Wia Kadehde Mwahu Nin Duwen Mehn Mpe Mwahu
1 Sises mahsanih: “Ke pahn poakohng mehn mpomw duwen omw kin poakohng pein uhk.” (Madiu 22:39) Mehlel, ke kin nantihong “wia mwahu” ong riatail brother oh sister kan, ahpw, ke kak langahda douluhl mohngiongomw ong irail akan me kin wia mehn mpomw kan de irail me kin kousoan karanih iuk? (Kal. 6:10) Ni ahl dah kan?
2 Kasalehda me Kowe Emen Sounkadehde: Mehn mpomw kan kin ese me kowe emen Sounkadehde? Ma soh, dahme ke soh kohla rehrail oh kalohk ong irail? Mwein ke pahn pwuriamweikihla dahme pahn wiawi! De ke kakete kalohk ong irail ni ahnsou soh lipilipil. Mwein ehu rahn ke pahn mihmi likin imwomw oh ke pahn kilang mehn mpomw kan wia doadoahk likin imwarail de ke pahn kilang irail alialu nanial. Ken tuhwong irail ni kadek oh pohkomwokomw ong irail. Ken koasoi ong irail duwen dahme ke kin kamehlele, oh wasao me Kingdom Hall mih ie, oh dahme kin wiawi ni mihding kan en Sounkadehde kan oh ken ndaiong irail pil ihs nan ahmw wasa kin iang towehda mihding kan. Ken luhke irail koaros en iang towehda mihding kan. Ken nantihong kalohk ong mehn mpomw kan koaros duwen Rongamwahu en Wehin Koht.—Wiewia 10:42; 28:23.
3 Wia Kadehde Sang Ni Ahmw Kin Tiahk Mwahu: Ahmw tiahk mwahu oh kadek ong meteikan kin wia kadehde laud oh kakete kahrehong meteikan en men ese duwen padahk mehlel. Atail tiahk mwahu pil kin ‘kapingahki atail padahk duwen Koht.’ (Taitus 2:7, 10) Kasalehda me ke kin nsenohki mehn mpomw kan. Ken kadek oh nantihong wehwehki arail pepehm kan. Ken kasalehda wahu ong irail oh wehwehki me mie arail pwung en kelekelepw rehn arail peneinei oh pil mie arail pwung en ahneki wasa me meleilei oh kansenamwahu. Ma emen mehn mpomw soumwahuda, ken medemedewe dahme e anahne oh idek reh ma ke kak sewese ih. Ni ahnsou me peneinei kapw pahn kosoudo nan ahmw wasa, ken kohla rehrail oh kasamwo irail. Soangen tiahk kadek pwukat kak kamwekid irail en perenki kowe oh pil kin kaperenda Siohwa.—Ipru 13:16.
4 Kamwakelehda oh Wiahda Mwahu Likin Imwomw: Ma ke men wia mehn mpe me mwahu, met kin wehwehki me ke pahn apwalih mwahu likin imwomw pwehn mwahu. Ma imwomw oh likin imwomw kin mwakelekel oh lingan kin wia kadehde mwahu. Ahpw, ma imwomw samin oh mie kihd likin imwomw, met pahn kak kauwehla atail kalohki Rongamwahu en Wehio. Kahrehda, e inenen kesempwal en tehk ahnsou koaros me imwatail kan, likin imwatail kan oh waratail sidohsa kan kin mwakelekel oh soandi mwahu oh doadoahk mwahu.
5 Atail kasalehda me kitail nsenohki aramas akan likin riatail brother oh sister kan kin kasalehda me kitail kin limpoak ong mehn mpatail kan. Ia imwilahn met? Mwein “ni ar pahn kilang [atail] wiewia mwahu kan,” ekei irail pahn kakete “kapingahki Koht.”—1 Pit. 2:12.