Sapwellimen Koht Manaman Kaweid Tepin Kristian ako oh Kristian en Rahnwet
“Mepwukat koaros [“manaman ehute oh manamanohte,” NW] me kin ketin wiewia.”—1 KOR. 12:11.
1. Dahme kitail pahn sukuhlki nan iren onop wet?
NI PENDEKOS pahr 33 wia rahn ehu me soahng kaperen kei wiawi. Iei rahno me Koht ketin kamwerehdi sapwellime manaman pohn sapwellime ladu ko! (Wiewia 2:1-4) Koht ketin tepida doadoahngki sapwellime manaman pwehn kaweid sapwellime aramas ni ahl kapw ehu. Nan iren onop me kitail sukuhlkiero, kitail onopki duwen mwomwen sapwellimen Koht manaman eh sewese ladu lelepek en mahs ko ren wia doadoahk apwal akan nan sapwellimen Koht doadoahk. Ahpw ia wekpeseng en sapwellimen Koht manaman eh kin kaweid sapwellime ladu kan mwohn mwomwohdisohn Kristian eh miehla oh mwurin mwo? Oh ia duwen Kristian kan arail paiekihda arail kin weweidki sapwellimen Koht manaman rahnwet? Ih mepwukat me kitail pahn sukuhlki nan iren onop wet.
“Iet Sapwellimen Kaun-o Lidu Ngehi”
2. Dahme Mery ese duwen sapwellimen Koht manaman?
2 Ni ahnsou me sapwellimen Koht manaman mweredi nan lapalahn pere ehu nan Serusalem, Mery iang mi wasao. (Wiewia 1:13, 14) Ahpw pil mwohn rahno, ahnsou reirei e eseier me Siohwa kak ketin doadoahngki sapwellime manaman oh wiahda soahng kapwuriamwei kan. Dauliher sounpar 30 mwowe, Siohwa ketin kasauda mour en sapwellime Ohl sang nanleng ong sampah. Siohwa ketin doadoahngki sapwellime manaman en kahrehiong Mery en liseianda mendahki e meipwonte.—Mad. 1:20.
3, 4. Ia ahn Mery pepehm me pid dahme Koht kupwurki en wia? Ia duwen atail kak alasang Mery?
3 Dahme kahrehda Siohwa ketin pilada Mery? Mwurin tohnlengo eh padahkihong Mery me e pahn naitikihada sapwellimen Koht Ohlo, e nda: “Iet sapwellimen Kaun-o lidu ngehi; en wiawihong ie duwen me komwi mahsanih.” (Luk 1:38) Dahme Mery ndao kasalehda soangen aramas dahmen ih. E onopadahr pwehn kapwaiada kupwuren Siohwa ong ih. E sohte idek rehn tohnlengo dahme aramas pahn medewehki eh liseiano de e perki ma Sosep solahr men pwoudiki. Ni eh nda me ih sapwellimen Siohwa ladu, Mery kasalehda me e likih unsek Siohwa.
4 Ekei pak ke kin pehm me e apwal ong uhk ken apwalih omw pwukoa nan sapwellimen Koht doadoahk? Emenemen kitail kak idek rehtail: I kin likih unsek me Siohwa pahn ketin apwalihala soahng kan nin duwen kupwure? I kin uhdahn perenki wia doadoahk kan me Siohwa kupwurki ien wia? Ke kak kamehlele me Koht kin ketikihong sapwellime manaman irail kan me kin likih unsek oh peikiong nin duwen Kaun men.—Wiewia 5:32.
Sapwellimen Koht Manaman Sewese Piter
5. Ia duwen sapwellimen Koht manaman eh sewese Piter mwohn Pendekos pahr 33?
5 Duwehte Mery, wahnpoaron Piter pil iangehr kilang oh kehn doadoahk en sapwellimen Koht manaman mwohn Pendekos pahr 33. Sises ketikihong Piter oh wahnpoaron teiko manaman en kausasang ngehn saut akan rehn aramas. (Mark 3:14-16) Mendahki Paipel sohte nohn padahkihong kitail duwen met, ahpw e mwomwen me Piter doadoahngki manamano. Oh pil ni ahnsou me Sises ketin luke Piter en aluhla reh pohn Sehd en Kalili, manamano sewese Piter en kak wia met. (Wadek Madiu 14:25-29.) Eri e sansal me Piter kak wia soahng kapwuriamwei kan pwehki eh kin likih sawas en sapwellimen Koht manaman. Ahpw mwurin mwo, manamano pahn sewese Piter oh tohnpadahk teiko ren wia soahng kapwuriamwei teikan.
