Ke Kak Kalohk Ahnsou Sohte Lipilipil!

1. (a) Dahkot kalohk ahnsou sohte lipilipil? (b) Me depe me iang towehda mihting wet me tepin esehda padahk mehlel sang kalohk en ahnsou sohte lipilipil?

¹ Me depe nan omw mwomwohdiso me tepin esehda padahk mehlel sang ni kalohk en ahnsou sohte lipilipil? Mwein ke pahn pwuriamweikihla pasapengpe. Kalohk ahnsou sohte lipilipil kin pid atail ehukihong aramas akan me kitail kin tuhwong rahn koaros rongamwahu, ni atail kin seiloak, mwemweitla rehn atail peneinei de mehn mpatail kan, nan sukuhl, ni atail kin netinet, wasahn doadoahk oh pil wasa teikan. Persent 40 en pwihn en Sounkadehde ehu me tohtohsang meh 200 me papidaisla, tepin esehda padahk mehlel sang ni kalohk en ahnsou sohte lipilipil! Ihme kahrehda wiepen kalohk wet kin uhdahn pweida mwahu.

2. Ia karasepe kan en kalohk ahnsou sohte lipilipil me kitail kak diar nan iren Paipel kan?

² Sounkalohk ni tepin mwehin Kristian akan kin kalapw wia wiepen kalohk wet. Karasepe, Sises kalohk ong lih emen me idihdipil ni pwarer en Seikop ni eh pahn kotehla Sameria. (Sohn 4:6-26) Pilip tepida koasoiong ohl lapalap en Idiopia men me wadewadek pwuhken Aiseia ni eh idek: “Ia duwe, komw wehwehki dahme komw wadewadeken?” (Wiewia 8:26-38) Ni ahnsou me wahnpoaron Pohl selidi nan Pilipai, e kalohk ong emen me selidi ko. (Wiewia 16:23-34) Mwuri ni eh sensel nan ihmw, Pohl “kin kasamwo koaros me kin pwarodo reh. E ahpw padapadahkihong aramas akan duwen Wehin Koht; oh e kin eimah oh pil saledek ni eh kin kapahrengki duwen Kaun Sises Krais.” (Wiewia 28:30, 31) Ke pil kak kalohk ahnsou sohte lipilipil mehnda ma ke kin namenek. Ia duwe?

3. Dahme kak sewesei kitail en powehdi namenek?

³ Kaunopada: Tohto rehtail kin apwalki en tapiada koasoiong emen me kitail sehse. E pil kin apwal en koasoia padahk mehlel ong irail akan me kitail kin ese. Ahpw, kitail kak koasoiong irail ma kitail kin medemedewe sapwellimen Siohwa irair mwahu kan, padahk mehlel kesempwal kan me e ketikihong sapwellime ladu kan oh apwal me aramas mi loale nin sampah. (Sona 4:11; Mel. 40:5; Mad. 13:52) Patehng met, kitail kak peki Siohwa en ketin ‘kakehlailihkitailda.’ (1 Des. 2:2) Emen tohnsukuhl en Kilead nda: “I kin kalapw kilang me kapakap kin sawas ma e kin apwal ong ie en koasoiong aramas.” Ma ke kin pweiek en lokaia, kapakap nan kapehdomw ni mwotomwot.—Neh. 2:4.

4. Mehn akadei dah me kitail kak wiahda? Ia kahrepe?

⁴ Kalohk ni ahnsou sohte lipilipil sohte anahne tepikihda iren Paipel ehu de wiepen kalohk en ihmw lel ihmw. E pahn sawas ma kitail akadeiong en ihte tapiada koasoi oh dehr medewe me ke anahne kalohk ni ahnsowohte. Sounkalohk tohto koasoia me ni arail wia met, e kahrehda irail en kak koasoia rongamwahwo mwuhr. Ma aramaso sohte men koasoi, ke sohte anahne iding ih. Ni kadek, kaimwisekala amwa koasoi.

5. Dahme sewese emen sister me kin namenek en kak kalohk ahnsou sohte lipilipil?

⁵ Emen Sister me kin namenek wie netinet. Me e kin tepin wia iei kilang aramas oh kouruhr. Ma aramaso kin kouruhrong, a e kin koasoiong. Ma aramaso perenki, eri met kin kahrehiong ih en pousehlahte eh koasoi. E kin rong kanahieng oh song en kilang mehnia ire sang rongamwahwo me aramaso pahn perenki. Wiepe wet sewese ih en kihla sawaspen Paipel tohto oh tapiada ehu onop en Paipel.

