Kadehde Sang Ni Tiahk Mwahu
1 Nan koasoandi en rahnwet me kin mweidala soahng koaros en wiawi, me pwulopwul tohto kin kauwehkihla arail mour wini suwed kan, nenek, pelian, oh pepei. Me weksang met, tiahk mwahu en ekei Kristian pwulopwul kan nan mwomwohdisohn Kristian kin kaperen en kilang oh ni mehlel wia mehkot kaselel ong Siohwa. E wia ehu mehn kadehde kehlail me kamwekid mehteikan ong padahk mehlel.—1 Piter 2:12.
2 Ekspiriens tohto kasalehda me tiahk mwahu en Kristian pwulopwul kin wia lipwalipw mwahu ehu ong irail kan me kin kilang met. Ni ah koasoia duwen Sounkadehde pwulopwul men me wia nah tohnsukuhl, emen sounpadahk en sukuhl padahkiong pwihn me e kin sukuhliki me en serepein menet Kohto, Siohwa, iei Koht mehlel. E koasoia met pwehki en serepeino tiahk kin ahnsou koaros kasalehda wahu. Emen sounpadahk ntingwohng Society oh koasoia: “I men kapingakin kumwail me pwulopwul kan nan amwail pelien lamalam . . . Noumwail pwulopwul kan kin uhdahn wia mehn kalimeng mwahu. Re kin wauneki me mah kan, kadek, oh arail likou kan kin soandimwahu. Oh re inenen ese audepen neirail Paipel! Met uhdahn kaudok mehlel!”
3 Emen sounpadahk en sukuhl inenen wadekala tiahk mwahu en emen seri en Sounkadehde me mahki sounpahr isuh me kin iang ah pwihn en tohnsukuhl kan. Sounpadahko kin mwekidki en kisin pwutako irair karakarahk, me karehda en wekisang pwutak teikan. Sounpadahko wadekala en pwutako ah lamalam mehlel ong eh pelien lamalam—pwutako sohte namenengki en weksang mehteikan pwehki dahme e kamehlele. Sounpadahko kak kilang me en kisin pwutako nsenmwakelekel kin kaianda oh me e kak “pilada dahme mwahu oh dahme suwed.” (Ipru 5:14) Kedekedeo, en kisin pwutako nohno mwemweitla rehn sounpadahko, oh ehu onop en Paipel tepiada reh. Kedekedeo, sounpadahko papidaisla oh mwuhr wiahla emen regular pioneer!
4 Emen ohl pwulopwul kin mwekidki tiahk mwahu en emen Sounkadehde nan ah sukuhl. Sounkadehde serepein menet kin inenen weksang mehteikan—e kadek, oh perenki onop, oh ahnsou koaros ah likou kin kasalehda wahu, oh pil, weksang serepein teikan, e sohte kin kalaieng pwutak kan. Ohl pwulopwulo kak kilang me serepeino kin momourki mouren kosonned kan en Paipel. Ohl pwulopwulo kin idek rehn serepeino peidek kan me pid padahk kan en ah pelien lamalam oh kin perenkihda dahme e sukuhlkihdi. E tepida onop, oh mwuri papidaisla, oh kedekedeo iang kisen doadoahk en pioneer oh doadoahk en Bethel.
5 Ma kowe emen Kristian pwulopwul me men wia kadehde ong mehteikan, tehk ahm wiewia ni ahl koaros. Dehr soukautihla ni ahmw poakehla tiahk mweimwei, oh lamalam, oh mouren tiahk en sampah. Wiahda mehn kalimeng ile sang ni ahmw lokaia, likou oh kapwat, kaidehn ihte iang kalohk oh iang towehda mihding kan ahpw pil nan sukuhl oh ni ahnsoun mwemweit. (1 Tim. 4:12) Ke pahn ahneki peren mehlel ni ahnsou me aramas emen pahn perenkihda padahk mehlel pwehki ke ‘mweidohng ahmw marain en sansalda’ sang ni ahmw tiahk mwahu.—Madiu 5:16.