Iaduwen Atail Kin Paiekihda Theocratic Ministry Sukuhl
1 Sapwellimen Siohwa aramas kin ahneki pwais kaselel en sukuhliki sang rehn Siohwa ni atail iang Theocratic Ministry Sukuhl. (Aiseia 54:13; Sohn 6:45) Ahpw, uwen atail paiekihda sukuhliki kin poahsoankihda uwen atail nannanti en sukuhliki sang Sukuhl wet. Ke kin kasawihada iaduwen Theocratic Ministry Sukuhl kin kamwahuwihala ahmw pali ngehn?
2 Koasoi kan me Kin Kasalehda Kalahngan: Sounapwalih en Sukuhl tohto diarada me onop en wiepen koasoi kan kin kamwahuwihala tohnmwomwohdiso arail pweida mwahu nan kalohk. Oh pil, emen Sounapwalih en Sukuhl diarada me atail koasoandi me tohnmwomwohdiso iang kasalehda duwen ire kan nan wadawad en Paipel me irail iang perenki—koasoandi wet kin sewese kitail en kolokol atail koasoandi en wadek Paipel. Me pid Padahk Keriau, brother tohto kasalehda me irail kin kalahnganki koasoandi kapw me re sohte pahn anahne kaunopada tepin koasoi de kaimwiseklahn koasoi oh irail pahn medemedewehte dahme irail pahn wadek. Met kin sewese irail en kamwahuwihala arail wadek Paipel de Kahn Iroir oh koahiekla.—1 Tim. 4:13.
3 Koaros Kak Paiekihda: Pasapeng nan mihding kan kin kaperen. (Lepin Padahk 15:23) Pwehki peidek en kousapahl kin sansalda mwohn rahn en kousapahl, met kin sewese kitail en kaunopada oh iang pasapeng ahnsoun kousapahl. Oh pil, tepida sang January 1, 2004 Kahn Iroir, artikel kan kin kasalehda ire kesempwal kan sang atail koasoandi en wadawad en Paipel me sansal nan koasoandi en Theocratic Ministry Sukuhl. Artikel pwukat sewese tohto en iang pasapeng ahnsou me re kin kousapahlih wadawad en Paipel erein wihko.
4 Koaros me iang sukuhl kin ahneki pwais kaselel en kaunopada oh wia padahk kan. Kitail koaros kak paiekihda Sounapwalih en Sukuhl ah koasoi kaping me e kin wia mwurin padahk kan. Emen emen tohnsukuhl kin paiekihda kaweid me Sounapwalih en Sukuhlo kin kihong ih mwurin mihding kan. Koasoandi en atail wia “exercises” sang pwuhken Benefit From Theocratic Ministry School Education kin pil kihda sawas laud.
5 Ni ahmw pahn sukuhliki mehkot ahnsou me sukuhlo wiawi de mwurin sukuhlo ke ale kaweid sang Sounapwalih en Sukuhlo, ntingihdi mehpwukat nan noumw pwuhken Benefit From Theocratic Ministry School Education. Doudouloale dahme ke sukuhliki, oh medemedewe iaduwen kasukuhl wet sang Koht pahn kak kamwahuwihala ahmw pali ngehn.