Theocratic Ministry Sukuhl nan 2002
1 Pali moron en aramas akan sohte kin nohn medemedewe duwen arail koahiek en lokaia. Ahpw, koahiek en lokaia kin wia kisakis ehu sang rehn Siohwa. Kisakis wet kin sewese kitail en kapehse ong meteikan oh pil kasalehda atail lamalam kan oh pepehm kan. Ahpw, keieu kesempwal, e kin sewese kitail en kapinga Koht.—Mel. 22:22; 1 Kor. 1:4-7.
2 Ohl, lih, oh seri kan kin ale kaiahn nan Theocratic Ministry Sukuhl pwehn kalohki mwaren Siohwa. (Mel. 148:12, 13) Nan prokram en Theocratic Ministry Sukuhl en 2002, e pahn kihda oaralap en Paipel tohto me pahn sewese kitail nan atail mour oh pil nan atail kalohk. Ma kitail pahn kaunopada ong sukuhlo oh iang wia padahk kan, kitail pahn kak kalaudehla atail loalokong oh pil koahiekla nin duwen sounpadahk kan en Mahsen en Koht.—Mel. 45:1.
3 Wadek Pwuhk Sarawi Rahn Koaros: Ma Pwuhk Sarawi kin mengei en pwekida oh wadek, kitail kak doadoahngki ahnsou mwahu koaros en wadek Pwuhk Sarawi. Pali moron en kitail ahneki minit kei ehuehu rahn me kitail ekis pisek oh kitail kak doadoahngki minit pwukat ni ahl wet. Ia uwen mwahu en wadek teh ehu de riau rahn koaros, oh ihte me anahn pwehn idawehn koasoandi en wadek Paipel me kileledi nan Koasoandi en Theocratic Ministry Sukuhl!—Mel. 1:1-3.
4 Ma kitail koahiek en wadek Paipel, met pahn sewese kitail en kak lel mohngiong en aramas akan oh kamwekid irail en kapinga Siohwa. Irail brother kan me kin wia Padahk Keriau, anahne kalap praktis arail wadawad ni ngihl laud. Sounapwalih en Theocratic Ministry Sukuhl pahn kihda kaping oh kaweid ong iaduwen irail me kin wia Padahk Keriau kak kamwahuwihala arail padahk kan.
5 Doadoahngki Pwuhken Reasoning: Padahk kesiluh oh kapahieu kin poahsoanda pohn pwuhken Reasoning. Kitail koaros kak nantihong doadoahngki pwuhken Reasoning ahnsou koaros nan doadoahk en kalohk. Sister kan pahn doadoahngki “setting” (kamwomwadahn wasahn kalohk) me kin mwahu ong arail wasahn kalohk. Sounapwalih en Sukuhlo pahn tehk iaduwen re kin padahk oh pil duwen arail kin doadoahngki iren Paipel kan.
6 Theocratic Ministry Sukuhl pahn sewese kitail koaros en doadoahngki mwahu kisakis me kohwong kitail koaros sang rehn Koht iei koahiek en lokaia pwehn kalohki Rongamwahu oh kapinga atail Koht Lapalap, Siohwa!—Mel. 34:1; Episos 6:19.