Limpoakohng Koht Me Kin Limpoakohng Uhk
“Ke pahn poakohng Kaun-o omw Koht sang nan kapehdomw unsek, sang ni ngenomw unsek, sang ni omw lamalam koaros unsek.”—MADIU 22:37.
1, 2. Dahme elehda peidek me pid duwen kosonned me keieu kesempwal?
PEIDEK me kohda kin kasalehda duwen wekpeseng en lamalam en irail Parisi kan en mwein Sises. Sang nanpwungen kosonned akan me tohtohsang kosonned 600 me wiahda Kosonned en Moses, mehnia kosonned me keieu kesempwal? Iaduwen, kaidehn kosonned me pid duwen meirong me keieu kesempwal? Pwe duwen me sansal, meirong kan kin wiawi pwehn ale mahkpen dihp oh pwehn wia kaping kalahngan ohng Koht. De iaduwe, kosonned me pid duwen sirkumsais sou wia kosonned me keieu kesempwal? Met pil kesempwal pwe sirkumsais kin wia kilelepen inou me Siohwa ketin wiahiong Eipraam.—Senesis 17:9-13.
2 Ni pali teio, irail akan me kin kesempwaliki tiahk de kosonndi en mahs kin kawehwe me kosonned koaros me Koht ketikihda inenen kesempwal—mendahki ekei pahn mwomwen sohte nohn kesempwal—e pahn sapwung en kesempwalki ekei kosonned laudsang ekei. Parisi ko eri kosonnehdi irail en idek rehn Sises peidek kasapwurpwur wet. Ele e pahn nda mehkot me pahn kahrehda en sohla nohn likilik. Emen irail kohla rehn Sises oh idek: “Mehnia kosonned nan pelien Kosonnedo me keieu kesempwal?”—Madiu 22:34-36.
3. Dahme Sises kasalehda duwen mehnia kosonned me keieu kesempwal?
3 Pasapeng me Sises wia inenen kesempwal ohng kitail rahnwet. Nan ah pasapeng, e kawehwehda dahme kin oh pahn keieu kesempwal ahnsou koaros nan kaudok mehlel. Ni eh koasoia dahme kileledi nan Deuderonomi 6:5, Sises mahsanih: “‘Ke pahn poakohng Kaun-o omw Koht sang nan kapehdomw unsek, sang ni ngenomw unsek, sang ni omw lamalam koaros unsek.’ Ih met kosonned me keieu lapalap oh kesempwal.” Mendahki Parisio idek duwen ehute kosonned, Sises kihong ih pil ehu kosonned. Ni eh koasoiahda dahme kileledi nan Lipai 19:18 oh mahsanih: “A me keriaun kesempwal, me rasehngete met, iei: ‘Ke pahn poakohng mehn mpomw duwen omw kin poakohng pein uhk.’” Sises doula oh kasalehda me kosonned riau pwukat wia poahsoanen kaudok mehlel. Pwe en dehr anahne kasalehda irekidi en mehnia kosonned me keieu kesempwal nin duwen me irail Parisi ko men en wia, Sises mahsanih: “Kosonned riau pwukat, iei me poahsoanen pelien Kosonned en Moseso oh padahk en soukohp ako.” (Madiu 22:37-40) Nan artikel wet, kitail pahn kilang mehnia rehn kosonned riau pwukat me keieu kesempwal. Dahme kahrehda kitail anahne limpoak ohng Koht? Iaduwen atail kin kasalehda duwen met? Oh iaduwen kitail kak kekeirada soangen limpoak wet? E kesempwal kitail en ese pasapengpen peidek pwukat, pwehki ma kitail men kaperenda Siohwa, kitail anahne limpoak ohng ih ki mohngiongatail unsek, mour unsek, oh madamadau unsek.
Kesempwalpen Limpoak
4, 5. (a) Dahme kahrehda Parisio sohte pwuriamweiki dahme Sises mahsanih? (b) Dahme keieu kesempwal ohng Koht me laudsang meirong oh kisakis kan?
