Ke Kaunopadahr Mwahu ong Kalohk Ahnsou Soh Lipilipil?
1. Karasaras dahieu me kasalehda me kalohk ahnsou soh lipilipil kak pweida?
1 Kalohk ahnsou soh lipilipil kak pweida mwahu. Mie karasaras tohto nan Paipel me pid wiepen kalohk wet me kin imwila mwahu. (Sohn 4:7-15) Dahme kitail kak wia pwehn kaunopada ong soangen wiepen kalohk wet?
2. Ia duwen atail likou oh kapwat sewese kitail en kak kalohk ong meteikan?
2 Mwomwen Atail Likou oh Kapwat: Atail kin tehk mwahu atail likou oh kapwat ahnsou koaros pahn kahrehiong kitail en nsenamwahu ni atail kin ehukihong meteikan dahme kitail kin kamehlele. (1 Tim. 2:9, 10) Ma kitail kin soansuwedki mwomwatail, kitail kakete sohte pahn men kalohk. Ahpw ma mwomwatail kin soandi mwahu oh mwakelekel, met kak kahrehiong meteikan en men ese kahrepen atail kin kapwatda mwahu. Karasepe, pwopwoud Sounkadehde ieu me kin kapwatda mwahu erein ara seiseiloak mwohndi limwahn ohlen Muslim men. Ohl menet tehk mwomwen ara kapwat oh idek ma ira Kristian kei. Met imwikihla arail koasoakoasoiahkihpene erein awa siluh duwen Paipel.
3. Ia duwen omw pahn kahlemengih Sises pwehn tapiada koasoia?
3 Tapiada Koasoi kan: Ni ahnsou me Sises tuhwong lihen Sameria men ni pwarer en Seikop, e tapiadahte keinemwe liho en patohwanohng ih nime pihl. Kitail pil kak tapiada atail koasoi ni atail pahn ndahlahte ire ehu de wia peidek ehu. Mendahki ekei pak kitail kin peikasal, ahpw ma kitail kin likih sapwellimen Siohwa sawas, e pahn ketin ‘kakehlakitailda’ en tapiada atail koasoia.—1 Des. 2:2.
4. Ia duwen atail kak kaunopada mwahu en kalohk ahnsou soh lipilipil?
4 Elehda Ahnsoun Kalohk Ahnsou Soh Lipilipil: Sounkalohk tohto eselahr wiepe kan en kalohk ahnsou soh lipilipil. Eri ke sou tehk omw irair kan oh medemedewe duwen soangsoangen aramas akan me ele ke pahn tuhwong rahn koaros. E pahn mwahu ma ke kin wahda sawasepen Paipel kan me konehng oh pil ehu Paipel. En kin tehk wasa oh nsenohki dahme aramas akan limwahmw kin wiewia. Ma ke kaunopada mwowe ni omw kin medemedewe duwen ahnsou mwahu kan me mie ong kalohk nan rahno, met pahn kaunop ukada en wia kalohk mwahu.—Pil. 1:12-14; 1 Pit. 3:15.
5. Dahme kahrehda kitail anahne kaunop mwahu ong kalohk ahnsou soh lipilipil?
5 Mie kahrepe mwahu riau kitail en isaneki kalohk ahnsou soh lipilipil. Met akan iei atail limpoak ong Koht oh mehn mpatail. (Mad. 22:37-39) Pwehki doadoahk en kalohk me karuwaru, kalohk ahnsou soh lipilipil anahne kaunop mwahu. Kitail anahne kaunopada mwahu pwe kitail en isanekihla ahnsou mwahu koaros en ehukihong meteikan rongamwahu en Wehio erein e miehte ahnsou.—Rom 10:13, 14; 2 Tim. 4:2.