Kasongosong kan Sang Iengatail kan oh Atail Pwais oh Pwukoa en Kalohk
1 Kasongosong kan sang iengomw kan kin kak kamwekid kitail en wia dahme mwahu de wia dahme suwed. Ahpw, ma kitail pahn werekiong irail me kin papah Siohwa, met kin kak kamwekid kitail en wia dahme mwahu nin duwen tiahk en Kristian mehlel kan. (Ipru 10:24) Ahpw, irail me kisehn atail peneinei, de iengatail tohndoadoahk kan, iengatail tohnsukuhl akan, mehn mpatail kan de aramas teikan me kitail ese me sohte kin papah Siohwa kin kak kamwekid kitail en wia soahng kan me sapwung oh soahng kan me kin uhwong Pwuhk Sarawi. Re “kin kinehiong [kitail] likamw ni [atail] wiewia mwahu rehn Krais.” (1 Pit. 3:16) Iaduwen kitail kak nantihong kalohk mendahki ma iengatail kan kin kasonge kitail?
2 Tohn Atail Peneinei kan: Ekei pak, pahpa men de ohl pwopwoud men me kaidehn emen Sounkadehdehn Siohwa kan sohte pahn mwahuki eh pwoud de nah seri kan en iang kalohk. Met wiawi nan peneinei ehu me kin mihmi Mexico. En ohlo pwoud oh iangahki nah seri isimen iangala padahk mehlel. Nin tepio, e kin uhwong irail oh e kahng eh peneinei en iang kalohk oh kihseli sawaspen Paipel kan sang ihmw-lel-ihmw. E pehm me doadoahk wet kin kauwehla arail ahnsou oh re kak wia doadoahk ehu me kesempwal sang met. Ahpw, eh pwoud oh nah seri kan kin kolokolete arail pilipil en papah Siohwa oh kaukaule iang kalohk. Mwuhr, ohlo tepida kilang me arail mour inenen katapan oh e kesempwal en uhpahiong sapwellimen Koht koasoandi me pid kalohk, eri, e pil men inoukihong Siohwa eh mour. Sounpahr eisek limau daulih sang ahnsou me eh peneinei iangala padahk mehlel lel ahnsou me ohlo iangala padahk mehlel, ahpw ma eh peneinei sohte nantihong iang kalohk ahnsou koaros, ke lemeleme e pahn kilang kesempwalpen doadoahk wet oh iangala padahk mehlel?—Luk 1:74; 1 Kor. 7:16.
3 Iengatail Tohndoadoahk kan: Mwein ekei aramas sohte pahn perenki ahmw nantihong kalohk ong irail. Ehu rahn, emen sister mihmi nan eh wasahn doadoahk oh ienge tohndoadoahk kan tepida koasoakoasoipene duwen imwin sampah, oh ahnsou me sister menet ndaiong irail en wadek Madiu irelaud 24, ekei ienge tohndoadoahk kan tepida kapailoke ih. Ahpw, ekei rahn mwuri, emen ienge tohndoadoahk ndaiong sister menet me e wadek Madiu irelau 24 oh e inenen pwuriamwei. Sistero kihong ih sawaspen Paipel ieu oh e koasoanehdi rehn liho me e pahn kohla reh oh eh pwoud ohl pwehn onop Paipel rehra. Keieun ahnsou me e kohla onop rehn liho oh eh pwoud, ara onop lel kuloak riau ni sohrahn. Mwurin arail onop Paipel pak siluh, pwopwoudo tepida iang towehda mihding kan oh mwurinte met, re kesehla simoak oh doadoahngki tipaker oh re tepida iang kalohk. Met pahn kak wiawi ma riatail sister sohte nantihong kalohk ong meteikan oh ehukihong irail duwen atail koapworopwor?
4 Iengatail Tohnsukuhl akan: E sohte kin wia mehkot kapw me irail Soukadehdehn Siohwa kan me pwulopwul kin lelohng kasongosong kan sang iengarail tohnsukuhl akan oh re kin masak kalohk ong irail pwe re kahng iengarail tohnsukuhl kan en kapailoke irail me re kin iang doadoahk en kalohk. Emen Kristian pwulopwul me kin mihmi nan United States koasoia: “I kin masak kalohk ong irail me pwulopwul teikan pwe I kin kahng ren kapailoke ie.” Eri, e sohte kin doadoahngki eh ahnsou mwahu en kalohk ong ienge tohnsukuhl kan oh pil kalohk nan wasahn kalohk. Ahpw, dahme ke kak wia pwehn kehlail kesihnenda teng oh dehr lohdi pahn kasongosong kan me kin kohsang iengomw tohnsukuhl akan? Likih Siohwa, oh nantihong kaperenda Ih. (Lepin Padahk 29:25) Perenki ahmw pahn kak koahiek en doadoahngki mwahu Mahsen en Koht nan kalohk. (2 Tim. 2:15) Kristian pwulopwul menet me se koasoia mwowe tepida kapakap ong Siohwa, oh e kin peki reh en sewese ih en kekeirada ineng en koasoiong ienge tohnsukuhl akan. E tepida kalohk nan sukuhl oh e imwila mwahu, eri, e tepida kalohk ong koaros me e ese. E koasoia: “Irail me pwulopwul kan anahne koapworopwor ong ahnsou kohkohdo, oh Siohwa kin doadoahngki kitail pwehn sewese irail.”
5 Mehn Mpatail kan: Mwein ekei mehn mpatail kan oh aramas kan me kitail kin ese sohte kin perenki me kitail iang Sounkadehdehn Siohwa kan oh sohte perenki atail padahk kan. Ahpw, ma ke kin masak dahme re kin medemedewe, idek pein rehmw: ‘Re kin wehwehki padahk mehlel me kak kahluwa irail ong mour soutuk? Dahme I kak wia pwehn lel mohngiongarail?’ Emen Sounapwalih en Circuit kin kilang me ma kitail pahn kalohk ong mehn mpatail kan ni ahl tikitik ahpw ahnsou koaros, e pahn kak pweida mwahu. Peki rehn Siohwa pwehn kak ale kehl oh erpit sang Ih me pahn sewese kitail en rapahki irail me mohngiong mehlel.—Pilipai 4:13.
6 Ma kitail pahn lohdi pahn kasongosong kan me kin kohsang iengatail kan, mehlel—irail pahn peren, ahpw met kin keieu mwahu ong kitail? Irail me kin kousoan nan wasa me Sises tikida kin pil kapailoke ih. Rien Sises pil kin doadoahngki lokaia keng ong Sises. Ahpw, e wehwehki me ihte ma e pahn lelepek ong Siohwa oh dahme Siohwa koasoanehdi ih en wia, e kak sewese aramas teikan. Ihme kahrehda, Sises kin “ketin kanengamahiong kailok me e ketin alesang rehn me dipan akan.” (Ipru 12:2, 3) Kitail pahn kak alasang Sises. Kitail en nantihong kalohk ong aramas koaros ahnsou koaros oh pil wasa koaros. Ma kitail pahn wia met, “ke pahn doarehla pein kowe oh pil irail kan me kin rong uhk.”—1 Tim. 4:16.