6. Dahme manamano sewesehki Piter en wia erein oh mwurin Pendekos pahr 33?
6 Ni Pendekos pahr 33, sapwellimen Koht manaman kihong Piter oh meteikan koahiek en lokaiahki lokaiahn irail ko me pwarala Serusalem. Mwurin mwo, Piter eri kesihnenda oh tepida koasoiaiong pokono. (Wiewia 2:14-36) Ekei pak Piter kin masepwehk de e sohte kin medemedewe mwohn eh kin wia mehkot. Ahpw mwurin eh alehdi sapwellimen Koht manaman, e eimah kalohk mendahki aramas akan kaloke oh ndaiong en uhdihsang kalohk. (Wiewia 4:18-20, 31) Koht ketin doadoahngki sapwellime manaman pwehn ketikihong Piter soangen loalokong tohrohr ieu. (Wiewia 5:8, 9) Oh manamano pil kihong wahnpoarono manaman en kaiasada aramas emen sang mehla.—Wiewia 9:40.
7. Mehnia sapwellimen Sises padahk kan me Piter wehwehkihda mwurin eh keidi?
7 Mwohn rahn en Pendekos, Piter wehwehki padahk mehlel tohto me Sises ketin padahngki. (Mad. 16:16, 17; Sohn 6:68) Ahpw mie ekei padahk mehlel me Piter wehwehkihla mwurin Pendekoso. Karasepe, Piter sohte wehwehki me Krais pahn iasada nin duwen emen ngehn mwurin kesiluhn rahno oh Wehio pahn mi nanleng. (Sohn 20:6-10; Wiewia 1:6) Piter pil sohte wehwehki me aramas kak kohdahla nanleng oh iang kaunda Wehio nanleng. Mwurin e keikihdi manamano ni Pendekos oh pilipilda en mour nanleng, iei ahnsowo me Piter wehwehkihda sapwellimen Sises padahk pwukat.
8. Soangen loalokong dahieu me me keidi oh sihpw teikan koaros ahneki?
8 Mwurin sapwellimen Sises tohnpadahko arail alehdi sapwellimen Koht manaman, re kakehr wehwehkihda sapwellimen Sises padahk kan me re sohte wehwehki mahs. Sapwellimen Koht manaman me kamwakid sounnting en Palien Pwuhk Sarawi ni Lokaiahn Krihk ren kawehwehda padahk mehlel kaselel kan duwen kupwur en Siohwa. (Ep. 3:8-11, 18) Rahnwet, koaros me keidi oh sihpw teikan kakehr onopki oh wehwehkihla padahk mehlel pwukat. (Sohn 10:16) Ke kin kalahnganki loalokong oh wehwehkilahn sapwellimen Koht Mahsen me manamano kin seweseiuk ken ahneki?
Pohl Direkihla Sapwellimen Koht Manaman
9. Dahme sapwellimen Koht manaman sewese Pohl en wia?
9 Kereniong pahr ehu mwurin Pendekos pahr 33, Sohl, me mwuhr aramas akan uhd kin ekerki Pohl pil keikihdi sapwellimen Koht manaman. Manamano kihong Pohl koahiek en wia soahng kan me kitail pil paiekidahr rahnwet. Karasepe, sapwellimen Koht manaman me kamwakid en ntingihada pwuhk 14 nan Paipel. Duwehte manamano eh sewese Piter, e pil sewese Pohl en wehwehki oh ntingihedi duwen koapworopwor en mour kohkohlahte nanleng. Manamano sewese Pohl en pil kausasang ngehn saut akan rehn aramas akan, kamwahwihala me soumwahu kan oh kaiasada aramas emen sang mehla. Ahpw Pohl pil alehdi manaman en wia doadoahk kesempwalsang mepwukat. Rahnwet sapwellimen Koht ladu kan kin pil alehdi manamano pwehn wia met, mendahki re sohte kin alehdi manamano ni ahl kapwuriamwei.
10. Ia duwen sapwellimen Koht manaman eh sewese Pohl en kak koasoi?
10 Pwehki Pohl eh direkihla manamano, e kahrehda e koasoiong emen imwintihti en kaudok mehlel ni eimah. Sounkaweid en mehn Saiprus men wie rongorong eh koasoi ko koaros. E uhdahn pwungki dahme Pohl koasoia ih eri iangala padahk mehlel. Paipel mahsanih me ohl menet “inenen pwuriamweikihla padahkpen Kaun-o.” (Wiewia 13:8-12) E sansal me Pohl ese me sapwellimen Koht manaman kak kakoahiekihala pwehn koasoia padahk mehlel ni eimah. (Mad. 10:20) Mwuhr e peki rehn mwomwohdisohn Episos ren pousehlahte kapakapki pwehn kak ahneki koahiek en koasoi.—Ep. 6:18-20.
