Koakon En Peidek
◼ Dahme kahrehda kitail anahne kanahieng en doadoahngki telephone ong mihting kan en mwomwohdiso?
Mwomwohdiso tohto kin doadoahngki telephone pwe irail me sohte kak iang towehda mihting kan nan Wasahn Kaudok pwehki soumwahu de kahrepe teikan en kak rong mihting nan imwarail. Kitail anahne kanahieng pwe koasoandi wet pahn wiawi ongete irail kan me uhdahn sohte kak iang towehda mihting kan. Ihme kahrehda elder kan kin tehk koasoandi wet pwe soahng koaros en wiawi ni “konehng oh koasoandi pwung.”—1 Kor. 14:40.
Elder kan pahn tehk pwe koasoandi wet pahn keieu wiawi ong sounkalohk kan me kin wereila soumwahu de paliwararail kin luwet de irail kan me sohte kak pedoisang nan imwarail pwehki kahrepe teikan. Sounkalohk men me kin soumwahu de ahneki kahpwal en paliwar ni ahnsoukis te, de emen me kin onop Paipel oh kekeirda ahpw sohte kak pedoisang imweo ele pahn ale sawas sang koasoandi wet oh mwomwohdiso pahn wadek irail nin duwen aramas me iang towehda mihting. Ma koasoandi en telephone sohte kak wiawi, mwomwohdiso kak wiahda koasoandi teikan me duwehte wiahda cassette en mihting.
Ahpw sohte mehkot me mwahusang kamwahu kan me kohsang atail en uhdahn iang towehda mihting kan. Atail kin mihmi nan Wasahn Kaudok oh tuhwong riatail kan kak kahrehiong kitail en “sawaspene” oh pil sewese me kapw kan en wehwehki kesempwalpen iang towehda mihting. Ahnsou me kitail kin iang towehda mihting kan nan Wasahn Kaudok, kitail kak paiekihda kamwomwada kan, oh elder kan kak kihong kitail sawas, oh kitail kak kehn limpoak en riatail kan. Dahme emen sister mah koasoia mwurin emen tohnmwomwohdiso pwoalehdi ih ni eh pedoisang nan Wasahn Kaudok kin uhdahn mehlel: “Ke sohte kak ale met sang ni telephone!”—Rom 1:11, 12.
Duwehte Ana me “sohte kin pedoisang nan Tehnpas Sarawio,” riatail mah tohto rahnwet kin kaukaule iang towehda mihting en Kristian kan ma arail roson en paliwar oh irair kan kin mweidohng irail en wia met. (Luk 2:36, 37) Irail kin doadoahngki telephone ni ahnsou me re anahne, ahpw re sohte kin wiahki koasoandi wet ahl mengei me kak wiliandi en iang towehda mihting kan nan Wasahn Kaudok. Kitail en kahlemengih arail mehn kahlemeng oh nantihongete en kaukaule iang towehda atail mihting kan ni atail kin kaudokiong Koht lapalap, Siohwa.—Mel. 95:1-3, 6; 122:1.