Kasalehda Ahmw Nsenohki Mehlel Irail Me Perenki Rong
1 Doadoahk en kalohk me wiawi sampah pwon pahn kereniong sohla wiawi, ahnsou me irail kan me “pohnsehse Koht” pahn kamakamala. (2 Deselonika 1:7-9) Ihme kahrehda, atail nsenohki mehlel mour en aramas kin kamwekid kitail en kalohki Wehin Koht ong aramas koaros me kitail kin tuhwong.—Sepanaia 2:3.
2 Sounpwong koaros, sounkalohk kan kin kalohkihla awa rar rar kei pwehn rapahkihda irail me perenki rong “rongamwahu en mehkot mwahu sang.” (Aiseia 52:7, New World Translation) Pwehki aramas tohto mwekidki atail padahk, aramas tohto ale makasihn pwukat: The Watchtower (lokaiahn Pohnpei: Kahn Iroir) oh Awake! de brochure Dahme Koht Kupwurki Kitail en Wia? Ahmw nsenohki mehlel aramas pwukat pahn kamwekid kitail en nantiong pwurehng pwurala rehn aramas koaros me kin perenki rong.—Lepin Padahk 3:27.
3 Ntingihdi Noumw Rekord Pwung: Ke pahn pweida mwahu ni ahnsou me ke pwurala rehn aramas ma ke pahn ntingihdi noumw rekord en pwung. Ke anahne ntingihdi eden tohnihmw, iawasa e mihmi ie, rahn oh kulohk depe me ke tuhwong, dahme ke pwilikihdi reh, oh oaralap me kumwa koasoia pwehn kak pweida mwahu ni ahmw pwurehng pwurala rehn tohnihmwo. Oh pil, ma ke ntingihdi dahme tohnihmwo nda ahnsou me ke tepin tuhwong ih, ke kak pwurehng koasoi duwen eh madamadau kan ahnsou me ke pwurehng pwurala reh.
4 Mwadang Pwurehng Pwurala Rehn Aramas akan: Aramas depe me ale pwuhk kan de makasihn kan de brochure kan sang uhk sounpwong me ahpwtehn nek me ke songehr en pwurehng pwurala rehrail? De wihkehr depe ke saikinte pwurehng pwurala rehrail? Atail nsenohki mehlel duwen dahme pahn wiawiong aramas ni ahnsou kohkohdo pahn kamwekid kitail en mwadang pwurehng pwurala rehrail, rahnte kei mwurin atail tepin tuhwong irail, pwe irail en kak tamatamante dahme kumwa koasoiapene. Ma ke pahn mwadang pwurehng pwurala rehrail, ke pahn kapwandehla ahn Sehdan nannanti en “kohdo oh kauwehsang irail.”—Mark 4:15.
5 Kaunopada Me Kesempwal: Kaunopada mwahu de soh pahn kahrehda ahmw pahn pweida mwahu de soh. Kaunopada dahme ke pahn nda mwohn ke pwurehng pwurala rehn aramas akan. Atail Doadoahk Ong Wehio en May 1997, pali 8, kin kihda mehn sawas ong dahme kitail kak nda ahnsou me kitail men kihla makasihn kan de brochure Kupwurki. Mwurin mwo, ke pahn kaunopada dahme ke pahn nda ahnsou me ke pwurehng pwurala. Dahme ke pahn ndaiong tohnihmw me kin perenki rong ahnsou me ke pwurehng pwurala? Iaduwen ke kak tepiada onop Paipel reh?
6 Ahnsou me ke pwurehng pwurala rehn aramas me kin perenki rong duwen dahme anahn pwehn kamwakelehda sampah oh wiahla sampah en mwahula, ke kak nda:
◼ “Ni ahnsou me I tuhwong komwi rahn teio, kita pwungkihpene me kamwakel laud anahne wiawi mwohn sampah kak wiahla paradais. Ke lemeleme aramas kak wia met? [Mweidohng tohnihmw en sapeng.] Menlau tehk iren Paipel wet pwe e kin kasalehda dahme kahrehda Koht pahn ketin kauhdi wiewia sapwung en aramas akan.” Wadek Melkahka 37:38. Mwurin mwo, pakalahng Iren Mehn Kasukuhl 5 nan brochure Kupwurki, oh doadoahngki ekei ire kan nan parakrap 4 oh 5 pwehn kasalehda iaduwen Koht pahn kahrehong kokohpo en pweida. Mwurin mwo, ke pahn tepiada onop en Paipel reh ni ahmw pahn doadoahngki brochure.
