Ken Itarki Dahme Ke Ahnekier
1 Pwuhk Sarawi kin kaweid kitail en apwalih mwahu atail peneinei ni atail kin kihong irail arail anahn en mwenge, likou, oh soahng pwukat, ahpw met sohte wehwehki me soahng pwukat pahn wia dahme keieu kesempwal nan atail mour. Soahng ngehnin kan anahne en keieu kesempwal. (Madiu 6:33; 1 Tim. 5:8) E kin apwal en toupahrek ni ahl me konehng nan “ahnsou apwal ekei ni imwin rahn akan.” (2 Tim. 3:1) Dahme pahn sewese kitail en wia met?
2 Ahneki Madamadau Pwung me Poahsoankihda Pwuhk Sarawi: Mahsen en Koht kin kaweidih kitail me ahneki ineng en men kepwehpwehla kak kahrehong emen en salongalahsang pwoson. (Ekl. 5:10; Madiu 13:22; 1 Tim. 6:9, 10) Pwehki atail ahnsou me inenen kesempwal, e pahn keper en nohn soupisengki atail doadoahk de mehkan me pid mwohni, kahrehda soahng ngehnin kan duwehte mihding kan, onop oh kalohk pahn uhd keriau nan atail mour. (Luk 21:34-36) Ihme kahrehda, Paipel kin kaweid kitail oh mahsanih: “Eri, ma kitail tungoalenki kisin tungoal akan oh likou, met e itarohng kitail.”—1 Tim. 6:7, 8.
3 Met sohte kin wehwehki me Kristian akan anahne kihong pein irail en mour duwehte aramas semwehmwe. Ahpw, iren Paipel wet kin sewese kitail en wehwehki dahme anahn—mwenge, likou, oh ihmw me konehng atail wasa me kitail mih ie. Ma kitail ahnekier anahn pwukat en mour, kitail sohte pahn nantihong ale soahng kan me mwahu sang dahme kitail ahnekier. Ni ahnsou me kitail kin medemedewe ma kitail pahn pwainda mehkot de kalaudehla atail awa kan nan doadoahk, e pahn mwahu en idek pein rehtail: ‘I uhdahn anahne met?’ Ma kitail pahn wia met, e pahn sewese kitail en kapwaiada kaweid wet: “Kumwail dehr noahroke mwohni, ahpw kumwail nsenamwahukihte dahme kumwail ahneki.”—Ipru 13:5.
4 Ma kitail pahn likih Siohwa, E pahn kapaiada kitail. (Lepin Padahk 3:5, 6) Mendahki kitail anahne doadoahk laud pwehn ale atail anahn ong atail mour, kitail en dehr mwohnki soahng pwukat. Sohte lipilipil ma kitail ahneki soahng tohto de soahng malaulau, kitail anahne likih Siohwa pwehn kaitarehla atail anahn akan. (Pilipai 4:11-13) Ni imwilahn met, kitail kak paiekihda soangen nsenamwahu me kin kohsang itarki dahme mie oh pil kapai teikan.
5 Kahlemengih Pwoson en Meteikan: Emen nohno me sohte pwopwoud nantihong kakairada nah serepeino nan padahk mehlel kin ekis ekis kihsang eh mour soahng soh katapan kan. Mendahki e kin perenki mihmi ni pein imweo, e kosoula nan ihmw tikitik ieu oh mwurin mwo, nan apartment ieu. Pwehki e wia met, eri, e kak katikitikila eh awa kan nan doadoahk en mwohni oh e kak kalaudehla eh awa kan nan kalohk. Mwurin nah serepein laudla oh pwopwoudla, sister menet eri mwadang kommoal sang eh doadoahk en mwohni mendahki met pahn kahrehda nah mwohni pahn tikitikla douluhl. Ni ahnsou wet, sister menet mihmihier nan keisuhn pahr me e Regular Pioneer and e kasalehda me sohte kin koluhkihla eh pilipil en rapahki mahs Wehin Koht nan eh mour mendahki e anahne tohnmetei soahng kan duwehte naineki mwohni laud oh ahneki dipwisou tohto.
6 Emen elder oh eh pwoud wia Regular Pioneer sounpahr kei ahnsou me re kakairada neira seri silimen. Nin duwen peneinei, re sukuhliki me re anahne itarki dahme re anahne oh re sohte pahn nantihong soahng kan koaros me re mwahuki. Pahpa en peneineio koasoia: “Se kin tamataman me se anahne kihsang aht mour soahng kan me sohte katepe. Mehlel, e kin apwal ekei pak, ahpw Siohwa kin ahnsou koaros ketikihong kiht dahme se anahne. . . . Ni ahnsou me I kin kilang ahi peneinei arail rapahki mahs mehkan me ngehnin, I pehm me soahng koaros me pwung oh I nsenamwahu.” Nohno en peneineio koasoia: “Ni ahnsou me I kin kilang ahi pwoud a kin kedirepwki mehkan me ngehnin, I pil kin nsenamwahu.” Seri kan en peneineio pil perenki me arail pahpa oh nohno pilida en papah Siohwa nin duwen Regular Pioneer kan.
7 Ong irail me kin pilada en papah Siohwa oh lelepek ong Ih sang mwohnki dipwisou kan, Pwuhk Sarawi kin inoukihong irail me re pahn ale kapai tohto ni ahnsou wet oh ni ahnsou kohkohdo.—1 Tim. 4:8.