Kitail Sounkadehde kei Ahnsou Koaros
1. Dahme kitail kak sukuhlki sang en Sises kalohk ong lih me idipil ni pwarero?
1 Sises ketin sapasapahlkier awa kei. E ketin pwangadahr oh men nimpildahr. Ni sapwellime tohnpadahk ko arail kohlahng pwainda mwenge, e ketidi limwahn pwarer ehu likin kahnimw en Sameria pwehn kommoal. Sises sohte ketila Sameria pwehn kalohk. E wia ketiket kohla Kalili pwehn pousehla sapwellime doadoahk en kalohk wasao. Ahpw e ketin isaneki ahnsowo pwehn kalohkohng lih men me wie idipil. (Sohn 4:5-14) Dahme kahrehda? Pwehki Sises sohte kin ketin uhdihsang eh wia “sounkadehde loalopwoat oh mehlel.” (Kaud. 3:14) Kitail kin kahlemengih Sises sang ni atail kin wia Sounkadehdehn Siohwa ahnsou koaros.—1 Pit. 2:21.
2. Ia duwen atail kak kaunopada pwehn kalohk ahnsou sohte lipilipil?
2 Kaunopada: Kitail kak kaunopada pwehn kalohk ahnsou sohte lipilipil sang ni atail pahn weuwa pwuhk kan. Sounkalohk tohto kin wa doaropwe kan oh kihong tohndoadoahk en sidohwa, wasahn ale kahs, oh meteikan me irail tuhwong erein rahno. (Ekl. 11:6) Emen sister me kin kalapw seiloak kin ahnsou koaros wahda kisin Paipel oh pwuhken Paipel Padahngki nan eh kopwou oh e kin song en tepida koasoiong irail kan me mi limwah.
3. Ia duwen atail kak tapiada atail koasoi?
3 Tapiada Koasoi: Ni atail kalohk ahnsou sohte lipilipil, kitail sohte anahne tepikihda ire kan me pid Paipel. Sises sohte ketin tapiada sapwellime koasoi ong liho ni eh ketin mahsanih me ih Mesaiao. E ketin pekihte nime pihl, oh met kamwakid liho en men rong ih. (Sohn 4:7-9) Emen sister diarada me soangen wiepe wet kin sewese ih en tapiada koasoi ni ahnsou me emen idek reh ma e iang kasarawi en Krismas de Parakapw. E sohte kin nda me e sohte iang pwehki ih emen Sounkadehdehn Siohwa. Ahpw e kin nda, “I pein pilada en dehr iang kasarawi wet.” Aramaso me wia peidek kin kalapw idek dahme kahrehda, oh met kin mweidohng sistero en kak kalohk.
4. Ia duwen Madiu 28:18-20 kin kamwakid uhk?
4 Mendahki Sises ketin kaimwisekala sapwellime doadoahk en kalohk pohn sampah, e kin ketin nsenohkihte doadoahk en kalohk me kin wiawi. (Mad. 28:18-20) Ihme kahrehda duwehte Sises, kitail sounkadehde kei me kin onopada en kalohki duwen atail pwoson ahnsou koaros.—Ipru 10:23.