7 Ma ke koasoia duwen Wehin Koht oh kihla brochure “Kupwurki” ni ahnsou me ke tepin tuhwong aramaso, ni ahnsou me ke pwurehng pwurala, ke kak nda:
◼ “Ni ahnsou me kita tuhpene rahn teio, kita koasoia me Wehin Koht uhdahn koperment ehu me pahn kaunda sampah pwon. Pwuhk Sarawi kin kasalehda me Sises Krais pahn wiahla nanmwarki en Wehin Koht. Ke ese kamwahupen wehi wet oh kaun menet?” Mweidohng tohnihmw en sapeng. Pakalahng iren mehn kasukuhl 6 nan brochure Kupwurki. Doadoahngki ekei ire kan sang nan parakrap 6 oh 7 oh pil karasaras ni pali 13 pwehn kasalehda dahme Wehin Koht pahn wia ong aramas ni ahnsou kohkohdo. Wadek Daniel 2:44, oh ma konehng, kasalehda pwuhken Mour Kohkohlahte oh tepiada onop en Paipel loale.
8 Ma ke diarada emen me kasalehda me e lemeleme me pelien lamalam en sampah kan kin kahrehda kahpwal tohto ong aramas, ke kak nda ahnsou me ke pwurehng pwurala:
◼ “Mie pak me ke medemedewe ma kitail kak ese mehnia pelien lamalam Koht kin pwungki? [Mweidohng en sapeng.] Brochure wet Dahme Koht Kupwurki Kitail en Wia? kin kihda kilel akan me kitail en kak kasawihkihda kaudok mehlel.” Pakalahng iren mehn kasukuhl 13, oh kasalehda ire kesempwal kan nan parakrap 13, oh kasalehda ire kesempwal kan nan parakrap 3 lel 7. Ke kak pousehla oh nda: “Kaidehn ihte e kesempwal en rapahkihda kaudok mehlel, ahpw kitail anahne rapahkihda dahme Koht kupwurki pein kitail en wia.” Wadek Sohn 4:23, 24. Ke kak ndaiong tohnihmwo me ke pahn koasoia duwen oaralapo ni oaritik mwuhr. Pakalahng iren mehn kasukuhl 1 nan brochure, oh wia kamwomwada duwen iaduwen kitail kin onopki brochure.
9 Ni ahnsou me ke pwurehng pwurala rehn emen me kin perenki rong duwen iaduwen peneinei kan kak diarada nsenamwahu, ke kak nda:
◼ “Ni ahnsou me I ahpwtehn tuhwong komwi, I kasalehda duwen dahme anahn pwe peneinei en kak diarada nsenamwahu oh peren, iei en kapwaiada kaweid me diarek nan Mahsen en Koht, Pwuhk Sarawi. Nin duwen kaweid me kin pid anahn kan en peneinei en rahnwet, ke lemeleme me kaweid en nan Pwuhk Sarawi nohn mering de e konehng atail ahnsou?” Mweidohng en sapeng. Kasalehda pwuhken Mour Kohkohlahte. Pakalahng ni pali 15 oh doadoahngki ire kan nan parakrap 18 oh 19 pwehn tepiada onop en Paipel rehn peneinei pwon.
10 Ni atail pahn ntingihdi neitail rekord en kalohk en pwung, oh kaunopada mwahu oh mwadang pwurehng pwurala rehn aramas akan, kitail pahn kasalehda me kitail ahneki limpoak ong aramas teikan me pahn kahrehda ren kak ale kamourparail.—Madiu 22:39; Kalesia 6:10.