Ken “Mweidohng Ahmw Ahnsou Koaros” ong Kalohkiseli Mahsen en Koht
1 Ni ahnsou me kitail kin wadek me wahnpoaron Pohl kin doadoahk (wiahda ihmw likou) ni ahnsou me e mihmi nan Korint, kitail kakete lemeleme me doadoahk wet kin katikitikla sapwellime ahnsoun kalohk. Ahpw, nan Wiewia 18:5 mahsanih: “Pohl ahpw mweidohng eh ahnsou koaros ong kalohkiseli mahseno, kadekadehdehiong mehn Suhs akan me Sises iei Mesaia.” Dahme kahrehda Pohl kin mweidohng eh ahnsou koaros ong kalohk? Mendahki aramas tohto nan Korint wiahlahr tohnpadahk kan en Sises, Kauno (wehwehki Sises) eri kasalehong Pohl (nan kasansal) me miehte aramas tohto nan kahnimwo me pahn wiahla tohnpadahk kan en Sises. (Wiewia 18:8-11) Kitail pil ahneki kahrepeohte duwehte Pohl pwehn mweidohng atail ahnsou koaros ong kalohk? Ei. Miehte aramas tohto me saikinte rong, sukuhliki oh mwekidki padahk mehlel.
2 Kalaudehla Ahmw Ahnsou Nan Kalohk Nan April: Mehlel, mwein ahmw mehn akadei sounpwong koaros iei en nantihong kalohki Rongamwahu en Wehio. Ahpw, ekei sounpwong kan kin inenen mwahu pwehn kak “mweidohng atail ahnsou koaros” en kalohk. Sounpwong en April kin wia ahnsou mwahu en kalaudehla atail ahnsoun kalohk pwe Katamano pahn wiawi nan April. Ke lemeleme ke kak koasoanehdi ahmw koasoandi kan pwehn Auxiliary Pioneer de kalaudehla ahmw ahnsou nan kalohk nan sounpwong en April oh May? Sounkalohk tohto me kin wia met kin ale kapai tohto. (2 Kor. 9:6) Ma ke kin wia uwen me ke kak nan kalohk, tamataman me Siohwa inenen perenki ahmw nannanti. (Luk 21:2-4) Sohte lipilipil soangen irair dah me ke mihmi loale, wiahda ahmw mehn akadei pwehn “mweidohng ahmw ahnsou koaros” ong kalohk nan April. Oh ken dehr manokehla en kapedolong noumw ripoht en kalohk ni imwin sounpwonget pwe ahmw nannanti pahn sansal ahnsou me ripoht kan koaros pahn patpene oh kasalehda duwen nannanti kan en sounkalohk koaros nan sampah.
3 Pwurehng Pwurala Rehn Irail me Kapw Kan me Iang Towehda Kataman: Nan United States nan sounpahr me ahpwtehn nek, irail me iang towehda Kataman iei meh 2,153,268. Kitail sehse aramas depe iang towehda Kataman en pahr wet. Ahpw, ripoht kan kasalehda me kekeirada kapw kakete wiawi pwe “rahket inenen laud.” (Madiu 9:37, 38) Ihme kahrehda, mwurinte Katamano, wiahda ahmw koasoandi pwehn pwurehng pwurala rehn irail me kin perenki rong oh iang towehdahr Katamano pwehn sewese irail en kekeirada ni pali ngehn. Ma kitail sohte mwadang pwurala rehrail, met kak kahrehda ‘ngehn suwed en adihasang dahme kamweremwerdiong nan kapehdirail.’ (Madiu 13:19) Ma ke mwadang pwurehng pwurala rehrail, met pahn kasalehda me ke kin “mweidohng ahmw ahnsou koaros” ong kalohk.
4 Nantihong Sewese Irail me Sohla Kalohk: Nan February, mie koasoandi ehu me tepida pwehn sewese irail me sohla kalohk. Ma elder kan saikinte tuhwong irail koaros, re pahn nantihong tuhwong irail mwohn imwin April. Elder kan pahn songen wehwehki dahme kahrehda re sohla kalohk oh soangen sawas dah me anahn pwehn sewese ih en pwurehng kaukaule papah Siohwa. Koasoandi en sawas limpoak wet kin kasalehda me elder kan inenen nsenohki arail pwukoa en wia doadoahk en silepen “sihpw me Koht ketikihong irail.” (1 Pit. 5:2; Wiewia 20:28) The Watchtower (lokaiahn wai) en September 15, 1993, pali 22-23, kihda mehn sawas mwahu kan me elder kan kak doadoahngki pwehn sewese irail me sohla kalohk oh kasawihada kahrepe kan re sohla kin kalohk (mie kahpwal limau me kin kalapw pwarada) oh sewese irail. Ma kak, ekei kakete pwurehng tepida kalohk nan April.
5 Sewese Irail me Men Wiahla Sounkalohk kan me Saikinte Papidais: Iaduwen—noumw seri kan kakehr wiahla sounkalohk kapw kan? Irail kan me ke kin onop Paipel rehrail kakehr wiahla sounkalohk kapw kan? Ma elder kan nda me re kakete wiahla sounkalohk kan, e soh pahn mwahu ren tepida kalohk nan April? Ma emen kin wia kekeirada ni pali ngehn oh ke onopkihongehr brochure Kupwurki oh pwuhken Knowledge, ke kak pousehlahte ahmw onop en Paipel reh nan keriaun pwuhk—ke kak pilada sang pwuhken God’s Word, de pwuhken True Peace, de pwuhken Kaudok. Ahmw mehn akadei iei en sewese aramaso en wehwehkihla duwen padahk mehlel, wiahla sounkalohk me saikinte papidais oh mwurin mwo wiahla emen Sounkahdehdehn Siohwa me pahn inoukihong Siohwa eh mour oh papidaisla.—Episos 3:17-19; 1 Tim. 1:12; 1 Pit. 3:21.
6 Ahmw nantihong sewese aramas iangahki ahmw nsenohki irail me ke kin onop rehrail pahn sewese irail en mwekidki padahk mehlel. Emen brother tuhwong pwopwoud laud ehu oh pwopwoudo mwadang pwungki me re men onop Paipel reh. Ahpw, pwopwoudo sohte onop wihk siluh mwurin rahno me re koasoanehdi me re pahn onop. Ahpw, wihk mwurin wihk siluwo, re tepida onop. Mwurin mwo, re kin onop nan wihk ehu, oh wihk mwurin wihk me re onop: re sohte onop, oh re kin wia soahngo ahnsou koaros. Kedekedeo, liho kekeirada oh papidaisla. Brothero tamataman rahno oh koasoia: “Mwurin liho papidaisla, pilen mese ko ahpw dirla oh met kahrehong ngehi oh ahi pwoud en ahneki peren laud.” Ei, ma kitail pahn “mweidohng atail ahnsou koaros” ong kalohki Rongamwahu, e pahn kihong kitail peren laud!
7 Kokohp kan en Paipel oh irair en sampah wet kin kasalehda me kitail mihmi nan imwin rahn akan. Ahnsou wet, sapwellimen Koht aramas akan koaros anahne “mweidohng arail ahnsou koaros” ong kalohki Rongamwahu en Wehin Koht ong aramas koaros. Wahnpoaron Pohl kin kasansalehda me atail nannanti kin mie katepe pwe “papah Kauno kaidehk doadoahk mwahl ehu.”—1 Kor. 15:58.