Sapwellimen Siohwa Ngehn Sarawi Ieiang Kitail
1 Nin duwen Sounkadehde kan en Siohwa, kitail pwukoahki doadoahk kesempwal ieu. Sises mahsanih: “Pwe rongamwahwo uhdahn pahn lohkseli mahs nan wehi koaros.” (Mark 13:10) Ma emen pahn medemedewe me doadoahk wet kohsang ni kehl en aramas, e pahn nda me doadoahk wet sohte pahn pweida, ahpw soh. Pwehki manaman me keieu kehlail nanleng oh sampah kin ieiang kitail—iei sapwellimen Siohwa ngehn sarawi.—Madiu 19:26.
2 Mehn Kadehde Ni Keieun Senturi: Sises kasalehda me kokohp en Aiseia pweida reh ni e mahsanih: “Ngenen Kauno [Siohwa] ketier rehi, e ketin keieiehdier pwe I en kapahrengki . . . rongamwahu.” (Luk 4:17, 18) Mwohn e kohdala nanleng, e padahkiong sapwellime wahnpoaron kan me ngehn sarawi pahn kakehle irail pwehn kak wia kadehde “lelohng ni irepen sampah.” Kedekedeo, ngehn sarawi kamwekid Pilip en kalohk ong ohlen Idiopia me kin apwahpwalih wasahn nekinek en lih nanmwarkien Idiopia, oh ngehn sarawi kamwekid Piter en kalohk ong emen me iang sounpei en mehn Rom, oh ngehn sarawi pil kamwekid Pohl oh Parnapas en kalohk ong wehin Mehn Liki kan. Ihs me lemeleme me soangsoangen aramas pwukat pahn mwekidki padahk mehlel? Ahpw, e uhdahn wiawi.—Wiewia 1:8; 8:29-38; 10:19, 20, 44-48; 13:2-4, 46-48.
3 Mehn Kadehde en Rahnwet: Pwuhken Kaudiahl kin kasalehda me Siohwa kin kadarodo sapwellime ngehn sarawi pwehn sewesehda doadoahk en kalohk en rahnwet oh met sansal sang dahme ntingihdi: “Ngehn Sarawi oh Lih Kamwohdo mahsanih: ‘Kohdo!’ . . . Mehmen me men ale pilen komour nin duwen kisakis ehu, en ale.” (Kaudiahl 22:17) Ngehn sarawi kin kamwekid sapwellimen Krais pwihnen lih kamwohd oh pil “sihpw teikan” en kalohki rongamwahu ong aramas koaros. (Sohn 10:16) Kitail en eimah ahnsou me kitail kalohk ong aramas, kitail en ngoangki tuhwong aramas koaros pwehki kitail wehwehki me sapwellimen Siohwa ngehn sarawi kin ieiang kitail. Pwuhken pahr en 1998 (1998 Yearbook) kin kihda karasepe tohto me kin kasalehda ni sansal me sapwellimen Siohwa ngehn sarawi kin ieiang sapwellime aramas ahnsou koaros. Tehk iaduwen met kin imwila! Erein pahr en kalohk riauwo me ahpwtehn nek, average en aramas 1,000 papidaisla ehu ehu rahn.
4 Kitail kak nsenamwahu pwe kitail wehwehki me sapwellimen Siohwa ngehn sarawi pahn ieiang kitail ni atail wia doadoahk en kalohki Wehio lao Siohwa kileledi me doadoahk wet nekier. Ma kitail pahn tamataman me sapwellimen Siohwa ngehn sarawi ieiang kitail, e pahn wia kangoang laud ong kitail oh e pahn kamwekid kitail en nannanti wia uwen me kitail kak nan doadoahk en kalohki Wehio.—1 Tim. 4:10.