Koakon En Peidek

◼ E kin konehng tohn mihding kan en lopwolopw mwurin ehuehu padahk kan nan Theocratic Ministry School oh Service Mihding?

Ni en Siohwa kapikada sampah, “usu kan wiakihteieu kokoul, oh sapwellime tohnleng kan ngisingiski ar peren.” (Sohp 38:7) Sapwellimen Koht tohnleng kan kin perenki kapinga Siohwa pwehki sapwellime doadoahk en kapikipik kaselel kan me kin wia kasalepen sapwellime erpit, wiewia kaselel kan oh manaman.

E kin mwahu kitail en kasalehda sang nan atail mohngiong me kitail kin kalahnganki ahn riatail brother kan doadoahk laud oh padahk mwahu kan me re kin wia. Karasepe ehu, kitail kin kalapw lopwolopwki padahk kan me wiawi ni kapokon tohrohr kan, duwehte kapokon en assembly kan oh kapokon laud kan. Padahk kan me wiawihda nan kapokon pwukat kin anahne ahnsou laud oh doadoahk laud pwe en kak wiawihda. Atail lopwolopwkin irail kin kasalehda atail kalahngan kaidehn ongete me wia padahko, ahpw pil ong kaweid kan me Siohwa ketikihong kitail ki sapwellime Mahsen oh sapwellime pwihn.—Ais. 48:17; Mad. 24:45-47.

Ahpw ia pahn duwe ma kitail pahn lopwolopwki padahk kan nan Theocratic Ministry School oh Service Mihding? Sohte kosonned ehu me keinepwihdi lopwolopw ma met kin wiawi sang ni kasalepen kalahngan, ahpw mehlel ni ahnsou me tohnsukuhlo kapw oh ehdin eh padahk. Ahpw e pil mengei lopwolopw en wiahla tiahk ehu me solahr pid madamadau, pepehm, de nsenoh. Ihme kahrehda kitail sohte kin kalapw lopwolopwki ehuehu padahk kan.

Eri mendahki ma kitail sohte kin lopwolopwki padahk kan nan Theocratic Ministry School oh Service Mihding, ahpw e kin miehte ahl teikan kitail kak kasalehda atail kalahnganki kaweid kan oh doadoahk laud en irail me wiahda padahngko. Kitail kak wia met ni atail pahn rongorong kanaiehng ni ahnsou me re wie padapadahk. Oh mwurin mihding, kitail kak en tuhwong me wia padahko oh kasalehiong irail me kitail kalahnganki arail kin ngoangki wiahda padahk kan.—Ep. 1:15, 16.