Ia Uwen Deilahn Omw Limpoak?

“Ke pahn poakohng mehn mpomw duwen omw kin poakohng pein uhk.”​—MADIU 22:39.

1. Ma kitail kin poakohng Siohwa, dahme kahrehda kitail pil anahne poakohng mehn mpatail kan?

NI ahnsou me emen ohl idek rehn Sises mehnia kosonned me keieu kesempwal, Sises ketin sapengki: “Ke pahn poakohng Siohwa omw Koht sang nan kapehdomw unsek, sang ni ngenomw unsek, sang ni omw lamalam koaros unsek.” Mwurin met, e mahsanih duwen kosonned keriau me kin duwehte kosonned keieu: “Ke pahn poakohng mehn mpomw duwen omw kin poakohng pein uhk.” (Madiu 22:37, 39) Ei, limpoak ong mehn mpatail kan kin wia kilel en Kristian mehlel men. Ni mehlel, ma kitail kin poakohng Siohwa, kitail anahne poakohng mehn mpatail kan. Dahme kahrehda? Pwehki kitail kin kasalehda atail limpoak ong Koht sang ni atail kin peikiong sapwellime Mahsen, oh sapwellime Mahsen kin padahkiong kitail en poakohng mehn mpatail kan. Ihme kahrehda, e sansal me ma kitail sohte kin poakohng riatail brother oh sister kan, atail limpoak ong Koht sohte mehlel.​—Rom 13:8; 1 Sohn 2:5; 4:20, 21.

2. Mehnia soangen limpoak kitail anahne kasalehong mehn mpatail kan?

² Ni ahnsou me Sises mahsanih me kitail anahne poakohng mehn mpatail kan, e koasoia ehu soangen limpoak me laud sang limpoak nanpwungen kompoakpah kan. Oh pil, e kin koasoia duwen ehu soangen limpoak me weksang limpoak nanpwungen peneinei kan oh nanpwungen ohl oh lih. E koasoia duwen soangen limpoak me Siohwa kin sapwellimaniki ong sapwellime ladu inouda kan oh limpoak me irail pil kin kasalehong Siohwa. (Sohn 17:26; 1 Sohn 4:11, 19) Sounkawehwehn kosonned en Mehn Suhs men​—nin duwen me Sises dehdehki: e kin koasoi ni pwung—​pwe e kin pwungki dahme Sises mahsanih, me limpoak ong Koht pahn anahne kohsang “nan kapehd unsek, ngehn unsek, lamalam koaros, oh kehl unsek.” (Mark 12:28-34) E pwung. Limpoak me Kristian kin kekeirada ong Koht oh mehn mpatail kan kin pid atail pepehm kan oh atail madamadau kan. Mongiong kin pehm soangen limpoak oh limpoak wet kin mwekidkihda madamadau kan.

3. (a) Iaduwen Sises padahkiong emen “sounpadahk en kosonnedo” me e anahne kalaudehla eh madamadau ong ihs me mehn mpe? (b) Iaduwen karasaras en Sises kin dokedoke Kristian akan nan rahnpwukat?

³ Nin duwen me Luk ntingihdi, ni ahnsou me Sises mahsanih me kitail anahne poakohng mehn mpatail kan, “emen sounpadahk en Kosonnedo” idek rehn Sises: “A ihs me mehn mpei?” Sises eri kasalehda duwen karasaras ieu. Emen ohl lelohng lokolok, oh loallap suwed kei kulihasang eh likou kan oh kemeselihte lao kalipwelipwehda kereniong mehla. Keieu, samworo men oh mwuri, mehn Lipai men keid limwahn ohlo. Ahpw ira koaros kilangada ohlo oh douluhllahsang keid apali ahlo. Ahpw, mwurin met, ohlen Sameria men me wiewia eh seiloak oh pil keid wasao, ni eh kilangada ohlo, nan kapehde mwekidikihda eh poakehla. Mehnia ohl sang nanpwungen ohl silimen pwukat me wiahla mehn mpe ong ohl menet me soahn? Pasepeng me inenen sansal. (Luk 10:25-37) Ohlo me kin wia sounpadahk en Kosonnedo ele mwein pwuriamweikihla rong Sises mahsanih me mehn Sameria men pahn kak wiahla mehn mpe mwahusang emen samworo oh Mehn Lipai men. E sansal, me Sises kin sewese ohlo en poakohng mehn mpe ni ahl me deilahsang dahme e kin lemeleme. Kristian akan pil anahne kasalehda soangen limpoak wet. Kitail pahn koasoia duwen ihs me arail limpoak kin kohwong.

