Siohwa Kin Ketin Kaiahne Kitail ong Doadoahk Wet
1. Ni en Siohwa kin ketikihong aramas akan pwukoa ehu, dahme e pil kin ketin wia?
1 Ni en Siohwa kin ketikihong aramas pwukoa ehu, e pil kin ketikihda dahme irail anahne pwe ren kak kapwaiada. Karasepe, ni ahnsou me Siohwa mahsanihong Noha en kauwada warihmwo, doadoahk ehu me Noha saikinte wia, e pil ketin padahkihong ih ia duwen eh pahn wiahda. (Sen. 6:14-16) Ni en Siohwa ketikihong silepen sihpw aktikitik Moses pwukoa en pwarala rehn ohl mah kan en Israel oh pil Parao, e ketin kamehlelehiong ih: “I pahn seweseiuk pwe ke en kak lokaia, oh I pahn padahkihong uhk dahme ke pahn nda.” (Eks. 4:12) Me pid atail doadoahk en kalohki rongamwahwo, Siohwa pil kin ketikihong kitail kaweid ong duwen atail pahn wia met. E ketin kaiahne kitail en wia doadoahk wet sang Sukuhl ong Sapwellimen Koht Doadoahk oh pil Mihting en Kalohk. Ia duwen atail kak paiekihda kasukuhl wet?
2. Ia duwen atail kak paiekihda Sukuhl ong Sapwellimen Koht Doadoahk?
2 Sukuhl ong Sapwellimen Koht Doadoahk: Wadek oh onopki audepen mihtingo mwohn omw pahn iang towehda ehuehu mihting. Eri, ni ahnsou me ke pahn rong me wia padahko doadoahngki ire pwukat, ke pahn kak kamwahwihala omw wia padahk. (Lep. Pad. 27:17) Ahl me keieu mwahu ken paiekihda met iei ken iang kasukuhl wet. Ke iang kileldi ong kasukuhl wet? Ahnsou me ke pahn wia padahk ehu, kaunopada mwahu oh doadoahngki iren kaweid kan me kowohng uhk. Doadoahngki dahme ke sukuhlkier ahnsou me ke iang kalohk.
3. Dahme pahn sewese kitail en kak paiekihda Mihting en Kalohk?
3 Mihting en Kalohk: Ma kitail kin wadekala oh kaunopada atail pasapeng ong padahk kan, kitail pahn kin tamataman iren sawas kan me kohda nan mihtingo. Ma kitail kin pasapeng ni mwotomwot, me tohto pahn kak iang pasapeng. Rong kanahieng kamwomwada kan oh doadoahngki iren sawas kan me ke leme pahn sewese omw kalohk en pweida mwahu. Nekidala Atail Doadoahk ong Wehio me ire kesempwal kan mi loale pwe ken kak doadoahngki ahnsou kohkohdo.
4. Dahme kahrehda kitail en doadoahngki mwahu kasukuhl me Siohwa ketikihong kitail?
4 Atail pwukoa en kalohki rongamwahu ong aramas koaros kin apwal, duwehte pwukoa kan me Noha oh Moses alehdi. (Mad. 24:14) Kitail kak pweida ma kitail kin koapworopworki Siohwa, atail Sounkaweid Lapalap, oh doadoahngki kasukuhl me e ketikihda ong kitail.—Ais. 30:20.