Ia Wehwehn Kitail En Limpoakohng Mehn Mpatail Kan
“Ke pahn poakohng mehn mpomw duwen omw kin poakohng pein uhk.”—MADIU 22:39.
1. Iaduwen atail kin kasalehda atail poakohng Koht?
DAHME Siohwa kin ketin kupwurki irail akan me kin kaudok ohng ih en wia? Sises kawehwehda duwen met ni lokaia mwotomwot ahpw loal kei. E kasalehda me kosonned me keieu kesempwal iei en limpoak ohng Siohwa ki atail mohngiong, madamadau, oh kehl unsek. (Madiu 22:37; Mark 12:30) Nin duwen me kitail koasoiapene nan artikel en mwowe, poakohng Koht kin pidada atail kin peikiong ih oh kapwaiada sapwellime kosonned akan pwehki limpoak me e kin ketin kasalehiong kitail. Ohng irail akan me kin poakohng Koht, e sohte kin wia mehn katoutou ehu en kapwaiada kupwure; e kin wia mehkot kaperen ohng irail.—Melkahka 40:8; 1 Sohn 5:2, 3.
2, 3. Dahme kahrehda kitail anahne nsenohki kosonned me pid en poakohng mehn mpatail kan, oh peidek dah kan me pwarada?
2 Sises mahsanih me kosonned me keriau en kesempwal kin pidadahte kosonned keieu: “Ke pahn poakohng mehn mpomw duwen omw kin poakohng pein uhk.” (Madiu 22:39) Iei kosonned wet me kitail pahn tehkpene, oh mie kahrepe mwahu en wia met. Nan atail ahnsou, limpoak kin wiawi ni roporop oh ni ahl sapwung. Nan en Pohl kawehwehpen “imwin rahn akan” e kasalehda me aramas akan pahn limpoak, kaidehn ohng emen emen, ahpw ohng pein irail, mwohni, oh soangen mehn kaperen akan. Tohto “pahn sempoak,” de nin duwen ehu kawehwehn Paipel kin kawehwe “sohte ahneki limpoak me kin mie nanpwungen peneinei kan.” (2 Timoty 3:1-4) Sises Krais kohpada: “Me ngeder . . . pahn pangala [nanpwungarail], oh re pahn kailokpene nanpwungarail. . . . Limpoak en me tohto pahn tikitikla.”—Madiu 24:10, 12.
3 Ahpw tehk kanaiehng me Sises sohte koasoia me limpoak en koaros pahn loula. E kin oh pahn ahnsou koaros mie irail akan me kin kasalehda soangen limpoak me Siohwa kupwurki oh warohng. Irail akan me kin poakohng mehlel Siohwa pahn kin kilangwohng meteikan ni ahlohte me e kin ketin mahsanih. Ahpw ihs irail mehn mpatail kan me kitail anahne poakohng? Iaduwen atail pahn kin kasalehda limpoak ohng mehn mpatail kan? Iren Paipel kan kak sewese kitail en sapeng peidek kesempwal pwukat.
Ihs Mehn Mpei?
4. Nin duwen me Lipai irelaud 19 kasalehda, ihs me mehn Suhs kan anahne kasalehiong limpoak?
4 Ni ahnsou me Sises padahkiong Parisio me kosonned me keriau en kesempwal iei emen en poakohng mehn mpe, e koaskoasoia duwen kosonned ehu me kohwong Israel. Met kileledi nan Lipai 19:18. Irelaudohte padahkihong mehn Suhs kan me irail anahne kilangwohng meteikan me kaidehn mehn Israel nin duwen mehn mparail. Iretikitik 34 kasalehda: “Kumwail nsenohkin irail duwehte amwail kin nsenohki riamwail mehn Israel kan, oh poakohng irail duwehte amwail kin poakohng pein kumwail. Kumwail en tamataman me kumwail wia mehn liki kei nan wehin Isip mahso.” Ihme kahrehda, limpoak pil anahne kohwong irail akan me kaidehn mehn Suhs, eri keieu irail mehn liki kan me pwosonla.
5. Soangen wehwe dah me mehn Suhs akan kin ahneki me pid duwen limpoak ohng mehn mparail?
5 Ahpw irail kaun en mehn Suhs akan ni mwein Sises kin ahneki madamadau me tohrohrasang met. Ekei kin medemedewe me lepin lokaia “kompoakepah” oh “mehn mpe” kin dokedokehte mehn Suhs akan. Irail en kailongki irail akan me kaidehn mehn Suhs. Soangen sounpadahk pwukat kin nda me dene irail akan me kin kaudok ohng Koht en kailongki irail akan me sohte kin kaudok ohng Koht. Ehu pwuhk koasoia: “Nan soangen irair wet, e apwal en sohte ahneki kailok. Pepehm en kailok kin inenen laud nan wasa kan me towe kan kin kangoange.”
