Mie Ahmw Mehn Akadei Ni Ahnsou Me Komw Kin Wia Ahmw Doadoahk en Kalohk?
1 Siohwa iei Koht men me kin mie sapwellime mehn akadei. (Aiseia 55:10, 11) Kitail kin ale kangoang en kahlemengih ih. (Episos 5:1) Kitail pil anahne wia met ni ahnsou me kitail kin wia atail doadoahk en kalohk. Eri, peidek wet me konehng: “Mie ahmw mehn akadei ni ahnsou me komw kin wia ahmw doadoahk en kalohk?”
2 Ahmw doadoahk en kalohk ni ihmw lel ihmw, kalohk ahnsou soh lipilipil, oh kihseli pwuhk kan iei kisehn doadoahk katapan ieu. Ahpw, tamanda me atail pwukoah sohte kin pid kalohkte ahpw e kin pil pid katohnpadahk. (Madiu 28:19, 20) Mwurin kitail pahn kamwarak kisin werentuhkehn padahk mehlel en Wehio, kitail anahne pwurala rehrail oh kalamwurehki pihl oh kaukaule apwalih irail, ahpw Koht me kin ketin kakairada tuhkeo. (1 Kor. 3:6) Kitail anahne en nsenohki pwurala rehrail oh tepida onop en Paipel rehrail.
3 Kalaudehla Ahmw Doadoahk en Kalohk: E kin kansenamwahu ni ahnsou me ke pahn medemedewe duwen doadoahk en kalohk me ke wia oh pein koasoia: “I kapwaiada dahme I pilahn en wia.” Nin duwen me ntingihdi nan 2 Timoty 4:5, Pohl kangoangeki: “Kapwaiada omw pwukoa koaros nin duwen me konehng ladun Koht men.” Met kin pidada en kalaudehla ahmw nannanti pwurala rehn aramas akan me kin perenki rong. Nan ahmw schedule en kalohk ni ehuehu wihk, koasoanehdi ehu ahnsou en pwurala rehn aramas akan. Wia ahmw mehn akadei en tepida onop en Paipel rehn irail akan me kin perenki mehkan me pwung. Met en wia ahmw mehn akadei ni ahnsou me ke kin iang kalohk.
4 Idek rehn sounkalohk kan ia arail pepehm akan ni ahnsou me re kilang irail akan me re kin onop Paipel rehrail papidais nan kapokon ehu. Re inenen peren, mwein ahr peren laud duwehte meno me papidaisla. Re kapwaiada mehn akadei kaselel ehu! Emen sounkalohk me pweida mwahu koasoia met: “En katohnpadahk kin wehwehki me aramas akan me kin kapinga Siohwa pahn tohtohla. E kin wehwehki mour ong irail akan me kin rong padahk mehlel. I kin perenki padahkiong aramas teikan padahk mehlel—doadoahk wet inenen kaselel! . . . Aramas tohto me sukuhliki en poakohng Siohwa pil wiahla kompoakepai keren kan.”
5 Medemedewe ahmw kak sewesehda emen en inoukihong Siohwa eh mour! Inenen kaperen met! Doadoahk wet kin pweida pwehki ke kin nantiong en kapwaiada omw mehn akadei.—Kol. 4:17.