Lohkseli Mwaren Siohwa Nan Sampah Pwon
1 Ni en Sises kehkehlikihong sapwellime tohnpadahk kan en kadehde ong aramas akan duwen ih “lelohng ni irepen sampah,” e wiahda mehn kahlemeng mwahu ong irail en idawehn. (Wiewia 1:8) Sohte lipilipil iawasa aramas kin mie, e kin kalohk ong irail oh padahkiong irail duwen kupwuren Koht ong aramas akan. “Ladu lelepek oh loalokong” kin kahlemengih Sises oh re kin doadoahngki ahl tohto pwehn lohkseli mwaren Koht en “lelohng ni irepen sampah.”—Aiseia 12:4, 5.
2 Dahme Wiawi Nan Pahr Samwalahr ako: Nan pahr samwalahr ako, kahpahrek kan kin ntingdi nan nuhspepa kan; “Photo-Drama of Creation” wiawihda oh re kasalehong aramas rar rar kei; re kin doadoahngki sidohsa kan me kin mie mehn lokaia me kin wia kahpahrek kan; oh re pil doadoahngki mehn lokaia kan duwehte “phonograph” ni ahl tohto oh, ahnsoukis, re pil kin wia kahpahrek oh pakair en kahpahrek nan radio—soahng pwukat koaros re kin wia pwehn lohkseli Rongamwahuwo. Ahpw, dahme keieu kesempwal iei atail tuhwong aramas akan pwehn sewese irail ni pali ngehn. Ihme kahrehda, kalohk ni ihmw-lel-ihmw kin wia ahl me keieu mwahu en tuhwong aramas oh lohkseli mwaren Koht wasa koaros nan sampah.—Wiewia 5:42.
3 Dahme Kin Wiawi Nan Rahn Pwukat: Pwehki aramas akan nan rahn pwukat kin kedirepw ahnsou koaros, ihme kahrehda, kitail sohte kak diar aramas akan nan imwarail. Aramas malaulau kin men doadoahngki arail ahnsou en wadawad oh doudouloale soahng ngehnin kan. Ihme kahrehda, kitail anahne tamataman soahng pwukat ni atail pahn kalohk ong aramas akan. Likin atail kaukaule iang doadoahk en ihmw-lel-ihmw, kitail kin ale kangoang en kohla wasa kan me aramas akan kin mie oh en “kaunopada” en kalohk ong irail oh kasalehda atail koapworopwor. (1 Pit. 3:15) Met kin wehwehki me kitail en nantihong kalohk ong iengatail tohndoadoahk kan, iengatail tohnsukuhl kan, aramas akan me kin mihmi nanial oh nan wasahn mwadong oh nan wasahn peidi en sidohsa oh nan sidohwa oh sohte lipilipil wasa me aramas kin mihmi ie. Pwehki Siohwa kin ieiang kitail, kitail kak pweida nan doadoahk en kalohk. Ke kin nantihong tuhwong aramas koaros oh kalohk ong irail?
4 Kitail en nantihong wia uwen me kitail kak en lohkseli mwaren Siohwa wasa koaros me kitail kin tuhwong aramas. Kitail pahn ahneki nsenamwahu ma kitail wia uwen me kitail kak nan doadoahk en kalohk ni atail pahn kilangwong Siohwa en kahrehdohng ih irail me kin ahneki mohngiong mehlel.—Sohn 6:44.