6. Ire riau dah me Sises kasalehda ni ahnsou me e koasoakoasoia duwen limpoak ohng mehn mpatail?
6 Nan en Sises padahk me e wia pohn dohl, e kasalehda ni sansal ihs irail akan me limpoak anahne kohwohng. E mahsanih: “Kumwail pil rongehr padahk pwoatet: ‘Ke en poakohng mehn mpomw kan, ah kailongki omw imwintihti kan.’ A ngehi I ndaiong kumwail met: kumwail poakohng amwail imwintihti kan oh kapakapki me kin kalokei kumwail, pwe kumwail en wiahla sapwellimen Sahm me ketiket nanleng, me kin ketin dakerki sapwellime ketipin pohn me suwed oh me mwahu kan, oh kin ketin kamwerehdi keteu pohn me lelepek kan oh me dipan akan.” (Madiu 5:43-45) Wasaht Sises kasalehda ire riau. Keieu, Siohwa kin kadekiong irail me mwahu kan oh pil me suwed kan. Keriau, kitail anahne kahlemengih ih.
7. Dahme kitail sukuhliki sang karasaras me pid duwen ohlen Sameria?
7 Ehu pak, emen mehn Suhs me samanih iren Kosonnedo idek rehn Sises: “Ihs me mehn mpei?” Sises sapeng ih ni eh wia karasaras ehu me pid duwen mehn Sameria men me kilangada ohl en Suhs men me loallap suwed kei parokedi eri kemehda oh kulihasang eh kepwe kan. Mendahki mehn Suhs akan kin kailongki mehn Sameria kan, mehn Sameria menet kamwakelehda oh kidimpene ohla kan me mih ni kilin ohlo oh wahlahng nan imwen keiru ehu pwe en kak kehlailda. Dahme kitail sukuhliki sang met? Limpoakohng mehn mpatail pil pidada kaidehn ihte irail akan me mih nan atail keinek, wehi, de lamalam.—Luk 10:25, 29, 30, 33-37.
Dahme Poakohng Mehn Mpatail Kin Wehwehki
8. Dahme Lipai irelaud 19 koasoia duwen iaduwen atail pahn kin kasalehda limpoak?
8 Poakohng mehn mpatail, duwehte poakohng Koht, sohte ihte wia pepehm ehu; ahpw e kin pidada atail wiewia. E pahn sawas ma kitail pahn tehkpene iren kosonned me kileledi nan Lipai 19 me kin kaweidki sapwellimen Koht aramas akan en poakohng mehn mparail kan duwehte ahr kin poakohng pein irail. Nan ireo kaweidki mehn Israel kan en mweidohng me semwehmwe kan oh mehn liki kan en iang ale wahn rahk. Sohte mweimwei en pirap, mwersuwed, de doadoahk sapwung. Nan ahnsou en kopwung, mehn Israel sohte pahn kin poupali. Mendahki irail pahn kin kihda kaweid ni ahnsou kan me anahn, kaweid oaritik kohwong irail: “Ke dehr kadakadaur nan kapehdomw lamalam suwed ong emen.” Lepin mahsen pwukat iangahki kosonned teikan kin oarepene mouren kosonned wet: “Ke en poakohng mehn mpomw duwehte omw kin poakohng pein uhk.”—Lipai 19:9-11, 15, 17, 18.
9. Dahme kahrehda Siohwa kaweidki mehn Israel kan en tohrohrasang wehi teikan?
9 Mendahkihte mehn Israel kan anahne kasalehda limpoak ohng meteikan, irail anahne tohrohrasang irail akan me kin kaudokiong koht likamw akan. Siohwa ketin panawih kin irail duwen keper kan oh pil imwilahn werek suwed. Karasepe ehu, Siohwa ketikihda kaweid pwukat me pid duwen sahpw akan me irail pahn kalowehdi: “Kumwail dehpa pwoudikihda emen irail de mweidohng noumwail seri kan en pwoudikinirail, pwe re pahn kahrehiong noumwail seri kan ar pahn sohpeisang Siohwa oh kaudokiong koht teikan. Ma re pahn wia met, engieng en Siohwa pahn lelohng kumwail.”—Deuderonomi 7:3, 4.
