Ehu Mwemweit Me Kak Wia Kapai Ehu
1 Sakies perenki Sises lukehdo nan imweo. Oh ia uwen mwemweit wet wiahla kapai ehu!—Luk 19:2-9.
2 Rahnwet, nin duwen Tapwin mwomwohdiso, Sises Krais kin kaweidki elder kan en “apwalih pelin sihpw en Koht.” (1 Piter 5:2, 3; Sohn 21:15-17) Patohngete wia padahk nan mihding kan oh tiengla mwowe nan kalohk, sounapwalih en mwomwohdiso kan kin kihda sawas limpoak kan ong tohnmwomwohdiso. Ihme kahrehda, ekei ahnsou, ele ke kin kilkilangwohng ale sawas kan sang rehn elder kan, nan imwomw, de ni Kingdom Hall, ni amwa kin ehupene kalohk, de ni ahnsou teikan. Komw pahn perki ma elder kan mwemweitdo rehmw? Soh. Arail pwarek uhk sohte kin wehwehki me ke luwet ni irair ehu. Eri, ia kahrepen elder kan kin mwemweitla rehn emen?
3 Pohl mahsanih me e men mwemweitla rehn rie Kristian kan ‘pwehn kilang ia irerail.’ (Wiewia 15:36) Ehi, nin duwen silepe limpoak kan, elder kan kin uhdahn nsenohki Komwi. Re men kihda sawas en pali ngehn me pahn sewese oh kakehle iuk. Soangen epwel wet iei me atail silepen limpoak Siohwa kupwurki emen emen kitail en ahneki.—Esekiel 34:11.
4 Kasamwo en Elder Mwemweit kan: En Pohl akadei ni ah mwemweitla rehn Kristian kan iei en ‘kihong kumwail kapai ehu ong pali ngehn mehn kakehlakai kumwail. Eri, met wehwehki me kitail pahn sawaspene, amwail pwoson en sewese ie, oh ei pwoson en sewesei kumwail.’ (Rom 1:11, 12) Kitail koaros anahne kangoang en pali ngehn ni imwin rahn apwal pwukat, oh kitail anahne sawas en kaukaule tengeteng nan pwoson. Ahmw lamalam en ehi ong mwemweit en elder kan pahn ni mehlel imwikihla ehupenehn kangoang kan nanpwungatail.
5 Kalahnganki kapai tohto kan me kohsang en elder kan doadoahk en mwemweit. Ma mie ire ehu de peidek ehu me koarompwa uhk, tamataman me mie elder kan nan mwomwohdiso pwehn sewese uhk. Dehr pweiek en koasoiaiong irail ire ehu me kin pidada ahmw irair en pali ngehn. Kalahnganki koasoandi limpoak wet sang rehn Siohwa, oh perenkihda kapai kan me soangen mwemweit wet kin wahdo.