11. Ia duwen sapwellimen Koht manaman eh kaweid Pohl?
11 Sapwellimen Koht manaman kin sewese Pohl en koasoi, a ekei ahnsou e sohte kin mweidohng en koasoi nan ekei wasa. Manamano kaweid Pohl nan eh seiloak en doadoahk en misineri. (Wiewia 13:2; wadek Wiewia 16:6, 7.a) Siohwa pil ketin doadoahngkihte sapwellime manaman pwehn kaweid doadoahk en kalohk rahnwet. Duwehte Pohl, sapwellimen Siohwa ladu peik kan koaros kin wia uwen arail kak pwehn kalohki padahk mehlel ni ngoang oh eimah. Mehnda Koht eh ketin doadoahngki sapwellime manaman en kaweid kitail weksang eh kin ketin kaweid Pohl, kitail kak kamehlele me Siohwa wie ketin doadoahngkihte sapwellime manaman pwehn kin “kainangihedo” me mohngiong mehlel kan ong padahk mehlel.—Sohn 6:44.
“Soangen Koahiek en Doadoahk Tohto”
12-14. Manamano kin kadoadoahk ni ahl ehute rehn sapwellimen Koht ladu koaros? Ia soangen ahl akan me sapwellimen Koht manaman kin doadoahk rehn sapwellime ladu kan?
12 E kin uhdahn kangoange kitail rahnpwukat ni atail kin wadek duwen Siohwa eh ketin kapaiada mwomwohdiso en me keidi kan en tepin Kristian ko. Sapwellimen Koht manaman kihong Kristian ko ahnsowo koahiek tohrohr, de “kisakis.” Ni ahnsou me Pohl ntinglahng mwomwohdisohn Korint duwen kisakis pwukat, e koasoia me mie soangen kisakis en manamano tohto, ahpw manamantehieu me kin ketikihda kisakis pwukat. Soangen elen papah Koht tohto mie, ahpw Kauntehmen me aramas kin papah. Soangen koahiek en doadoahk tohto mie, ahpw Koht mehtehmen me kin ketikihong soangen koahiek koaros aramas koaros. (1 Kor. 12:4-6, 11) Pohl koasoia me manamano kak doadoahk rehn emenemen sapwellimen Koht ladu kan ong ni soangsoangen kahrepe kan. Manamano kin kaweid pwihn tikitik oh sihpw teikan koaros. (Luk 12:32; Sohn 10:16) Ahpw e sohte kin doadoahk ni ahlohte rehn emenemen tohnmwomwohdiso.
13 Karasepe, elder kan kin idihda sang ni manamano. (Wiewia 20:28) Ahpw kaidehn Kristian koaros me keikihdi sapwellimen Koht manaman kin papah nin duwen elder kan nan mwomwohdiso. Met wehwehki me sapwellimen Koht manaman kin doadoahk ni soangsoangen ahl akan rehn emenemen tohnmwomwohdiso.
14 Manamano me kin kamehlelehiong me keidi kan me re pwekpwekda nin duwen sapwellimen Koht seri kei iei manamanohte me Siohwa ketin doadoahngki en kaiasada Sises ong mour nanleng. (Wadek Rom 8:11, 15.) Siohwa ketin doadoahngki manamanohte oh kapikada sampah oh nanleng. (Sen. 1:1-3) Siohwa pil ketin doadoahngki manamanohte oh ketikihong Pesalel koahiek laud en wia doadoahk kesempwal nan impwal sarawio. Manamanohte me pil kihong Samson kehl me inenen laud pwehn wia soahng kan me sohte aramas emen kak wia, oh e pil sewese Piter en alu pohn sehdo. Eri, en weweidki manamano kin weksang en keikihdi manamano. En keikihdi manamano iei ehu ahl tohrohr me sapwellimen Koht manaman kin kadoadoahk. Koht me ketin pilada irail akan me e ketin keiekihdi sapwellime manaman.
15. Keikihdi sapwellimen Koht manaman pahn wiewiawi kohkohlahte? Dahme kahrehda ih omw pasapeng en men?
15 Manamano kin ahnsou koaros doadoahk rehn sapwellimen Koht ladu lelepek kan ni soangsoangen ahl me wekpeseng. Manamano wie doadoahkehr rehrail erein sounpar kid kei mwohn Koht ketin keiehkihdi aramas akan manaman wet. Keikihdi sapwellimen Koht manaman tepida ni Pendekos pahr 33, ahpw e sohte pahn wiewiawihte kohkohlahte. Mendahki doadoahk en keiehdi aramas pahn uhdi, manamano pahn doulahte doadoahk rehn sapwellimen Koht aramas akan pwehn sewese irail kapwaiada kupwure kohkohlahte.