4 Likamwete Parisio me peidek rehn Sises sohte nsensuwedkihla de pil pwuriamweikihla pasapeng me e alehdi. E wehwehki me limpoakohng Koht wia mehkot kesempwal ehu nan kaudok mehlel, mendahkihte tohto sohte kin kasalehda met. Nan sinakoke kan, e kin wia tiahk ehu aramas en kin wadek Shema, de kapakap ehu en mehn Ipru ni ngihl laud, iangahki ire me dierek nan Deuderonomi 6:4-9, me Sises kasalehda. Nin duwen me pahrekiong pwuhken Mark, Parisio eri ndahiong Sises: “Mehlelete rehmwi, Sounpadahk! Me pwung me komwi mahsanihen: pwe Kaunohte me Koht, oh sohte pil emen. Aramas eri uhdahn pahn poakohng Koht nan kapehde unsek, eh lamalam koaros unsek, oh eh kehl unsek; oh pil pahn poakohng mehn mpe duwen eh kin poakohng pein ih. Kapwaiada kosonned riau pwukat mwahusang mehlel atail pahn meirongkihong Koht mahn pohn pei sarawi kan oh wia soangen meirong teikan.”—Mark 12:32, 33.
5 Ehi, mendahkihte meirong en isihs oh meirong teikan kin anahne wiawi nin duwen me Kosonnedo kasalehda, dahme kin keieu kesempwal rehn Koht iei limpoak me kin kamwakid mohngiong en sapwellime ladu kan. Meirongkihong Koht kisin menpihr men sang ni limpoak oh poadidi kin kesempwalsang meirongki sihpw ohl kid kei me kin wiawi ni madamadau de kahrepe sapwung. (Maika 6:6-8) Tamanda koasoipen liohdi semwehmwe me Sises mahsanih ni tehnpas nan Serusalem. Kisin sent tikitik riau me e kesehdi nan dewen meirongo sohte kak pwainda kisin menpihr men. Ahpw, meirong wet, me wiawi sang ni limpoak ohng Siohwa, inenen laud mehlel sang meirong teikan me irail me kepwehpwe kan kihda me kohsang ahr pai me daulihala. (Mark 12:41-44) Ia wen ah kin wia mehn kangoang ehu en ese me Siohwa kin inenen kesempwalki irair me kitail koaros kak kasalehda mendahki wekpeseng en atail irair kan—atail limpoak ohng ih!
6. Dahme Pohl ntingihdi duwen kesempwalpen limpoak?
6 Pwehn kasalehda kesempwalpen limpoak nan kaudok mehlel, wahnpoaron Pohl ntingihdi: “Ma I ese lokaiahn aramas akan oh pil mahsen en tohnleng kan—ahpw sohte limpoak rehi, nahn ei lokaia kan pahn rasehng ngilen pehl ehu me sekesek mwahl. Ma I aleier kisakis en kokohp, ma I ese mehkoaros oh dehdehkihla me rir kan koaros, ma I diren soangen pwoson kehlail me kin kamwakidada nahna kan—ahpw sohte limpoak rehi, nahn kaidehk ngehi mehkot. Ma I pahn kisakiskihwei mehkoaros me I ahneki, oh ma I pil pahn mweidala paliwereiet—ahpw sohte limpoak rehi, sohte mwahn katep ehu pahn kohieng ie.” (1 Korint 13:1-3) E sansal me limpoak inenen kesempwal nan atail kaudok ma kitail men kaperenda Koht. Ahpw iaduwen atail pahn kin kasalehda limpoak ohng Siohwa?
Iaduwen Kitail Kin Kasalehda Limpoak ohng Siohwa
7, 8. Iaduwen kitail kak kasalehda atail limpoak ohng Siohwa?
7 Tohto kin kamehlele me limpoak wia pepehm ehu me kitail sohte kak powehdi; aramas kin koasoia duwen limpoak ohng emen. Ahpw limpoak mehlel sohte wiahte pepehm ehu me kitail kin ahneki. E kin sansal sang atail wiewia, kaidehn lamalam de pepehm. Paipel kawehwehda limpoak nin duwen “ahl apwoat me siksang mehlel mehkoaros” oh mehkot me kitail en “kin ngiangihong mwohn mehkoaros.” (1 Korint 12:31; 14:1) Kangoang kin kohwong Kristian kan en kin kasalehda limpoak, kaidehn sangete “ni lepin lokaia de koasoi, ahpw en mihmihte ni uhdahn limpoak mehlel me pahn sansalda sang ni atail wiewia kan.”—1 Sohn 3:18.
8 Limpoak ohng Koht kin kamwakid kitail en wia dahme pahn kaperenda ih oh kitail en kin uhki oh men kawahuihala sapwellime kaunda ki atail lokaia oh wiewia. E kin kamwakid kitail en dehr limpoakohng sampah wet oh elehkan me sohte kin pahrekiong elen Koht. (1 Sohn 2:15, 16) Irail akan me kin limpoak ohng Koht kin tateki me suwed. (Melkahka 97:10) Limpoak ohng Koht pil kin pidada limpoak ohng mehn mpatail kan, oh ih met me kitail pahn koasoiapene nan artikel en mwuhr. Pil patehng met, ni atail kin limpoak ohng Koht, kitail anahne en pil kasalehda peik. Paipel mahsanih: “Pwe iet duwen wehwehn poakohng Koht: kitail en peikiong sapwellime kosonned akan.”—1 Sohn 5:3.