6. Ia duwen atail pahn kak tapiada koasoi ni ahnsou sohte lipilipil?

⁶ Tapiada Koasoi: Dahme kitail kak nda pwehn tepida koasoiong emen? Ni ahnsou me Sises mahseniong liho ni pwarero, e ketin tepikihda eh peki liho en kanimpile. (Sohn 4:7) Eri, mwehin kitail kak tapiekihda atail koasoi rahnmwahu de wia ehu peidek. Ni amwa koasoakoasoipene, mwein ke kak diar ahnsou mwahu en kasalehda ehu iren Paipel oh ele padokedi ehu weren padahk mehlel reh. (Ekl. 11:6) Ekei kin pweida ni arail kin koasoia mehkot me kin kahrehiong aramaso en wia peidek. Karasepe, ni ahnsou me ke awiawih ken tuhwong toahkte, ke kak tapiada omw koasoi ni omw pahn nda: “I pahn peren mehlel ni ahnsou me I solahr pahn pwurehng soumwahuda.”

7. Ia duwen atail kin tehk mwahu soahng kan eh kin sewese kitail en kalohk ahnsou sohte lipilipil?

⁷ En kin tehk mwahu soahng kan pahn pil sewese kitail en tapiada koasoi. Ma kitail kin tehk pahpa de nohno me nah seri kin tiahk mwahu, kitail kak kapinga ih oh idek, “Dahme sewesei iuk e pweida nin duwen pahpa de nohno men?” Emen sister kin rong dahme meteikan nan wasahn doadoahk kin koasoia oh kin ehukihong irail ire kan me pid dahme re kin perenki. Ni e esehda me emen lih nan eh wasahn doadoahk koasoakoasoane en pwopwoudla, e kihong ih makasihn en Awake! me koasoia ia duwen emen eh kak koasoandi eh kapwopwoud. Met kahrehiong ara pousehla koasoia duwen Paipel.

8. Ia duwen atail kak doadoahngki neitail sawaspen Paipel kan pwehn tepida koasoi ong aramas?

⁸ Pil ehu ahl en tapiada atail koasoi iei en wadek neitail sawaspen Paipel kan wasa me meteikan kak kilang. Emen brother kin pahkalahng ehu oaralap me aramas kin perenki nan makasihn en Kahn Iroir de Awake! Ih eri wadek ni ngihl tikitik. Ma e kin kilang me mie me mwohd limwah me kin kilang nah makasihno, e kin idek ehu peidek de pil koasoia mehkot me pid ireo. Met kin imwikihla eh kak koasoi oh pil kalohk ong aramaso. Ma ke pil kihdi ehu neitail sawaspen Paipel wasa me aramas kak kilang, met kak kahrehiong iengomw tohndoadoahk de tohnsukuhl en kak peidek rehmw.

9, 10. (a) Ia duwen atail kak rapahkihda ahnsou pwehn kalohk ni ahnsou sohte lipilipil? (b) Ia duwen omw kin kak wia met?

⁹ Rapahkihda Ahnsou Mwahu: Pwehki doadoahk en kalohk eh karuwaru, kitail dehr wiahki me kalohk ni ahnsou sohte lipilipil kin wia mehkot me kin kak pein wiawi. Ahpw, kitail anahne rapahki ahnsou pwehn kalohk ni atail kin wia atail pwukoahn ehuehu rahn. Medewehla mahs duwen aramas akan me ke pahn tuhwong oh medewe ia duwen omw pahn kak tepida koasoiong irail. Kaunopada noumw Paipel oh sawaspen Paipel kan me ke kak ehukihong irail kan me men rong.—1 Pit. 3:15.