10. Dahme kitail en kalekeikitailsang?
10 Pil duwehte, Kristian akan anahne en dehr ehuiong irail akan me pahn kaluwetehla arail pwoson. (1 Korint 15:33) Kaweid wet kohwong kitail: “Kumwail dehr kapahrek kumwail ong me seupwoson akan,” irail akan me sohte wia kisehn mwomwohdiso en Kristian. (2 Korint 6:14) Oh kaweid pil kohwong Kristian akan en pwoudikihda “pil emen [Kristian].” (1 Korint 7:39, NW) Ahpw kitail en dehr mwohmwsuwediong irail akan me sohte kin iang kitail pwoson Siohwa. Krais mehkihla me dipan akan, oh mwohn ahr pwosonla, pali laud en irail kin wia mehkan me suwed ahpw mwuhr wekidala ahr mour oh wekiong Koht.—Rom 5:8; 1 Korint 6:9-11.
11. Ia ahl me keieu mwahu kitail en kasalehda limpoak ohng irail akan me sohte kin papah Siohwa, oh pwekida?
11 Ni atail pahn kin kasalehda limpoak ohng irail akan me sohte kin papah Koht, kitail anahne kahlemengih Siohwa. Mendahki Koht kin tateki me suwed, e kin kasalehda limpoak-kadek ohng koaros ni ah kin ketikihong koaros ahnsou mwahu en koluhla oh wiliakapwasang arail mour suwed pwe irail en kak ale mour soutik. (Esekiel 18:23) Siohwa “kupwurki koaros en wiliakapwala oh sohpeisang nan diparail kan.” (2 Piter 3:9) E kupwurki “aramas koaros en ale komourparail oh marainkihla me mehlel.” (1 Timoty 2:4) Iei me kahrehda Sises kaweidki nah tohnpadahk kan en kalohk oh kasukuhlih oh “padahkiong tohn wehi kan koaros; pwe re en wiahla [sapwellime] tohnpadahk.” (Madiu 28:19, 20) Ni atail kin iang wia doadoahk wet, kitail kin kasalehda atail limpoak ohng Koht oh pil mehn mpatail, ehi, iangahki atail imwintihti kan!
Limpoak ohng Riatail Kristian akan
12. Dahme wahnpoaron Sohn ntingihdi me pid duwen limpoak ohng riatail?
12 Wahnpoaron Pohl ntingihdi: “Kitail en wia mwahu ong aramas koaros; ahpw mehlel ong irail kan me kisehn atail pwoson.” (Kalesia 6:10) Nin duwen Kristian kei, kitail pwukoahki en kasalehda limpoak ohng irail akan me wia kisehtail nan pwoson—riatail kan ni pali ngehn. Ia wen kesempwal en limpoak wet? Ni en wahnpoaron Sohn kasalehda ire kesempwal wet, e ntingihdi: “Mehmen me kin kailongki rie, ih sounkam aramas emen . . . Ma mehmen kin nda, ‘I poakohng Koht,’ ahpw kin kailongki rie, ih aramas likamw men; pwe e sohte kak poakohng Koht me e sohte kilang, ma e sohte poakohng rie me pein ih kilikilang.” (1 Sohn 3:15; 4:20) Lepin lokaia pwukat me inenen kehlail. Sises Krais doadoahngki lepin lokaia pwukat “sounkam aramas” oh “aramas likamw” ohng Sehdan me Tepil. (Sohn 8:44) Kitail sohte men lepin lokaia pwukat en kadoadoahk ohng kitail!
13. Ni ahl dah kan me kitail kak kasalehda limpoak ohng riatail kan nan pwoson?
13 Kristian mehlel kan kin ale kasukuhl sang rehn Koht “poakpene nanpwung[arail].” (1 Deselonika 4:9) Atail limpoak en “dehr mihmihte ni lepin lokaia de koasoi, ahpw en mihmihte ni uhdahn limpoak mehlel me pahn sansalda sang ni atail wiewia kan.” (1 Sohn 3:18) Atail limpoak en “uhdahn mehlel.” (Rom 12:9) Limpoak kin kamwakid kitail en kin kadek, loallamwahu, mahk, kanengamah oh sohte peirin, aklapalap de pohnmwahso, aklemei, de mehwo. (1 Korint 13:4, 5; Episos 4:32) E kin kamwakid kitail en “uhpahpene nanpwung[atail].” (Kalesia 5:13) Sises padahkiong nah tohnpadahk ko en limpoakpene nanpwungarail duwehte ah kin ketin limpoakohng irail. (Sohn 13:34) Kahrehda Kristian emen pahn pil men tounmeteikihla pein moure pwehki rie kan nan pwoson ma met anahn.