Limpoak nan Peneinei

4. Iawasa Kristian akan pahn tepin doadoahngki limpoak?

⁴ Kristian akan kin poakohng pein arail tohnpeneinei​—lih pwopwoud kan kin poakohng ahr pwoud ohl kan, ohl pwopwoud kan kin poakohng arail pwoud lih kan, oh pahpa oh nohno kan kin poakohng neirail seri kan. (Eklesiasdes 9:9; Episos 5:33; Taitus 2:4) Ni mehlel, soangen limpoak me mihmi nanpwungen tohnpeneinei kin wiawi nan pali moron en peneinei kan. Ahpw, ripoht kan duwen pwopwoud kan me kin mweipeseng, ohl pwopwoud kan kin keme arail pwoud lih kan, seri kan me sohte ale epwelparail de arail nohno oh papah kin nohn daulihla kemeirailla: ripoht pwukat kin kasansalehda me peneinei kan kin lelohng kahpwal laud nan rahnpwukat, oh limpoak me kin wiawi nanpwungen tohnpeneinei kan sohte nohn kehlail pwe e sohte kin kak uhdahn kahrehong irail en miniminpene ni mehlel. (2 Timoty 3:1-3) Pwe mouren peneinei pahn kak pweida mwahu, Kristian akan anahne kasalehda soangen limpoak me Siohwa oh Sises kin sapwellimaniki.​—Episos 5:21-27.

5. Pahpa oh nohno kan kin ale sawas sang rehn ihs ong apwaliahda neirail seri kan, oh met kin imwikihla dah ong aramas tohto?

⁵ Pahpa oh nohno Kristian akan kin kilangwong neirail seri kan nin duwen kisakis kesempwal kan me Siohwa ketikihong irail, oh re kin koapworopworki me Ih me pahn kak sewese irail en apwalihada neirail seri kan ni ahl me keieu mwahu. (Melkahka 127:3-5; Lepin Padahk 22:6) Ni ahl wet, re kin kekeirada loalerail irairen limpoak en Kristian, me pahn sewese irail en perehla neirail seri kan sang kahpwal suwed akan me pwulopwul kan pahn kakete lohdi pah. Pwehki pahpa oh nohno Kristian tohto kin kapwaiada met, re kin ahneki peren me duwehte nohno men nan sapwen Netherlands lelohng. Mwurin e kilangada nah pwutak papidaisla​—ih emen sang nanpwungen aramas meh 575 me papidaisla nan sapwen Netherlands nan pahr samwalahro—​e ntingihdi met: “Ni ahnsouwet, ai doadoahk laud erein sounpar 20 pweidahr. I kakehr manokehla duwen ahnsou laud oh pil doadoahk laud​—iangahki nsensuwed, oh nannanti—​soahng pwukat me I tohnmeteiki pwehn sewese nei pwutak.” Nohno menet ahneki peren laud ahnsou me e kilang nah pwutak pilada nan eh mour en papah Siohwa sang ni pein nsene. Nan pahr me ahpwtehn neko, mie kekeirada kapw en sounkalohk meh 31,089 nan sapwen Netherlands oh tohtohn irail iei irail akan me sukuhlikier sang rehn arail pahpa oh nohno kan en poakohng Siohwa.

