Ke Kak Kepwehpwehla!
1. Dahme kahrehda ken medemedewe en wiahla regular pioneer men?
1 Ke kin rapahki peren laud oh nsenamwahu nan ahmw mour? Ke kin diarada peren oh nsenamwahu ni omw sewese meteikan? Ke inengieng en kalaudehla ahmw papah Siohwa? Ma ahmw pasapeng iei ei ong peidek pwukat, eri ke ele pahn kak wiahla regular pioneer men. Mehlel, pwe kitail anahne pil medemedewe atail peneinei oh pwukoa teikan me Paipel kasalehda, oh pil luwet en paliwar de mahla.
2. Koasoia ekei kapai kan me kohsang rehn Siohwa me regular pioneer kan kin ahneki.
2 Mahsen kan en Solomon me ntingdi nan Paipel pidada kapai en Siohwa ki kepwe kan. (Lep. Pad. 10:22) Rahnwet, Siohwa kin ketikihong kitail kapai kan me pid atail kaudok. Soangen kapai pwukat me inenen laud rehn pioneer kan. Karasepe, re kin ahneki peren laud en kihwei ahnsou ong meteikan sang ‘isaneki doadoahngki arail ahnsou mwahu kan’ ong pein irail. (Kol. 4:5; Wiewia 20:35) Siohwa ketin mwahngih oh kalahnganki arail doadoahk en limpoak. Kesempwalpen soangen “paien nanleng” sohte pahn tikitikla. (Mad. 6:20; Ipru 6:10) Patehng met, nin duwen pioneer kan kin kolokol ‘poaren masarail mwakelekel’ oh likih Siohwa en ketikihong irail arail anahn akan, arail nanpwungmwahu reh kin kekeirda oh kehlailla.—Mad. 6:22, 25, 32; Ipru 13:5, 6.
3. Ia wekpeseng en rapahki kapai kan sang rehn Siohwa oh rapahki kepwe en sampah kan?
3 Raparapahki kepwehn sampah kan kin kalapw imwikihla “pwupwudiong nan songosong oh lohdiong nan lidip en ineng pweipwei oh keper tohto.” (1 Tim. 6:9, 10; Seims 5:1-3) Met sohte kin wiawi ong kapai en Siohwa. Pwehki regular pioneer kan kin doadoahngki arail ahnsou laud ong kalohk, met kin sewese irail en kaukaule pilada dahme keieu kesempwal. (Pil. 1:10) Emen brother uhdisang eh doadoahk nin duwen emen engineer me kin kihsang eh ahnsou kan koaros, pwe ih en wiahla emen pioneer. E koasoia: “I diarada me ei doadoahk en mwohni kin kihong ie pwunod. I sohte kin diar pwunod ni ei wia doadoahk en pioneer. Met I kak sewese aramas oh padahkihong irail padahk mehlel. Met kihong ie nsenamwahu oh peren en sewese aramas en mwekidki padahk mehlel.”
4. Iaduwen regular pioneer kan paiekihda nin doken arail kin wahdo kapai ong meteikan?
4 Kapai Teikan: Rahnwet, koaros kin lelohng “ahnsou apwal ekei.” (2 Tim. 3:1) Aramas nan wasa koaros uhdahn anahne koapworopwor. Sounkalohk kan en Wehio ahneki peren laud ni ahnsou me re kin sewese aramas akan me pehm sohte arail koapworopwor en sukuhliki oh mwekidki rongamwahu. Ia uwen kaperen en regular pioneer kan me kin doadoahngki awa daulih 800 ehuehu sounpar ong doadoahk en doarehla mour en aramas!—1 Tim. 4:16.
5, 6. Dahme kak sewese iuk en wiahla regular pioneer?
5 Ke kin uhdahn medemedewe en papah nin duwen regular pioneer men? Met ke kakete “isaneki ahnsou mwahu koaros” sang en wia mehkan me sohte nohk kesempwal. (Ep. 5:15, 16) Tohto wiahda met oh kahrehong arail mour en sohte kedirepw, oh irail kakehr en kihsang ahnsou me re doadoahngki ong doadoahk en mwohni pwehn doadoahngki ahnsou laud ong doadoahk en Wehio. Ke kak koasoanehdi irair en ahmw mour en iang irail?
6 Peki erpit rehn Siohwa pwe ken pweida wia koasoandi mwahu. (Seims 1:5) Soangen kapai dah kan ke kasikasik ni kasapahl? En karanih Siohwa laud sang mahs! Siohwa pil pahn ketin kapaiada iuk ki kepwe kan me ke anahne. (Mad. 6:33) Irail kan me song Siohwa ni ire wet pahn ale “soangen kamwahu kan ni uwe ieu me laud.”—Mal. 3:10.