikihdi pil ekei pwuhk kan ahpw en kangoange aramas kan en wadek oh paiekihda pwuhk pwukat me re aleier. Ia uwen pein kitail pahn kekeirada ni pali ngehn ma sohte me kin pwurepwure kitail pwehn sewese kitail alehda loalokong pwung?—Sohn 17:3.
10 Kitail en pwurehng pwurala rehn irail kan me men rong pwehn tepiada ehu onop en Paipel nan brochure Dahme Koht Kupwurki Kitail en Wia? de nan pwuhken Ke Kak Mour Kohkohlahte Nan Paradais Nin Sampah. Pwuhk riau pwukat kin koasoia rongen Wehio ni ahl ehu me mengei en wehwehki. Brochureo Kupwurki kin audaudki padahk mengei kan en Paipel. Pwuhken Mour Kohkohlahte kin kamengei ong emen en padahki padahk mehlel ni oaretik, ahpw ni ahnsouwohte ni ahl ehu me mengei, sansal oh mwotomwot.
11 Koasoandi en padahk mengei wet kin kamengeila ong sounpadahko en kihda kaiahn oh kamengei ong tohnsukuhlo en sukuhlki. Kousapahlih wiepen padahk kan me kin mie lipwe. Tamataman iaduwen ke kasalehda uhdahn nsenohki aramaso, ia uwen reirei en oaralap me kumwa pahn onopki nan ehu onop, oh iaduwen omw pahn apwaliala peidek kan me sohte kin doake oaralap me kumwa onopki, oh iaduwen sounpadahko oh tohnsukuhlo kak kaunopada mwowe ong ara onop, oh iaduwen en kahluwa tohnsukuhlo ong pwihn en Siohwa. Ni atail wia mehpwukat, tohtohn kitail, iangahki me kapw akan pahn kak wia onop en Paipel ong mehteikan me pahn kin kekeirada.
12 Ripoht duwen Pweida Mwahu Nan Kalohk: Brochure Kupwurki oh pwuhken Mour Kohkohlahte kin wia mehn sawas kesempwal en kamwadangahla wiepen katohnpadahk. Ni ah alehdi brochure Kupwurki, emen brother nan Bolivia mwadangete doadoahngki pwehn tepiada ehu onop rehn emen ohl. Sounpwong pahieu mwuri, ni Kapokon en District, ohl menet iang kisehn irail peren kan me papidaisla!
13 Me tohto kin mwekidki inoukihda arail mour ong Siohwa mwurin arail kanekehla arail onopki pwuhken Mour Kohkohlahte. Nan ehu mwomwohdiso nan Angola, nempehn onop en Paipel kan me sounkalohk kan kin wiaihong mehteikan keirada sang meh 190 lel meh 260 oh tohtohn me iang towehda mihding tohtohla pak riau sang 180 lel 360 nan erein sounpwong pahieute. Mwurinte met, e pil konehng en wiahda ehu mwomwohdiso.
14 Mwurin ah tepiada ah tepin onop en pwuhken Mour Kohkohlahte, emen brother koasoia me wia onop kin “mengei ma aramaso me wia onopo kin kalelepek peidek kan, oh wadek iren Pwuhk Sarawi kan me kin kadoadoahkong met, oh kilang me tohnsukuhlo kin wehwehki.” Mendahki ahnsou koaros e kin medemedewe me sounkalohk koahiek kante me kak wia onop en Paipel me pahn kekeirada oh me e sohte kak wia met, e wehwehkihda me e kak wia met, oh e koasoia: “Ma I kak wia, eri koaros pil kak wia.”
15 Wia onop en Paipel kan nin duwen kisehn atail doadoahkpen kalohk iei me kitail kapwaiada atail mehn akadei en katohnpadahk. Irail ko me kekeirada koahiek en iang kisehn pali wet en kalohk kin diarada me e inenen kansenamwahu oh wia kating laud. Paipel en pil koasoiakin kitail me kitail pil kin “kalohki Wehin Koht . . . oh padahki mehkan me pid Kaun Sises Krais ki saledek en koasoi.”—Wiewia 28:31.