9. Iaduwen Sises kasalehda eh limpoak ohng Koht?
9 Sises kasalehda ni unsek duwen wehwehn limpoak ohng Koht. Limpoak kamwakid ih en pwilikihdi eh wasa nanleng oh kohdihdo pohn sampah pwehn mour nin duwen aramas emen. E kamwakid ih en kalinganahda Semeo ki eh wiewia kan oh eh padahk. Limpoak kamwakid ih en “weid nan elen peik lao lel mehla” (Pilipai 2:8) Peik wet—kasalepen eh limpoak—ritingada ahl me irail me lelepek kan kak pwungla mwohn Koht. Pohl ntingihdi: “Nin duwen sapeik en aramas tehmen [Adam] eh kahrehiong aramas tohto dihp, ih pil duwen peik en aramas tehmen [Sises Krais] pahn kapwungala aramas koaros mwohn silangin Koht.”—Rom 5:19.
10. Dahme kahrehda limpoak ohng Koht kin pidada peik?
10 Duwehte Sises, kitail kin kasalehda atail limpoak sang ni atail kin peikiong Koht. Sapwellimen Sises wahnpoaron kompoak Sohn ntingihdi: “Limpoak me I kasaleweiet wehwehki me kitail en peikiong kosonned akan en Koht.” (2 Sohn 6) Irail akan me kin limpoakohng Siohwa ni mehlel kin inengieng sapwellime kaweid. Ni arail kin pohnese me irail sohte kak pweida ma irail pein kaweid ahr kahk akan, irail kin likih sapwellimen Koht erpit oh uhpahiong sapwellime kaweid me kin wiawi ni limpoak. (Seremaia 10:23) Irail duwehte mehn Peria kan me kin “ngoangki mehlel” alehda sapwellimen Koht mahsen oh inengieng kapwaiada kupwuren Koht. (Wiewia 17:11) Irail kin kasawih iren Paipel kan ni keneinei pwehn wehwehkihla mehlel duwen kupwuren Koht, oh met sewese irail en kak kasalehda limpoak sang ni arail wiewia en peik kan.
11. Ia wehwehn en limpoak ohng Koht ki atail mohngiong, madamadau, mour, oh kehl unsek?
11 Nin duwen me Sises mahsanih, limpoak ohng Koht kin pidada atail mohngiong, madamadau, mour, oh kehl unsek. (Mark 12:30) Soangen limpoak wet kin pwilisang mohngiongatail, me pidada atail pepehm, ineng, oh madamadau loal akan, oh kitail kin inenen inengieng kaperenda Siohwa. Kitail pil kin kasalehda limpoak sang ni atail madamadau. Kitail sohte kin maskun ni atail kin poadidi, kitail wehwehkihla duwen Siohwa—sapwellime irair akan, koasoandi kan oh kupwure kan. Kitail kin doadoahngki atail mour unsek pwehn papah oh kapinga ih. Oh kitail pil kin doadoahngki atail kehl ni irairohte.
Kahrepen Kitail en Limpoak ohng Siohwa
12. Dahme kahrehda Koht kupwurki kitail en limpoak ohng ih?
12 Ehu kahrepen kitail en limpoak ohng Siohwa iei pwehki e kin ketin kupwurki kitail en kasalehda sapwellime irair akan. Koht kin wia karasepe keieu mwahu duwen limpoak. Wahnpoaron Sohn ntingihdi “Koht iei limpoak.” (1 Sohn 4:8) Aramas wiawihda ni mwomwen Koht, kitail wiawihda en ahneki irair en limpoak. Ni mehlel, sapwellimen Siohwa kaunda kin poahsoankihda limpoak. E kin kupwurki irail akan me kin limpoakohng ih oh inengieng mih pahn sapwellime kaunda pwung. Ni mehlel, limpoak anahn ehu pwehn mie popohl oh miniminpene nanpwungen sapwellime kepikipikda kan koaros.
13. (a) Dahme kahrehda poangoak kohwong mehn Israel kan me mahsanih: “Poakohng Kaun-o omw Koht”? (b) Dahme kahrehda e konehng Siohwa en kasik kitail en limpoak ohng ih?