16. Dahme sapwellimen Siohwa ladu kan kin wiewia rahnpwukat sang ni sawasepen sapwellime manaman?
16 Dahme sapwellimen Siohwa ladu kan kin wiewia met sang ni sawas en sapwellimen Koht manaman? Kaudiahl 22:17 (NW) mahsanih: “Sapwellimen Koht manaman oh lih kamwohdo kin pousehlahte mahmahsanih: ‘Kohdo!’ Oh mehmen me kin rong en pil nda: ‘Kohdo!’ Oh mehmen me men nimpildahr en kohdo; mehmen me men a en ale pilen komour nin duwen kisakis ehu.” Sang ni sawasepen sapwellimen Koht manaman, Kristian akan rahnwet kin luke “mehmen me men nimpildahr” en ale pilen komour. Kristian keidi kan kin tiengla mwowe wia doadoahk wet, oh sihpw teikan pil kin iang irail wia met. Pwihn riau pwukat koaros kin weweidki sapwellimen Koht manaman. Irail koaros kasalehdahr arail inoukihong Siohwa arail mour sang ni arail papidaiskilahr “mwaren Sahm oh Sapwellime oh [“sapwellimen Koht manaman,” NW].” (Mad. 28:19) Oh irail koaros kin kasalehda wahn sapwellimen Koht manaman nan arail mour. (Kal. 5:22, 23) Sang ni sawasepen sapwellimen Koht manaman, re kin wia uwen arail kak koaros pwehn ahneki mour mwakelekel me kin kaperenda Koht.—2 Kor. 7:1; Kaud. 7:9, 14.
Doulahte Peki Sapwellimen Koht Manaman
17. Ia duwen omw kak kasalehda me sapwellimen Koht manaman wie doadoahk rehmw?
17 Eri, sohte lipilipil ma ke ahneki koapworopwor en mour nanleng de sampah, Siohwa pahn ketikihong uhk “manaman lapalap” pwe ken kak lelepek lao lel ni imwi. (2 Kor. 4:7) Aramas akan ele pahn lemeiong uhk de kouruhrkin uhk pwehki doadoahk en kalohk. Ahpw ma ke sohte mweidohng met en kauhdi omw doadoahk en kalohk, ke kin kasalehda me manamano kin wie doadoahk rehmw. Ken tamataman me ma mie me uhwong uhk pwehki Krais, ken pereperen, pwehki sapwellimen Koht manaman wie doadoahk rehmw.—1 Pit. 4:14.
18, 19. Ia duwen Siohwa eh pahn ketin doadoahngki sapwellime manaman en seweseiuk? Dahme ke anahne doulahte wia?
18 Koht kin ketikihong sapwellime manaman irail akan me kin peki reh ni mehlel. E kak kamwahwihala omw koahiek oh kalaudehla omw ineng en wia uwen omw kak koaros en papah ih, ‘pwe Koht kin ketin wie doadoahk loalamwen ahnsou koaros, pwe ke en materek oh kak kapwaiada kupwure.’ Sawasepen manamano patehng omw kin nantihong “kihong irail mahsen en komour” pahn kahrehiong uhk en ‘nantihong doadoahk ni lemmwin oh poadidi.’—Pil. 2:12, 13, 16.
19 Sang ni omw kin likih douluhl sapwellimen Koht manaman, eri nantihong kapwaiada dahme Siohwa kupwurki ken wia, koahiekla oh peki sapwellime sawas. (Seims 1:5) E pahn ketikihong uhk sawas me ke anahne pwehn wehwehki sapwellime Mahsen, dadaur kahpwal kan, oh kalohki rongamwahwo. Sises ketin inoukihda: “Kumwail peki, e ahpw pahn kohieng kumwail; kumwail rapahki, kumwail ahpw pahn diar; kumwail letelet, e ahpw pahn ritidahng kumwail.” (Luk 11:9, 13) Met pil pid pekipeki sapwellimen Koht manaman. Eri doulahte pekipeki met rehn Siohwa pwe ken duwehla sapwellime ladu lelepek koaros me weweidki sapwellime manaman.
[Nting tikitik kan me mi pah]
a Wiewia 16:6, 7 (NW): “Irail eri pil seiloak kotehla sapwen Prikia oh Kalesia pwehki sapwellimen Koht manaman sohte mweidohng irail ren kalohki mahseno nan sapwen Eisia. Ni arail leldilahng Misia, irail pil song en pedolong nan sapwen Pidinia, ahpw ni eh doadoahngki sapwellimen Koht manaman Sises sohte mweidohng irail.”
Ke Kak Kawehwehda?
• Ni ahl dahieu kitail kak alasang Mery oh ale kapai?
• Ia duwen manamano kin kaweid Pohl?
• Ia duwen sapwellimen Koht ladu kan arail kin weweidki manamano rahnwet?
[Blurb nan pali 26]
Manamano kahrehiong Pohl en eimah koasoiong sounwunahni men
[Kilel nan pali 28]
Rahnwet, manamano kin sewese Kristian koaros sohte lipilipil koapworopwor dah re ahneki