Ia Uwen Mwahu En Ahnsou Koaros Iang Towehda Mihding kan!
1 Erein sounpahr tohto ni pali mesehn Iurop, riatail Kristian kompoak tohto kin kainapwdi pwe ren dehr pokonpene. Medewehla arail peren ni ahnsou me kainapwo kohsang oh re kakehr pokonpene ni saledek!
2 Emen sounapwalih en circuit ntingihdi duwen ah mwemweitlahn ehu soangen mwomwohdiso pwukat: “Ni soutik en Ni Are, ni tepin ahi mwemweito, misihn en kakarakarih ihmwo ohla. Likio inenen lemwlemwur, oh uwen lemwlemwur en nan ihmwo mihmi ni dekri 40 (40 degrees Fahrenheit). Riatail kan doadoahngkihte arail sekid kan, kisin pingen likoun tepinwarail kan, oh deipwukuro kan, lisoarop kan oh suht en kopou kan. Sohte me kak idawehn nan neirail Paipel pwehki uwen kopou re sohte kak pak pwuhk kan. Ni ahi kesihnenda pohn staigo likawihte ahi likoun mihding, I uhdahn lemwlemwurla, oh ahnsou koaros me I kin lokaia, I kin kak kilang angin ahi esingek. Ahpw dahme I keieu pwuriamweiki ie me I sohte rongada arail kaulim. Riatail kan koaros koasoia duwen ia uwen kaperen oh mwahu en iang towehda mihding!” Riatail ko sohte lemehda me ren katiasang mihdingo!
3 Ih Duwen Met Atail Pepehm? Kitail kin kesempwalki ahnsou mwahu en pokonpene ni saledek ong atail mihding en ehu ehu wihk? De kilang kin iang mihding kante ma kitail sohte kedirepwe atail irair teikan? Kaukaule iang towehda midhing kan sohte kin mengei oh pahn mie ahnsou kan me pahn mie kahrepe mwahu me kitail sohte towehkihda mihding. Ahpw, endehr manokehla me mie irail kan nanpwungatail me mendahki arail mahla, oh ahneki soumwahu doar kan, oh paliwar sohunsek, oh ahneki koasoandi en doadoahk me kedirepw, oh ahneki pwukoah toutou teikan kin kilang kesempwalpen mihding oh kin kereniong ahnsou koaros iang towehda mihding kan. Ia uwen met kin wia mehn kalimeng mwahu ong kitail en alasang!—Pil tehk Luk 2:37.
4 Kitail en wiahkihla atail tiahk en utungada kaudok mehlel ni atail iang towehda mihding en Kristian kan koaros, me oarepene kisin pwihn en onop en pwuhk kan oh kapokon laud kan. Dahme kahrehda kitail en kesempwalki mihding pwukat? Pwehki met iei kaweid sarawi ehu me kitail en pokonpene. Ahpw pil mie kahrepe kesempwal teikan. Kitail koaros anahne kapai en kaweid sarawi oh sawas en ngehn sarawi, me kitail kin ale ni mihding kan. (Madiu 18:20) Kitail kin kehlailkihda kangoang kan sang rehn emen emen ni atail kin werekiong riatail Kristian kan.—Ipru 10:24, 25.
5 Ni ahnsou me Sises wekila oh linganla, Piter mahsanih: “Sounpadahk, e mwahuwohng kiht en mih wasaht.” (Luk 9:33) Kitail en ahneki soangen pepehm wette on atail mihding en Kristian kan koaros. Mehlel, ia uwen mwahu en ahnsou koaros iang towehda mihding kan!