13 Ehu kahrepe me kitail kin limpoak ohng Siohwa iei pwehki kitail kin kalahnganki dahme e ketin wia ohng kitail. Tamanda dahme Sises mahsanihong mehn Suhs ako: “Ke pahn poakohng Kaun-o omw Koht.” Sohte kasikpen irail en limpoak ohng emen me irail sohte karanih oh me irail sohte ese. Irail pahn poakohng Ih me kin ketin kasalehiong irail sapwellime limpoak. Siohwa iei arail Koht. Ih me ketin wa irail sang Isip oh wahdohng nan Sapwen Inou, Ih me ketin doareirail, apwalih irail, oh kesempwalki irail, Ih me ketin kaiahne irail ni limpoak. Oh nan rahnwet, Siohwa iei atail Koht, iei ih me ketikihda Sapwellimeo en tomwki kitail pwe kitail en kak ale mour soutik. Eri, ia wen eh inenen konehng Siohwa en ketin kasik kitail en kasapahl limpoakohng ih! Atail limpoak wia limpoak en kasapahl kalahngan; poangoak kohwong kitail limpoakohng Koht me kin ketin limpoak ohng kitail. Kitail limpoak ohng Ih me “tepin limpoak ong kitail.”—1 Sohn 4:19.
14. Iaduwen sapwellimen Siohwa limpoak duwehte limpoak en pahpa men de nohno men?
14 Sapwellimen Siohwa limpoak ohng aramas duwehte limpoak en pahpa de nohno men ohng nah seri kan. Mendahki ara soh unsek, pahpa oh nohno limpoak kan kin doadoahk laud oh apwalih neirail seri kan erein sounpar tohto, oh kin tounmeteikihla dipwisou de mwohni tohto oh pil soahng teikan. Pahpa oh nohno kan kin kaweid, kangoange, utung oh kaiahne neirail seri kan pwehki irail men neirail seri kan en peren oh pweida. Dahme pahpa oh nohno kan kin men neirail seri kan en kasapahlkihong ira? Irail kin mwahuki neirail seri kan en limpoak ohng irail oh katengehdiong nan mohngiongarail mehkan me irail padahkiong irail pwehn mwahu ohng pein irail. Eri, e sou pil konehng Samatail me unsek me ketiket nanleng en kasik kitail en kasalehda atail limpoak oh kalahngan ohng mehkoaros me e ketin wia ohng kitail?
Kekeirada Limpoak ohng Koht
15. Ia kahk keieu en kekeirada limpoak ohng Koht?
15 Kitail saikinte kilang Koht de rong ngileo. (Sohn 1:18) Ahpw e ketin luke kitail en tapihada nanpwungmwahu limpoak ehu ohng ih. (Seims 4:8) Iaduwen atail kak wia met? Tepin kahk me kitail pahn wia pwe kitail en kak limpoak ohng emen iei en wehwehkihla mehmeno; e apwal kitail en ahneki pepehm loal ohng emen me kitail sohte ese. Siohwa ketikihong kitail sapwellime Mahsen, Paipel, pwe kitail en kak sukuhliki duwen ih. Ihme kahrehda, ki sapwellime pwihn, Siohwa kin ketin kangoange kitail en wadek Paipel kaukaule. Iei Paipel me kin padahkiong kitail duwen Koht, sapwellime irair kan, oh duwen eh wiewia kan ohng aramas akan erein pahr kid kei me samwalahr. Ni atail kin doudouloale mepwukat, atail wehwehki duwen ih oh limpoak ohng ih kin wie lalaudla.—Rom 15:4.
16. Iaduwen atail kin medemedewe duwen en Sises doadoahk en kalohk kin kalaudehla atail limpoak ohng Koht?
16 Ehu ahl kesempwal me kitail kak kalaudehla atail limpoak ohng Siohwa iei en kin medemedewe duwen mour en Sises oh ah doadoahk en kalohk. Oh pwehki Sises kin mwekid duwehte Semeo, e kak koasoia: “Mehmen me kilangieier pil kilangehr Sahm.” (Sohn 14:9) Ni Sises kin poakehla liohdi men oh kaiasada nah pwutak iehros, met sou kin kamwakid ahmw pepehm? (Luk 7:11-15) E sou kin inenen kaperen en ese me e—Sapwellimen Koht Pwutak oh ohl me keieu lapalap nanpwungen aramas akan me momour sang mahs kohkohdo—kin kasalehda aktikitik oh widen nehn sapwellime tohnpadahk ako? (Sohn 13:3-5) E sou kin kamwakid uhk en ese me mendahki e lapalap oh loalokong sang aramas koaros, ahpw aramas koaros iangahki seri kan kak pwarala reh? (Mark 10:13, 14) Ni atail kin doudouloale oh kalahnganki mepwukat, kitail kin duwehla irail Kristian akan me Piter kin koasoia ni eh ntingihdi: “Mehlel me kumwail poakohng [Sises], mehnda ma kumwail sohte kin kilang;” (1 Piter 1:8) Ni atail limpoak ohng Sises kin lalaudla, atail limpoak ohng Siohwa pil kin wie lalaudla.