14. Iaduwen atail pahn kak kasalehda limpoak nan atail peneinei?
14 Ni mehlel, limpoak anahne mie nanpwungen peneinei Kristian kan eri keieu nanpwungen ohl pwopwoud oh lih pwopwoud. Pwehki wen keren en nanpwungen ohl pwopwoud oh lih pwopwoud, Pohl mahsanih: “Ohl akan uhdahn pahn poakohng ar werek kan duwehte ar kin poakohng pein paliwararail kan.” E kapatahiong: “Ohl me kin poakohng eh werek, kin poakohng pein ih.” (Episos 5:28) Kitail pil kilang me iretikitik limau mwurin met, Pohl pil pwurehng kapwurehiong iren kehkehlik wet. Ohl pwopwoud men me kin poakohng eh werek sohte pahn kin alasang irail mehn Israel kan en ni mwein Malakai me sohte kin loalopwoatohng arail werek kan. (Malakai 2:14) E pahn kin kesempwaliki eh werek. E pahn kin poakohng ih duwehte Krais eh kin ketin poakohng mwomwohdiso. Pil duwehte, limpoak pahn kamwakid lih pwopwoud en wauneki eh werek.—Episos 5:25, 29-33.
15. Dahme limpoak en riatail kan me kin sansalkihda arail wiewia kin kamwakid meteikan en nda oh wia?
15 Eri e sansal me soangen limpoak wet kin wia kilelepen Kristian mehlel. Sises mahsanih: “Pwe ihme aramas koaros pahn esehki me kumwail nei tohnpadahk, ma kumwail pahn limpoakpene.” (Sohn 13:35) Atail limpoak pahn kamwakid aramas akan en men karanih Koht me kitail kin poakohng oh alasang. Karasepe ehu, ripoht wet wiawihda me pid duwen peneinei en Sounkadehde ehu nan Mozambique. “Se sohte kin kilang soahng wet. Mwurin souwas, kisinieng kehlail leledo, oh mwuri keteu mosul oh keteutakai tepida mweredi. Kisinieng kehlail kauwehla imwat me wiawihkihda ahlek, oh ipirasang oasmetehn imwat. Ni ahnsou me riat brother kan sang mwomwohdiso teikan me karanih kiht kohdo oh sewese kiht en onehda sapahl imwat, mehn mpat akan pwuriamweikihla met oh nda: ‘Amwail sarawien inenen mwahu. Se sohte kin ale soangen sawas duwehte men sang aht palien lamalam.’ Se pahkala nait Paipel oh kasalehiong irail iren Sohn 13:34, 35. Ahnsou wet tohto irail mehn mpat akan me tepidahr onop Paipel.”
Limpoak ohng Emenemen
16. Ia wekpeseng en limpoakohng pwihn ehu oh limpoak ohng emen aramas?
16 E sohte kin apwal en poakohng mehn mpatail kan nin duwen pwihn ehu. Ahpw en poakohng emen aramas pahn kak weksang dahme kitail ese. Karasepe ehu, ekei aramas kin kasalehda ahr poakohng mehn mparail kan ni ahr kihda sawas ohng pwihn ehu me kin apwalih irail akan me anahne sawas. Ni mehlel, e inenen mengei en nda me kitail limpoak ohng mehn mpatail sang en limpoakohng atail tohn doadoahk emen me sohte kin nsenohkin kitail, aramas lemei men me kin mih limwahtail, de kompoakpatail men me kin kansensuwedih kitail.
17, 18. Iaduwen Sises kasalehda limpoak ohng aramas akan, oh ia kahrepen eh wia met?
17 Nan irair me pid limpoakohng aramas emen, kitail ale mehn kasukuhl mwahu sang rehn Sises me kin kasalehda ni unsek duwen sapwellimen Koht irair akan. Mendahki e ketido sampah pwehn kihsang dipen sampah wet, e kin kasalehda limpoak ohng aramas akan—lih soumwahu men, emen me soumwahu en tokutok, seri men. (Madiu 9:20-22; Mark 1:40-42; 7:26, 29, 30; Sohn 1:29) Duwehte met, kitail kin kasalehda poakohng mehn mpatail sang atail wiewia ohng irail akan me kitail kin tuhwong nan ehu ehu rahn.