6. Iaduwen limpoak en Kristian kak kakehle pwopwoud kan?

⁶ Pohl kin kawehwehda me limpoak “kin kapatapene oh oarepene mehkoaros pwe en wiahla ehu ni mehlel,” oh e kak sewese pwopwoud kan en nsenamwahu mendahki re kin lelohng kahpwal akan. (Kolose 3:14, 18, 19; 1 Piter 3:1-7) Ni ahnsou me ohl emen sang Rurutu, deke tikitik ehu me dohki mwail 450 sang Tahiti, tepida onop Paipel rehn Sounkadehdehn Siohwa kan, eh pwoud lih tepida uhwong ih kehlail. Kedekedeo, liho kohkohlahsang eh pwoud oh wahla neira seri kan, oh irail eri kohla kousoanla nan Tahiti. Ahpw, ohlo kin kasalehda eh limpoak sang ni eh kin kaukaule kadaralahng eh pwoud mwohni kan oh e kin kalap telephonelahng eh pwoud oh kin idek reh ma ih oh neira seri kan anahne mehkot. Ihme e wia uwen me e kak pwehn kapwaiada eh pwukoa nin duwen pwukoa en Kristian men. (1 Timoty 5:8) E kin wia kapakap ahnsou koaros pwe eh peneinei pahn kak pwurpene. Ehu rahn, eh pwoud pwurala reh. Ni ahnsou me e pwurala reh, ohlo kin kasalehong eh pwoud “limpoak oh kanengamah.” (1 Timoty 6:11) Nan 1998, e papidaisla oh mwuri, e inenen peren pwe eh pwoud pwungki me e men onop Paipel. Onop en Paipel me wiawi rehn lih menet iei emen sang nanpwungen meh 1,351 me mih nan wasahn kalohk pahn epwelpen branch en Tahiti me onop Paipel nan pahr me ahpwtehn neko.

7. Nin duwen emen ohl sang sapwen Sehmen koasoia, dahme sewese kakehle ah pwopwoud?

⁷ Nan sapwen mehn Sehmen (Germany), emen ohl kin uhwong eh pwoud lih ni ahnsou me e esehda me liho kin perenki padahk mehlel en Paipel me e sukuhliki, oh ohlo kin lemeleme me Sounkadehdehn Siohwa kan kin pitih eh pwoud. Mwuhr, ohlo ntingwong meno me tepin koasoiong eh pwoud: “Kalahngan en komwi, pwe komwi me tepin padahkiong ahi pwoud duwen omw pelien lamalam, Sounkadehdehn Siohwa kan. Nin tepio, I kin pwunod pwehki I kin rong koasoi suwed tohto duwen kumwail. Ahpw ni ahnsouwet, pwehki I kin iang ai pwoud kohla ni mihding kan, I wehwehkier me ngehi me sapwung mahs. Met I kin kamehlele me dahme I kin rong nan mihding kan iei padahk mehlel, oh met kin sewese ngehi oh ai pwoud en kerenpene oh aht pwopwoud kin wie kehlailla.” Irail Sounkadehdehn Siohwa meh 162,932 nan sapwen mehn Sehmen​—oh meh 1,773 nan deke kan pahn epwelpen branch en Tahiti—​kin iangahki peneinei tohto me kin miniminkihpene limpoak en Koht.

Limpoak ong Riatail Kristian akan

8, 9. (a) Ihs me kin padahkiong kitail en poakohng riatail kan, oh dahme limpoak kin kamwekid kitail en wia? (b) Kihda ehu karasepe ong iaduwen limpoak kak sewese brother kan en sawaspene.

⁸ Pohl mahsanih ong irail Kristian akan nan Deselonika: “Pwe Koht ketin mahsanihongkumwailehr duwen amwail pahn poakpene nanpwungamwail.” (1 Deselonika 4:9) Ei, irail akan me kin “ale kasukuhl sang rehn Siohwa” kin poakpene nanpwungarail. (Aiseia 54:13, New World Translation) Re kak kasalehda ahr limpoak sang ahr wiewia kan, nin duwen me Pohl kasalehda ni e mahsanih met: “Ahpw limpoak en kahrehiong amwail pahn uhpahpene nanpwungamwail.” (Kalesia 5:13; 1 Sohn 3:18) Re kin wia met ni ahnsou me re kin wia soahng kan duwehte: mwemweitla rehn riarail brother oh sister kan me soumwahu, oh kangoange me nsensuwed kan, oh sewese me luwet akan. (1 Deselonika 5:14) Atail limpoak mehlel en Kristian kin sewese pein kitail en mih nan paradais en ngehn oh kekeirada.

⁹ Nan mwomwohdiso en Ancón​—ehu mwomwohdiso sang nanpwungen mwomwohdiso 544 nan Ecuador—​brother oh sister kan wasao kasalehda arail limpoak ni ahl mwahu ehu. Ehu kahpwal en mwohni wiawi, oh met kahrehda irail tohto sohlahr arail doadoahk, eri ih ahnsou me sounkalohk kan pwungkipene me re pahn wiahda neirail mwohni sang ni ahr pahn netikihong sounlaid kan kenerail mwenge ni ahnsou me sounlaid pwukat pwurodo sang laid ni pwong kan. Koaros sawaspene, iangahki seri kan. Re anahne tepida kaunopada mwenge kan sang kuloak ehu ni sohrahn, pwe sounlaid kan kin pwurodo sang laid kuloak pahieu ni sohrahn. Re kin nehnehpeseng mwohni me re wiahda nanpwungarail nin duwen arail anahn akan. Arail sawaspene kin kasalehda duwen limpoak mehlel en Kristian.

