Kowe Emen me Kin Namenek?
1. Ihs me kin namenek?
1 Kitail sohte kin pwuriamwei ma kitail kilang seri men kin rukula nan tihnsewen eh pahpa de nohno oh kin namenek en kilang kitail. Kin mie pepehm en namenek sangete atail tikitik. Pali laud en me laud kan pil kin namenek. Ma ke kin namenek oh met kin kerempwa ahmw doadoahk en kalohk, dahme ke kak wia?
2. Dahme kak sewese emen en powehdi eh namenek?
2 Powehdi Irair en Namenek: E kesempwal en tehk duwen “amwail lingan en mihmi loalamwail.” (1 Pit. 3:4) Kakehlaka ahmw limpoakohng Siohwa oh pil mehn mpomw kan. Ke uhdahn anahne kamehlele me en kapwaiada pwukoa en kalohk iei ehu ahl keieu mwahu en kasalehda limpoak oh tounmetei. Nantihong idawehn koasoandi mwahu kan ong pein omw onop oh pil towehda mihding kan. Kaukaule kapakapki ni oaritik sapwellimen Siohwa sawas. Pwoson kehlail oh likih Koht pahn kakairada atail irair en sohte masepwehk oh pil kin kihong kitail ‘eimah ahnsou koaros ni atail kin padapadahngkiseli mahseno.’—Pil. 1:14.
3. Dahme kahrehda kahlemeng en Timoty wia mehn kangoang ehu ong irail akan me kin nantihong pelianda pepehm en sou itar?
3 Pelianda pepehm en sou itar kan. E sansal me Timoty anahne en wia met. Pohl kin kangoange Timoty en “dehr mweidohng emen en mwamwahlikin uhk pwehki omw pwulopwul,” oh kin katakatamanki ih me “Koht sohte ketikihong kitail irair en masak ahpw e ketikihong kitail kehl.” (1 Tim. 4:12; 2 Tim. 1:7, NW) Siohwa kin ketin doadoahngki Timoty, oh e pil pahn ketin doadoahngki uhk ma ke koapworopworki Ih ni unsek oh nantihong en kekeirda.—Mel. 56:11.
4. Dahme sewese emen sister en powehdi eh irair en masak?
4 En medemedewe ehu iren Paipel me duwehte Madiu 10:37 kin sewese emen sister me kin masak uhwong sang rehn eh pwoud. Ni eh kin nantihongete, doadoahk en kalohk kin mengeila ong ih, oh mwuhr eh pwoud, eh nohno, oh rie pwutak kan koaros alehda padahk mehlel!
5. (a) Dahme irail me kin namenek kak wia pwehn kalaudehla arail pepehm en sohte masak? (b) Dahme kitail en tamataman duwen aramas akan me kitail tuhwong nan atail doadoahk en kalohk?
5 E Kesempwal en Kin Kaunopada: Ahmw pepehm en sohte masak pahn pil laudla ma ke kin uhdahn kaunopada ong doadoahk en kalohk. Pilada ehu iren padahk sang nan pwuhken Reasoning de pil sang nan neitail Atail Doadoahk en Wehio kan, onopki mwahu, oh kin kamwomwada iaduwen ke pahn wia met. Dehr kin nohn medemedewe duwen ahmw pepehm en saloh ahpw medewe me ke pahn pweida. Ke kak ale kangoang sang meteikan ni ahmw iang irail kalohk. Tamataman me pali laud en aramas akan me ke pahn tuhwong ni ihmw kan pil kin namenek, duwehte kowe. Koaros anahne rongamwahu en Wehio.
6. Dahme kak sewese kitail en uhdahn perenki atail doadoahk en kalohk?
6 Ma ke kin namenek, dehr nsensuwed. Ni omw pahn doadoahngki kaweid pwukat, Siohwa pahn ketin sewese iuk en wiahla sounkalohk koahiek men ong kalohki rongamwahwo. Met pahn kahrehiong uhk en uhdahn perenki omw doadoahk en kalohk.—Lep. Pad. 10:22.