17, 18. Soangen sawas limpoak dah kan me Siohwa kin ketikihda me kitail kak doudouloale me pahn sewese kekeirada atail limpoak ohng ih?
17 Ehu ahl me kak sewese kalaudehla atail limpoak ohng Koht iei ni atail pahn kin medemedewe duwen sapwellime mwekid en limpoak ni eh kin ketikihong kitail soahng tohto me kahrehiong kitail en kak perenki atail mour—lingan en kepikipikda kan, soangen mwenge iou tohto kan me kitail kak kang, pirien limpoak en kompoakpatail kan, oh iangahki soahng tohto teikan me kin kihong kitail peren oh nsenamwahu. (Wiewia 14:17) Ni atail loalokongki duwen ih kin wie lalaudla, kitail kin ahneki kahrepe tohto en kalahnganki sapwellime kamwahu oh kadek me kin poatopoat. Medewehla duwen mehkan me Siohwa kin ketin kapaiahki pein kowe. Ke sou pahn pwungki me e warohng ke en kasalehiong ih ahmw limpoak?
18 Ehu kisehn kisakis kan me e ketikihong kitail iei kisakis en kapakap me wia elen pwuralahng reh ni ahnsou soh lipilipil kan, oh kitail ese “Sounkaronge kapakap” kin ketin karonge atail kapakap akan. (Melkahka 65:2, NW) Siohwa ketikihong Sapwellime Ohl kompoake pwung en kaunda oh kadeikada. Ahpw e sohte ketikihong meteikan, pil iangahki sapwellime Ohl, pwung en karonge kapakap akan. Pein ih kin keting karonge atail kapakap akan. Ihme en Siohwa kin ketin nsenohki ni limpoak pein emenemen kitail kin kahrehiong kitail en men karanih.
19. Soangen inou dah kan me Siohwa ketin inoukihda me kin kahrehiong kitail en karanih?
19 Kitail pil kin kerenlang Siohwa ni atail kin medemedewe duwen kupwure ohng aramas ni ahnsou kohkohdo. E ketin inoukihda me e pahn ketikihsang soumwahu, nsensuwed, oh mehla. (Kaudiahl 21:3, 4) Ni ahnsou me aramas pahn unsekla, sohte me pahn kin pahtoula, mworusala, de lokolokki kahpwal kan. Sohlahr pahn mie duhpek, paisuwed, oh mahwen. (Melkahka 46:9; 72:16) Sampah pahn wiahla paradais ehu. (Luk 23:43) Siohwa pahn ketikihda kapai pwukat, kaidehn pwehki e anahne, ahpw pwehki e limpoakohng kitail.
20. Dahme Moses mahsanih duwen kamwahupen poakohng Siohwa?
20 Kahrehda, mie kahrepen kitail en poakohng atail Koht oh kekeirada limpoak wet. Iaduwen, ke pahn doula oh kakehlakahla ahmw poakohng Koht, mweidohng ih en ketin kaweid ahmw kahk akan? Pein ahmw pilipil met. Moses kin pohnese kamwahupen kekeirada oh kolokolete ahmw limpoak ohng Siohwa. Moses mahsanih met ohng mehn Israel en mahs ako: “Eri, pilada mour. Poakohng KAUN-O, amwail Koht, kapwaiada sapwellime mahsen oh loalopwoatohng, pwe ih me pahn kahrehiong kumwail oh kadaudokamwail kan mour werei.”—Deuderonomi 30:19, 20.
Ke Tamataman?
• Dahme kahrehda e kesempwal kitail en poakohng Siohwa?
• Iaduwen kitail kak kasalehda atail poakohng Koht?
• Ia kahrepe kan me kitail en poakohngki Siohwa?
• Iaduwen kitail kak kekeirada atail limpoak ohng Koht?
[Kawehwehpen kilel kan nan ehu ehu pali 18]
Siohwa kin inenen kesempwaliki mehkot me kitail koaros kak kasalehda—atail limpoak ohng ih
[Kawehwehpen kilel kan nan ehu ehu pali 21]
“Mehmen me kilangieier pil kilangehr Sahm.”—Sohn 14:9