10, 11. Iaduwen kitail kak kasalehda atail limpoak ong irail brother kan me kitail sohte ese?

¹⁰ Ahpw, atail limpoak kaidehn ihte ong irail Kristian akan me kitail kin ese. Wahnpoaron Piter mahsanih: “Poakohng riamwail kan koaros.” (1 Piter 2:17, NW) Kitail anahne poakohng riatail brother oh sister kan koaros, pwehki irail koaros kin wia iengetail tohnkaudok kan en Siohwa Koht. Ni ahnsou me kahpwal laud kan kin pwarada, met kin wia ahnsou mwahu en kasalehda atail limpoak. Karasepe ieu, nan sounpar en kalohk en 2000, lapake laud kan kauwehla sapwen Mozambique, oh mahwen nanpwungen tohn Angola kin kahrehda aramas tohto semwehmwehla oh sohlahr kanarail mwenge. Pali laud en irail brother oh sister kan sang nan irail meh 31,725 nan sapwen Mozambique oh meh 41,222 nan sapwen Angola lelong kahpwal laud kan pwehki kahpwal akan me kin wiawi nan sapwarail kan. Ihme kahrehda, Sounkadehde kan me kohsang South Aperika kadarala sawas tohto pwehn sewese riatail kan nan sahpw pwukat. Arail men sewesehki riarail kan me semwehmwehla arail “reken dipwisou” kin kasalehda me irail kin limpoak.​—2 Korint 8:8, 13-15, 24.

¹¹ Sansal me mie limpoak nanpwungen riatail kan ni ahnsou me kitail kin kilang nan sahpw tohto, riatail brother oh sister kan kin kihda arail sawas en kauwada Kingdom Hall kan oh Wasahn Kapokon kan nan sahpw semwehmwe kan. Karasepe ehu, iei met me wiawi nan Dekehn Solomon. Mendahki kahpwal akan kin wiawi nan Dekehn Solomon nan pahr samwalahro, mie kekeiradahn sounkalohk ni persent 6, oh pil kekeirada kapw en sounkalohk meh 1,697. Re anahne wasahn kapokon ehu. Mendahki aramas tohto nan deke pwukat kin tangasang arail wehi pwehki kahpwal akan, mie brother oh sister kan me kohsang sapwen Australia oh pein toukihda arail ahnsou oh pil neirail mwohni pwehn kauwada wasahn kapokono. Ahpw, mwuri, irail sang Australia anahne pwurala sapwarail, ahpw mwohn re kohkohla, re kasukuhliki irail brother kan nan Dekehn Solomon pwe re pahn kak pein kanokehla wiahda poahsoan en imwen kapokono. Ihmw ehu me pahn wisikidohte koakonokonpene pekederdo sang Australia oh kanekeneklahn imwen kaudok kaselel wet pahn wia mehn kadehde mwahu ong mwaren Siohwa oh duwen limpoak me mih rehn brother kan​—nin doken ihmw tohto sohte kin kak kanekanekla wasao.

Duwehte Koht, Kitail kin Poakohng Sampah

12. Iaduwen kitail kak kahlemengih Siohwa nin duwen atail wiewia ong aramas teikan me sohte iang atail pwoson?

¹² Kitail kin ihte poakohng atail peneinei oh riatail kan ni pali ngehn? Soh, kaidehn irail kante me kitail pahn poakohng ma kitail kin “kahlemengih Koht.” Sises mahsanih: “Pwe iei uwen Koht eh ketin loalloale sampah, me e ketikihdohki Sapwellime Iehros, pwe mehmen me kin pwosonla ih en dehr salongala, a en ahneki mour soutuk.” (Episos 5:1; Sohn 3:16) Kitail kak kahlemengih Siohwa Koht ma kitail pahn poakohng aramas koaros​—iangahki irail akan me sohte iang atail pelien kaudok. (Luk 6:35, 36; Kalesia 6:10) Ih kahrepe kitail kin kalohkiseli Rongamwahu en Wehio oh padahkiong aramas akan duwen sapwellimen Koht wiewia kaselel kan en limpoak me e kin kasalehong aramas koaros. Ma re pahn rong oh mwekidki mehpwukat, re pahn kak ale komourparail.​—Mark 13:10; 1 Timoty 4:16.

