Pwulopwul kan me Kin Lingan Duwehte Marain nin Sampah
1. Iaduwen Paipel kin kasalehda me irail Kristian akan pahn weksang aramas teikan, oh iaduwen mahsen pwukat kin pidada irail me Kristian pwulopwul kan en nan rahnwet?
1 Sises mahsanih ong sapwellime tohnpadahk kan: “Kumwail me kamarainpen sampah.” (Madiu 5:14, 16) Irail pahn duwehte kahnimw ieu me mih pohn dohl me pahn lingan duwehte marain en ketipin, oh met wehwehki me arail marain pahn sansal mwohn aramas koaros. Rahnwet, Kristian pwulopwul tohto kin “lingan duwehte marain nin sampah” pwehki arail tiahk mwakelekel pahn sansal ong aramas, iangahki arail ngoangki kalohkiseli Rongamwahu en Wehin Koht.—Pilipai 2:15; Malakai 3:18.
2. Ia ekei ahl akan me ke kak kalohk ong sounpadahk kan oh iengomw tohnsukuhl akan?
2 Nan Sukuhl: Iaduwen ke kak kalohk nan sukuhl? Ekei pwulopwul kan kin isaneki ahnsou me arail class kan kin koasoiapene oaralap kan me duwehte wini en kasahliel kan, evolution, Holocaust de soangen oaralap teikan. Emen sister wiahda ah ripoht duwen terrorism pwehn kasalehiong tohnsukuhl teikan me Wehin Koht ieite atail koapworopwor mehlel ong ahnsou kohkohdo. Sounpadahko inenen perenkihda ripoht kaselel wet, oh met ritingada ahl en kalohk ong sounpadahk menet ehu rahn.
3. Iaduwen ke kak mweidong ahmw marain en sansal nan sukuhl pwehki ahmw tiahk mwahu oh mwakelekel?
3 Pil ehu ahl en wia kamarainpen sampah iei sang ahmw tiahk mwahu, likou oh kapwat me konehng Kristian kan. (1 Korint 4:9; 1 Timoty 2:9) Ni ahnsou me iengomwail tohnsukuhl akan oh ahmw sounpadahk kan kin kilang ahmw mwekid kan oh lokaia kan kin weksang seri teikan, ekei irail mwein pahn perenki rong padahk mehlel pwehki ahmw tiahk mwakelekel oh ke kak ehukihong irail padahk mehlel kan en Paipel. (1 Piter 2:12; 3:1, 2) Mehlel, en kasalehda tiahk mwakelekel sohte kin mengei, ahpw Siohwa pahn kapaiada kitail ma kitail kasalehda tiahk mwahu oh mwakelekel. (1 Piter 3:16, 17; 4:14) Pwehn sewese meteikan en perenki rong duwen Rongamwahuo, ke kak wadek sawaspen Paipel kan ni ahnsoun kommoal kan de kihdi sawaspen Paipel kan nan wasa me aramas teikan pahn kak kilang oh wadek.
4. Ia ekei kamwahu kan me kin kohsang kalohk ong tohnsukuhl teikan nan sukuhl?
4 En lingalingki marain nan sukuhl kin kakehle ahmw pwoson oh sewese iuk en perenki papah Siohwa. (Seremaia 9:24) E pil kak wia mehn perepe ong uhk. Emen sister koasoia, “Ehu kamwahupen ahi kin koasoiaiong meteikan duwen dahme I kin kamehlele iei met: tohnsukuhl teikan sohte kin idingkihong ie en wia mehkan me kin uhwong Paipel.”
5. (a) Dahme ekei me pwulopwul kin wia pwehn kalaudehla arail ahnsou en iang doadoahk en kalohk? (b) Ia ahmw mehn akadei kan ni pali ngehn?
5 Kalaudehla Ahmw Ahnsou en Iang Doadoahk en Kalohk: Pil ehu ahl me irail me pwulopwul tohto kin wia kamarainpen sampah iei ni ahr kin kalaudehla arail ahnsou en iang doadoahk en kalohk. Mwurin High Sukuhl, emen brother uhd keseula nan ehu wasa me malaulau sounkalohk kan en Wehio. E iang mwomwohdiso ehu me tikitik oh emente elder nan mwomwohdisowo. E ntinglahng emen kompoakepah, oh nda: “I kin inenen perenki wasaht! Doadoahk en kalohk inenen kaperen! Se kak kalohk ong tohnihmw akan minit 20 de reirei sang pwehki aramas pwukat men rong aht padahk kan.” E kapataiong met: “I men irail me pwulopwul kan koaros en wia dahme I wia oh ahneki soangen pepehm me I ahneki met. Sohte mehkot mwahu sang papah Siohwa ni mohngiong unsek.”
6. Dahme kin kahrehong uhk en perenkihda irail me pwulopwul kan nan ahmw mwomwohdiso?
6 Se kin inenen perenki kumwail me pwulopwul kan me kin mweidong amwail marain en sansal nin sampah wet! (1 Deselonika 2:20) Ni amwail kin papah Siohwa ki mohngiong unsek, mour unsek, madamadau oh kehl unsek, kumwail pahn “ale pahn pak epwiki nan ahnsou wet . . . oh nan mour me pahn kohdo, kumwail pahn ale mour soutuk.”—Mark 10:29, 30; 12:30.