18 Kitail en dehr manokehla me poakohng mehn mpatail kin wia kasalepen atail poakohng Koht. Mendahki Sises sewesehda me semwehmwe kan, kamwahuiala me soumwahu kan, oh kamwenge me duhpeklahr kan, kahrepen eh kin wia mepwukat iangahki pil padahk ohng pokon kan iei en sewese aramas en kamwahuiala ahr nanpwungmwahu ohng Siohwa. (2 Korint 5:19) Sises kin wia mehkoaros ohng kalinganpen Koht, e sohte kin manokehla me e kin weliwelian oh wia kasalepen Koht me e kin poakohng. (1 Korint 10:31) Ni atail kin idawehn mehn kahlemeng en Sises, kitail pil kak kasalehda atail limpoak mehlel ohng mehn mpatail kan oh pil ahnsowohte sohte wia kisehn sampah en aramas suwed akan.
Iaduwen Atail Pahn Poakohng Mehn Mpatail Duwen Atail Kin Poakohng Pein Kitail?
19, 20. Ia wehwehn en poakohng mehn mpatail kan duwen atail kin poakohng pein kitail?
19 Sises mahsanih: “Ke pahn poakohng mehn mpomw duwen omw kin poakohng pein uhk.” Aramas kin poakohng pein irail ni irair me toupahrek oh me kasalehda eh wauneki pein ih. Ma soh, eri sohte pahn mie wehwehn kosonnedo. Kitail dehr sawehwe oh kihkihong me dene soangen limpoak wet duwehte soangen limpoak ohng pein emen me kin wiawi ni irair roporop me duwehte soangen limpoak me wahnpoaron Pohl kawehwehda nan 2 Timoty 3:2. Ahpw e kin wehwehki en wauneki pein ih ni ahl me toupahrek. Emen ohl me samanih Paipel kawehwehda me e wia “soangen limpoak wet me emen kin ahneki ohng pein ih kin toupahrek oh e sohte kin ahneki soangen madamadau me ‘I me nohn mwahu oh ile’ oh sohte pil ahneki madamadau me ‘I me nohn suwed oh sohte katepei.’”
20 En poakohng meteikan duwehte atail kin poakohng pein kitail kin wehwehki me kitail kin kilangwohng meteikan ni soangen irairohte me kitail men irail en kilangwohng pein kitail oh kitail en wiaiong irail mehkan me kitail men irail en pil wia ohng kitail. Sises mahsanih: “Eri, kumwail wiahiong meteikan me kumwail kin anahne aramas akan en kin wiahiong kumwail.” (Madiu 7:12) Sises sohte koasoakoasoia kitail en mwohndi oh medewehda dahme aramas akan wiaiong kitail mahs oh eri kapwungohng irail. Ahpw e wehwehki me kitail en medewe dahme kitail mwahuki aramas en wiaiong kitail oh kitail en mwekid pahrekiong met. Sises pil sohte koasoakoasoiahte kompoakpatail kan de riatail kan. E doadoahngki lepin lokaia “aramas” ele pwehn kasalehda me kitail en wia met ohng aramas koaros me kitail kin tuhwong.
21. Ni atail kin kasalehda limpoak ohng mehteikan, dahme kitail kin kasalehda?
21 En poakohng mehn mpatail pahn pere kitail sang wia mehkan me suwed. Wahnpoaron Pohl ntingihdi: “Kosonned ko me mahsanih, ‘Dehr kamwahl; dehr kemehla aramas; dehr pirap; dehr noahrok,’ mouren kosonned pwukat oh pil mouren kosonned teikan, oaralape mehteieu: ‘Ke en poakohng mehn mpomw, duwen omw kin poakohng pein uhk.’ Ma ke kin poakohng mehn mpomw, ke sohte pahn wiahiong me suwed.” (Rom 13:9, 10) Limpoak pahn kamwakid kitail en rapahki ekei soangen ahl akan me kitail kak wiahiong mehteikan mehkan me mwahu. Ni atail kin poakohng aramas, kitail kin kasalehda me kitail pil kin poakohng Ih me ketin kapikada aramas rasehng Ih, Siohwa Koht.—Senesis 1:26.
Iaduwen Ke Pahn Sapeng?
• Ihs me kitail en kasalehiong limpoak, oh pwekida?
• Iaduwen atail kak kasalehda limpoak ohng irail akan me sohte kin papah Siohwa?
• Iaduwen Paipel kin kawehwehda duwen soangen limpoak me kitail en ahneki ohng riatail brother kan?
• Ia wehwehn kitail en poakohng mehn mpatail kan duwehte atail kin poakohng pein kitail?
[Kawehwehpen kilel kan nan ehu ehu pali 24]
“Ihs me uhdahn wia mehn mpei?”
[Kawehwehpen kilel kan nan ehu ehu pali 27]
Sises pil kin kasalehda limpoak ohng aramas akan