13, 14. Ia ekei ekspiriens kan en riatail kan me kin kasalehda limpoak oh tohnmeteiki arail kehl oh ahnsou laud ong aramas akan me kaidehn Sounkadehde kan?

¹³ Met kitail pahn koasoi duwen special pioneer pahmen nan sapwen Nepal. Re alehdi pwukoa ehu en kalohk nan kahnimw ehu me mih nan palieir en pali kapi en sapwen Nepal, oh erein sounpar limau, re kin kasalehda arail limpoak ni ahr kin kanengamah wia arail doadoahk en kalohk nan kahnimwo oh kisin kahnimw teikan me karanih kahnimwo. Re kin kalap dake pwaisikel kan ki aua tohto pwehn wia arail doadoahk en kalohk mendahki e karakarki degree 100. E sansal me arail limpoak oh “ahr kin dadaur wia doadoahk mwahu kan” pweida mwahu pwehki pwihn en pwuhk study en mwomwohdiso tepida wiawi nan kousapw ehu me karanih kahnimwo. (Rom 2:7) Nan March 2000, aramas 32 kohpene oh rong padahk me Sounapwalih en Circuit wia. Nan sapwen Nepal mie kekeirada kapw en sounkalohk meh 430 nan pahr samwalahro​—tohtohki persent 9. E inenen sansal me Siohwa kin kapaiada riatail kan nan sahpwo me kin kasalehda limpoak oh ngoang.

¹⁴ Nan sapwen Colombia, mie ekei special pioneer kan me kalohk ong mehn Wayuu Indian kan. Ahpw, re anahne sukuhliki lokaia kapw, oh Siohwa kapaiada arail limpoak en men sewese aramas pwukat pwehki aramas 27 iang towehda padahk ong wehi pokon mendahki keteu laud wiawi rahno. Soangen limpoak oh ngoang me pioneer pwukat kin kasalehda kahrehda kekeirada kapw en sounkalohk kan wiawi nan Columbia: sounkalohk kan meh 107,613 oh met wehwehki me re tohtohkihla persent 5. Nan sapwen Denmark, emen sister mah men kalohkiong meteikan duwen Rongamwahu, ahpw e sohte kak alu. Ahpw, e sohte nsensuwedki met, e kin nantihong nting kisinlikou kan pwehn padahk ong aramas akan me kin perenki rong. Ni ahnsou wet, e kin nting ong aramas 42 oh e kin onop Paipel rehn aramas 11. Ih emen sang nanpwungen kekeirada kapw en sounkalohk meh 14,885 me kin iang ripoht nan Denmark pahr samwalahro.

Poakohng Omw Imwintihti kan

15, 16. (a) Dahme Sises mahsanih duwen ia uwen laud oh deila en atail limpoak ong meteikan? (b) Iaduwen brother kan me ahneki pwukoa kesempwal kan kin ni limpoak wiaiong ohl emen me kin karaun likamw Sounkadehdehn Siohwa kan?

¹⁵ Sises padahkiong sounpadahk en Kosonnedo, me mehn Sameria men kin wia mehn mpe. Nan sapwellimen Sises Kapahrek Pohn Dohl, e pousehlahte padahk wet ni ahnsou e mahsanih met: “Kumwail pil rongehr padahk pwoatet: ‘Ke en poakohng mehn mpomw kan, a kailongki omw imwintihti kan.’ A ngehi I ndaiong kumwail met: kumwail poakohng amwail imwintihti kan oh kapakapki me kin kalokei kumwail, pwe kumwail en wiahla sapwellimen Sahm me ketiket nanleng.” (Madiu 5:43-45) Mendahki mehmen pahn uhwong kitail, kitail kin nantihong en mweidong atail “mwahu en powehdi me suwed.” (Rom 12:19-21) Ma kak, kitail kin ehukihong ih mehkot me kitail kin keieu kesempwaliki, iei padahk mehlel.

