Kitail Anahne ‘Ngoangki Pwoson Mahsen en Koht’!
1 Aramas rar rar kei kin onop Paipel rehn Sounkadehdehn Siohwa kan. Ma kitail men ale mour soutuk, kitail anahne ‘ngoangki pwoson Mahsen en Koht,’ duwehte aramas 3,000 me kohluhla oh papidaisla ni rahn en Pendekos 33 C.E. (Wiewia 2:41, New World Translation) Met kin kihong kitail pwukoah dahieu rahnwet?
2 Kitail anahne sewese irail me kitail kin onop rehrail en papah Siohwa sang nan mongiongarail. (1 Tim. 4:7-10) Ihme kahrehda, kitail anahne sewese irail en kalaudehla arail kalahnganki sapwellimen Siohwa irair kan ni ahnsou me kitail onop rehrail. Kasalehda pein ahmw pepehm loal kan me pid duwen Koht. Sewese tohnsukuhlo en wiahda nanpwung mwahu rehn Siohwa.
3 Kitail Anahne Sewese Irail me Onop Paipel: Pali moron en aramas, pwehki irail kin tamataman arail mour nan kaudok likamw, re kin itarki soangen kaudok me re pahn doadoahngkihte arail ahnsou tikitik oh re sohte anahne kawikila arail mour. (2 Tim. 3:5) Ihme kahrehda, kitail anahne sewese irail en wehwehki me mourki padahk mehlel kin wehwehki laudsang ihte rong Mahsen en Koht. Re anahne kapwaiada dahme re sukuhliki sang Mahsen en Koht nan arail mour. (Seims 1:22-25) Ma mie tiahk me re kin wia me Koht kupwursuwedki, re anahne wehwehki me pein irail pwukoahki “wiliakapwala” oh wia dahme me pwung pwehn kaperenda Koht. (Wiewia 3:19) Pwehn ale mour soutuk, re anahne ‘nannanti’ oh kesihnenda teng nan padahk mehlel.—Luk 13:24, 25.
4 Ni ahnsou me kitail kin koasoiaiong irail duwen tiahk, kitail kak idek rehn emen emen tohnsukuhl en Paipel duwen dahme pein ih kin medemedewe ong duwen soahng pwukat oh dahme e anahne wia ma e kasawihada me e anahne kawikila eh mour. Kasalehda, ni sansal, me e kin sukuhliki padahk mehlel sang sapwellimen Siohwa pwihn sansal, oh kangoange ih en kaukaule iang towehda mihding koaros.—Ipru 10:25.
5 Atail padahk anahne en lel ong mongiong en tohnsukuhl en Paipel kan. Kitail kin uhdahn perenki kamwekid aramas akan en ngoangki pwoson Mahsen en Koht oh papidaisla!—1 Deselonika 2:13.