¹⁰ Sounkalohk tohto, kin diar ahnsou mwahu kan pwehn kalohk pwehki arail kin koahiek oh pil kaunopada mwahu. Emen sister me mi nan soangen ihmw me sohte me kak pedolong mwahl loale kin wiahda kilel kaselel kan en kapikipikda kan en sampah. Ni aramas akan ar kin kilang oh kapinga kilel lingan pwukat, e kin isaneki oh padahkihong irail duwen inou kan en Paipel me pid “lahng kapw ehu oh sampah kapw ehu.” (Kaud. 21:1-4) Ke kak medewehda duwen wiepe kan me ke kak doadoahngki pwehn kalohk ni ahnsou sohte lipilipil?

11. Ia duwen atail pahn pwurala rehn irail kan me men rong ni atail kalohk ni ahnsou sohte lipilipil?

¹¹ Pwurala Rehn me Kin Men Rong: Ma ke diar emen me kin men rong, song en pwurala reh. Ma e konehng, ke kak ndaiong aramaso: “I uhdahn perenki ei kak koasoiong uhk. Ia wasa me I kak tuhwong uhk pwe kita en kak pwurehng koasoi?” Ekei sounkalohk kin kihong arail adres oh telepwon oh nda: “I perenki ata koasoipene. Ma ke men kalaudehla dahme kita koasoia, a ke telepwohndo.” Ma ke sohte kak pwurehng pwurala rehn me men rongo, koasoanehdi mwomwohdiso me konehng en wia met ni omw pahn kihong doaropwehn Please Follow Up (S-43) ren sekteri en omw mwomwohdiso.

12. (a) Dahme kahrehda kitail anahne kilelehdi oh ripohtki ahnsou kan me kitail kin kalohk ni ahnsou sohte lipilipil? (b) Ia imwilahn kalohk ahnsou sohte lipilipil? (Kilang kakon “Imwilahn Kalohk Ahnsou Sohte Lipilipil!”)

¹² Kitail pahn wiahda ripoht en ahnsou me kitail kin kalohk ni ahnsou sohte lipilipil. Ihme kahrehda ke pahn kin kilelehdi mehnda ma minit keite ehu rahn. Medewe duwen met: Ma sounkalohk kan koaros kin kalohk ahnsou sohte lipilipil erein minit limau ehuehu rahn, met pahn wiahda awa me tohto sang rar pak 17 nan ehuehu sounpwong!

13. Dahme pahn kamwakid kitail en kalohk ni ahnsou sohte lipilipil?

¹³ Atail kin limpoak ong Koht oh mehn mpatail iei kahrepe keieu kesempwal me kitail ahneki pwehn kalohk ni ahnsou sohte lipilipil. (Mad. 22:37-39) Atail kin direkihla kalahngan ong Siohwa pwehki sapwellime irair akan oh kupwur akan, kin kamwakid kitail en koasoia duwen ‘lingan en sapwellime wehi.’ (Mel. 145:7, 10-12) Atail nsenohki mehlel mehn mpatail kan kin kamwakid kitail en isaneki ahnsou mwahu koaros en iang kalohki rongamwahwo ni eh mihmiehte ahnsou. (Rom 10:13, 14) Kitail koaros kak kalohk ahnsou sohte lipilipil oh ele pehm peren en ehukihong emen me ahneki mohngiong mehlel duwen padahk mehlel, ni atail kin medemedewe mahs oh kaunopada.

[Blurb nan Pali 4]

E kak sawas ma ke pahn akadeiong en ihte tuhwong aramas akan oh tepida koasoiong irail

[Blurb nan Pali 5]

Sounkalohk tohto kin diar ahnsou mwahu en kalohk ni ahnsou sohte lipilipil pwehki arail kin koahiek oh kaunopada mwahu

[Koakon nan Pali 5]

Iren Sawas ong Tapiada Koasoi

◼ Kapakapki sawas pwe ken kak tepida

◼ Pilada irail kan me mas kadek oh sohte karuwaru

◼ Kilang irail, kouruhr, oh nda mehkot me kumwa koaros pahn perenki

◼ Wia emen me kin rong kanahieng

[Koakon nan Pali 6]

Imwilahn Kalohk Ahnsou Sohte Lipilipil!

• Brother men kalohk ong irail kan me mi wasahn wie sidohsa ehu ni eh awiawih wereo en wiawihda. E kihong irail doaropwehn luhk ong padahk en Wehi Pokon en mihting tohrohr ehu. Sounpar ehu mwuri nan mihting tohrohr ehu, emen brother rahnmwahwih ahpw e sehse ihs ih. Brothero iei emen irail ko me e kihong doaropwehn luhk ni wasahn wie sidohsa sounpar ehu samwalahro! Ohlo kohla iang rong padahk en Wehi Pokono oh e peki emen en onop Paipel reh. Met ih oh eh pwoud papidaisla.