¹⁶ Nan sapwen Ukraine, artikel ehu nan nuhspepa en Kremenchuk Herald me kauwe Sounkadehdehn Siohwa kan oh kin nda me irail kin wia pwihn keper. Met kak wia kahpwal laud, pwehki nan sapwen Iurop, ekei aramas kin kauwe Sounkadehdehn Siohwa kan ni ahl wet pwehn kamwekidada madamadau en aramas akan ni arail pahn lemeleme me koperment anahne keinapwidi doadoahk kan en Sounkadehde kan. Ihme kahrehda, Sounkadehde kan tuhwong ohl men me kin wiahda nuhspepa wet pwehn idek reh ma e pahn kak kapwungala artikelo. E pwungki, oh e wiahda met, ahpw e pil koasoia nan nuhspepa me artikel me tepin wiawihda me poahsoankihda dahme mehlelo. Eri, brother koahiek kan pwurehng tuhwong ohlo, oh kaunopada ire mehlel kan duwen Sounkadehdehn Siohwa kan. Mwuri mwo, ohlo wehwehki me artikel me tepin wiawihda me sapwung, oh e wiahda ehu artikel me kapwungala ire pwukat koaros. Ihme kahrehda, pwehki brother pwukat ni kadek koasoiong ohlo nin duwen ire kan me mehlel oh pwung, met imwila mwahu.

Iaduwen Kitail Kak Kekeirada Ni Atail Kasalehda Limpoak?

17. Dahme kahrehda kitail ese me e sohte pahn mengei en kasalehda limpoak ong aramas akan ahnsou koaros?

¹⁷ Ni ahnsoun ipwidi en seri kin wiawi, eh pahpa oh nohno kin mwadangete tepida poakohng ih. Ahpw, wiewia limpoak ong me laud kan kaidehn mehkot me kitail kin ipwikihdi. Ih kahrepe Paipel kin kalap padahkiong kitail en limpoakpene​—limpoak iei irair ehu me kitail anahne en nantihong kekeirada. (1 Piter 1:22; 4:8; 1 Sohn 3:11) Sises mwahngih me atail limpoak pahn mihla pahn kasongosong nin doken e mahsanih me kitail anahne mahkohng riatail kan “pahn pak isuh wad isihsek.” (Madiu 18:21, 22) Pohl kin kangoange kitail en “mahkpene” oh “kanengamah.” (Kolose 3:12, 13) Ih kahrepe kitail kin ale kangoang en: “rapahki elen kasalehda limpoak”! (1 Korint 14:1, NW) Iaduwen kitail kak wia met?

18. Dahme pahn sewese kitail en kalaudehla atail kasalehda limpoak ong meteikan?

¹⁸ Keieu, kitail kak tamanda ahnsou koaros duwen atail limpoak ong Siohwa Koht. Limpoak wet kin ni kehlail kamwekid kitail en kasalehda poakohng mehn mpatail kan. Dahme kahrehda? Pwehki ni ahnsou me kitail kin kasalehda limpoak, met kin wahdohng Samatail nanleng wahu oh kaping. (Sohn 15:8-10; Pilipai 1:9-11) Keriau, kitail kak song en wehwehki ia duwen Siohwa kin kilangwong mehkot. Ni ahnsou koaros kitail kin wia dihp, kitail kin wia dihp ong Siohwa; ahpw, E kin ahnsou koaros mahkong kitail oh poakohng kitail. (Melkahka 86:5; 103:2, 3; 1 Sohn 1:9; 4:18) Ma kitail pahn kahlemengih Siohwa, kitail pahn pil poakohng mehteikan oh mahk ong irail dihp me re kin wiaiong kitail. (Madiu 6:12) Kasiluh, kitail kak wiaiong meteikan nin duwen kitail men irail wiaiong kitail. (Madiu 7:12) Nin duwen aramas soh-unsek kan, ahnsou koaros kitail anahne aramas teikan en mahkong kitail. Karasepe ieu, ni ahnsou kitail kin nda mehkot me kin kansensuwediala meteikan, kitail kin koapworopworki me re pahn wehwehki oh tamanda me aramas koaros kin sapwungala ni arail lokaia ekei ahnsou. (Seims 3:2) Ma kitail men aramas teikan en kasalehong kitail limpoak, kitail pil anahne kasalehong irail limpoak.

