“Ke Dehr Masak”
1. Soangen kahpwal dah me duwehte en Seremaia me kitail pil kak lelohng?
1 Ni ahnsou me kehkehlik kowohng Seremaia nin duwen soukohp emen, e pehm me e sohte kakohng. Ahpw Siohwa ketin kamehlelehiong ih oh mahsanih: “Ke dehr masak,” oh ni kadek e ketin kakehlaka ih pwehn kapwaiada eh pwukoa. (Ser. 1:6-10) Nan atail ahnsou, namenek de sohte koapworopworki pein kitail kak kerempwa atail iang doadoahk en kalohk. Masak dahme aramas pahn nda de kilangkin kitail kak kahrehda kitail en pweiek ekei pak. Ia duwen atail kak powehdi soangen masak duwehte met? Soangen kapai dah me kitail kak ale sang met?
2. Ia duwen kaunopada pahn sewese kitail katikala atail masak dahme kak wiawi nan kalohk?
2 Kaunopada Mwowe: Kaunopada mwahu kak wia sawas laud ong katikala atail masak. Karasepe, ma kitail kin kousapahlih soahng kan me irail me sohte kin men rong kin nda, kitail pahn kak sapeng soangen uhwong kan me re kalapw wia. (Lepin Padahk 15:28) Ke sou wia kamwomwada ni ahnsoun Kaudok en Peneinei pwehn kaunopada ong uhwong kan nan sukuhl oh nan kalohk?—1 Pit. 3:15.
3. Ia duwen atail likih Siohwa pahn sewese kitail en powehdi atail masak?
3 Likih Siohwa: Sawas me keieu mwahu ong masak iei likih atail Koht. Siohwa inoukihdi me e pahn ketin sewese kitail. (Ais. 41:10-13) Eri, soangen nsenamwahu laud dah me kitail pil kak ahneki likin met? Patehng met, Sises kamehlelehiong kitail me mehnda ma irair kan me kitail sohte kin kasik pwarada, sapwellimen Koht manaman pahn sewese kitail en kak wia kadehde ni ahl me mwahu. (Mark 13:11) Ihme kahrehda, peki sapwellimen Siohwa manaman ahnsou koaros.—Luk 11:13.
4. Kapai dah kan me kin kohsang atail kin nannanti nan doadoahk en kalohk mendahki uhwong kan?
4 Kapai kan: Ni atail kin nannanti nan doadoahk en kalohk mendahki uhwong kan, e kin kakehlailih kitailda pwe kitail en kak pweida ni atail pahn lelohng kahpwal kan ahnsou kohkohdo. Kitail kin kakairada kommwad oh eimah, met iei irair kan en irail me kin direkihla manaman en Koht. (Wiewia 4:31) Patehng met, ni atail kin powehdi pein atail masak sang ni sapwellimen Siohwa sawas, kitail kin kakehlahda atail pwoson oh atail koapworopworki sapwellimen Siohwa sawas. (Ais. 33:2) Kitail pil kin pehm peren oh nsenamwahu me kohsang atail kin ese me kitail kin kaperenda Samatail nanleng. (1 Pit. 4:13, 14) Eri, kitail en dehr kin masak kalohki rongamwahu en Wehio ni eimah oh ahnsou koaros koapworopworki sapwellimen Siohwa sawas!