• Emen sister me esehla padahk mehlel pwehki kalohk en ahnsou sohte lipilipil kin wiahki aramas akan me e kin tuhwong pwehki nah seri kan, eh wasahn kalohk. Aramas pwukat iei mehn mpe kan oh pahpa oh nohno kan me e kin tuhwong nan sukuhl oh ni mihting kan en pahpa oh nohno. Ni eh kin padahkihong aramas akan ihs ih, ni mwotomwot e kin kasalehda eh kalahnganki Paipel eh kin wia sawas kesempwal ehu ong kakairada nah seri kan. Ih eri kin doula oh koasoia ire teikan. Pwehki e tepidahr koasoiongehr aramas kan, e diar me mwuhr e kin mengei en koasoia duwen Paipel. Ni eh kin doadoahngki wiepen kalohk wet, e sewesehdahr aramas 12 en papidaisla.

• Ni ohl emen me kin doadoahk ong palien insurance eh tuhwong emen sister, sistero isaneki ahnsou mwahu oh kalohk ong ih. E idek reh ma e pahn mwahuki ehu insurance me pahn uhdahn kihong ih roson mwahu, nsenamwahu oh mour soutuk. Ohlo sapengki ei, oh idek reh mehnia insurance me e koasoakoasoia. Sistero eri kasalehiong ih inou kan nan Paipel oh kihong ih ehu sawaspen Paipel oh ohlo wadekala pwongohte. E tepida onop Paipel, iang mihting kan, oh mwuhr papidaisla.

• Sister men tepida koasoiong lih emen me mwomwohd limwah nan sompihr oh tepida kalohk ong ih. Ni sompihro eh peidi, sistero kihong liho nah adres oh nempehn telepwon oh kangoange liho en peki rehn Sounkadehdehn Siohwa kan me e pahn tuhwong mwuhr ren onop Paipel reh. Mandahn rahno, Sounkadehde riemen kohla ni imwen liho. Liho tepida onop Paipel oh e mwadang kekeirda oh papidaisla. Mwuri ekis, e tepida onop Paipel rehn aramas silimen.

• Emen brother maskun me sounpar 100 me kin mi nan imwen me mah kan kin kalapw nda, “Kitail anahne Wehio.” Met kahrehda nurse kan oh soumwahu ko en tepida wia peidek kan me kahrehda brothero eh kak kawehwehda dahkot Wehio. Emen lih me doadoahk wasao idek reh dahme e pahn wia nan Paradais. E sapengki, “I pahn pwurehng kilangada wasa oh pwurehng alu oh I pahn isikala ahi wheelchairo.” Pwehki e maskun, e peki rehn liho en kin wadek ong ih nah makasihn kan. Ni ahnsou me nein brothero serepeino mwemweitla reh, tohndoadoahko peki reh ma e kak wahla makasihn ko nimweo. Emen nurse ndaiong nah serepeino, “At iren rahn kapw wasaht iei: ‘Se anahne Wehio.’”

• Sister men me wie lalain nan wasahn mwenge ehu rongada ohl mah kei me koasoakoasoia duwen politik. Emen ohl ko nda me koperment sohte kak kamwahwihala atail kahpwal kan. Sistero eri ndaiong pein ih, ‘Iet ei ahnsou en.’ Ih eri wia kisin kapakap oh aluhla rehn ohl ako. Mwurin eh kawehwehiong irail ihs ih, e padahkihong irail duwen koperment ehu me pahn kamwahwihala en aramas koaros arail kahpwal kan oh met iei Wehin Koht. Ih eri kihong irail ehu pwuhk me e weuwa. Ni ahnsowo kaunen doadoahko aluhdo. Sistero lemeleme me e pahn ndaiong en kohkohla. Ahpw, e ndaiong me e wie rongorong oh e pil men ale nah ehu pwuhk. Pil emen tohndoadoahk me wie rongorong arail koasoi sengiseng oh aluhdo rehrail. Ih emen me kin onop mahs oh met e men pwurehng onop Paipel.