19. Iaduwen kitail kak rapahki sawas sang ngehn sarawi pwen kalaudehla atail limpoak?

¹⁹ Kapahieu, kitail kak ale sawas sang ngehn sarawi, pwehki limpoak iei kisehn wahn ngehn. (Kalesia 5:22, 23) Kompoakepahnki aramas akan, limpoak nanpwungen tohnpeneinei kan, oh limpoak nanpwungen ohl oh lih kin kalap wiawi pwehki kitail kin ipwikihdi limpoak pwukat. Ahpw kitail anahne sawas sang sapwellimen Siohwa ngehn sarawi pwehn sewese kitail en ahneki limpoak ong meteikan nan kapehdatail: soangen limpoak me Siohwa kin sapwellimaniki, iei limpoak me kin kapatapene oh oarepene mehkoaros pwe en wiahla ehu ni mehlel. Kitail kak rapahki sawas sang ngehn sarawi ni ahnsou kitail kin wadek Paipel. Karasepe ieu, ma kitail kin onopki duwen mouren Sises, kitail pahn kilang iaduwen e wiewia ong aramas akan, oh kitail kak kahlemengih ih. (Sohn 13:34, 35; 15:12) Oh pil, kitail kak peki rehn Siohwa en ketikihong kitail ngehn sarawi, keieu ni ahnsou kitail kin lelohng irair akan me pahn kahrehong kitail en apwalki kasalehda limpoak. (Luk 11:13) Oh, kitail pil kak karanih tohnmwomwohdiso en Kristian. Werekiong riatail brother oh sister limpoak kan pahn kak sewese kitail en kekeirada limpoak loalatail.​—Lepin Padahk 13:20.

20, 21. Iaduwen Sounkadehdehn Siohwa kan nan pahr en kalohk 2000 kasalehda arail limpoak?

²⁰ Nan pahr samwalahro, mie kekeirada kapw en sounkalohk en rongamwahu meh 6,035,564 wasa koaros nan sampah. Sounkadehdehn Siohwa kan kin ni awa 1,171,270,425 rapahki aramas akan pwehn padahkiong irail duwen Rongamwahu en Wehin Koht. Limpoak me kin kahrehong irail en dadaurete wia doadoahk wet mendahki karakar, keteu, oh kopou. Limpoak me kamwekid irail en koasoiong iengarail tohnsukuhl akan oh tohndoadoahk kan de tuhwong aramas akan me re sohte kin ese nanial kan oh wasa teikan. Pali moron en aramas akan me Sounkadehde kan kin tuhwong sohte kin perenki rong, ekei pil kin uhwong ahr doadoahk. Ahpw, ekei aramas kin perenki rong, ihme re kin pwurala rehn aramas akan pahn pak 433,454,049 oh irail kin onop Paipel rehn aramas 4,766,631.a

²¹ Met kin kasansalehda duwen limpoak en irail Sounkadehdehn Siohwa kan ong arail Koht oh mehn mparail kan! Limpoak wet sohte pahn luwetala. Kitail kin koapworopworki me nan pahr en kalohk 2001, kitail pahn kilang kadehde me pahn wiawi ong aramas akan duwen Rongamwahu me pahn laudsang pahr me ahpwtehn neko. Eri, sapwellimen Siohwa kapai kan en ketin ieiang sapwellime tohnkaudok lelepek oh ngoang kan nin duwen re kin mweidong ‘arail doadoahk koaros en kin wiawi ni limpoak’!​—1 Korint 16:14.

[Nting tikitik me mi pah]

Ke Kak Kawehwe?

• Ihs me kitail kin kahlemengih ni ahnsou me kitail kin kasalehda limpoak ong mehn mpatail kan?

• Ia uwen laud oh deila en atail limpoak?

• Ia ekei ekspiriens kan me kin kasansalehda limpoak en Kristian?

• Iaduwen kitail kak kekeirada ni atail pahn kasalehda limpoak en Kristian sang nan kapehdatail?

[Chart nan Pali 14-17]

2000 SERVICE YEAR REPORT OF JEHOVAH’S WITNESSES WORLDWIDE

(See bound volume)

[Kilel nan Pali 11]

Limpoak en Kristian kin sewese tohnpeneinei kan en wiahla ehu ni mehlel

[Kilel nan Pali 13]

Limpoak kin kamwekid kitail en ehukihong aramas teikan duwen atail koapworopwor