Sukuhl ong Sapwellimen Koht Doadoahk nan Pahr 2015 Pahn Sewese Kitail en Kamwahwihala Atail Padahk

¹ Sounmelkahka Depit ntingihedi: “Maing KAUN, komwi me silepei oh sounkomourpei, komw ketin kupwurehla ei pato oh ei lamalam!” (Mel. 19:14) Kitail pil men Siohwa en ketin kupwurperenki atail koasoi kan, pwehki kitail kin kesempwalki atail pwais kaselel en koasoia me mehlelo nan mwomwohdiso oh nan kalohk. Sukuhl ong Sapwellimen Koht Doadoahk iei ehu ahl me Siohwa kin ketin kaiahnehkin kitail nan kalohk. Kasukuhl wet kin wiawi nan ehuehu wihk nan mwomwohdiso daulih 111,000 nan sampah pwon. E kin sewese brother oh sister kan nan sampah pwon me kohsang soangsoangen tiahk kan en wiahla sounkalohk koahiek en rohng mwahu en wehio kan, en kak wia padahk me pahn kamwakid meteikan, koasoi ni kamantik, oh eimah.​—Wiewia 19:8; Kol. 4:6.

² Koasoandi en sukuhl ong pahr 2015 pahn iangahki ire kan me mi nan Dahme Kitail Kak Sukuhlkihsang Mahsen en Koht? oh pil iangahki ire kan sang pwuhken “Limpoak en Koht” oh pil kisin pwuhk Rohng Mwahu. Patehng met, wekidekla pil wiawi nan ahnsou (minit) ong Ire Kesempwal kan Sang Wadawad en Paipel oh Padahk Keieu. Wekidekla pwukat iangahki ekei kaweid kan me pid ia duwen padahk kan nan sukuhlo eh pahn wiawi pahn mi pah nan parakrap kan.

³ Ire Kesempwal kan Sang Wadawad en Paipel: Brother me pahn wia padahk wet pahn ahneki minit riaute pwehn tehk ehu ire kesempwal me uhdahn mwahu sang wadawad en Paipel nan wihko. Kaunopada mwahu pahn kahrehiong brothero en ehukihong ehu ire kesempwal ong mwomwohdiso nan ahnsou me mweimweiong. Mwurin mwo, tohnmwomwohdiso pahn ahneki minit weneu en kihda arail pasapeng sang ire kan me re perenki sang arail wadawad en Paipel erein wihko nan seken 30 de mwotomwotsang. Kitail anahne kaunopada mwahu oh kaiahne pein kitail pwe en kihda pasapeng me sansal oh wehwe mwahu nan seken 30, ahpw en wia met pahn wia kaiahn mwahu ong kitail. E pil kihong ahnsou mwahu ong meteikan en iang kihda dahme re sukuhlkihsang pein arail roporop.

⁴ Padahk Keieu: Ahnsou ong wadawad en Paipel katikala ong minit siluh de mwotomwotsang oh ire kan me re pahn wadek pahn pil malaulaula. Irail kan me pahn wia wadawad en Paipel wet anahne praktis pak tohto sang ni arail pahn wadek ni ngihl laud oh tehk mwahu lepin lokaia kan en nda ni pwung oh wadek ni maledek pwehn kak kasalehda pepehm kan ni sansal. Sapwellimen Siohwa aramas akan koaros pahn anahne song en wadawad mwahu, pwehki wadawad eh wia mehkot kesempwal nan atail kaudok. Ia uwen atail perenki me neitail seri tohto kin wadawad mwahu! Oh kaping kowohng pahpa oh nohno kan ni arail kin nantihong sewese neirail seri kan ni elen limpoak pwe ren wiahla sounwadawad koahiek kan.

⁵ Padahk Keriau: Sister men me pahn wia padahk wet minit limau. E anahne doadoahngki oaralap me kileldi. Sistero pahn doadoahngki oaralapo oh e pahn doadoahngki ehu wiepen kalohk me kin uhdahn wiawi nan eh wasahn kalohk oh me pahn sewese ih en pweida mwahu nan eh wasahn kalohk. E kak kapataiong ekei iren Paipel kan me pwungohng oaralap me e pahn koasoia. Sounapwalih en sukuhlo pahn koasoanehdi ihs me pahn wia tohnihmw.

⁶ Padahk Kesiluh: Brother de sister men me pahn wia padahk wet minit limau. Ma sister men me pahn wia padahk wet, e anahne wia padahk wet duwehte Padahk Keriau. Ma brother men me pahn wia padahk wet oh padahko pahn poahsoankihda kisin pwuhk Rohng Mwahu de pwuhken “Limpoak en Koht” e pahn wia padahk wet ong tohnmwomwohdiso. Tohnsukuhlo pahn anahne wiahda eh padahk nan oaralap me kileldio, oh pilada iren Paipel kan me e pahn doadoahngki.

⁷ Ehu Wiepe Kapw en Padahk Kesiluh ong Brother Kan: Ma padahk wet pahn poahsoankihda ire kan nan Dahme Kitail Kak Sukuhlkihsang Mahsen en Koht? e anahne wiawi nin duwen kamwomwada ehu, kaudok en peneinei de doadoahk en kalohk. Sounapwalih en sukuhlo me pahn pilada ihs me pahn sawas oh koasoandi kan. Me pahn sewese tohnsukuhlo pahn anahne sang emen kisehn eh peneinei de brother men sang nan mwomwohdiso. Kak kapataiong nan omw padahk iren Paipel kan me kasalehda mour en kaweido de ire mehlel kan sang Paipel me pahrekiong omw oaralap. Ekei ahnsou elder men me pahn pilipilda oh wia met. Elder kan kak pein pilada ihs me pahn sewese irail oh koasoanehdi koasoandi kan. Uhdahn ni mehlel, e pahn kangoang ong tohnmwomwohdiso en kilang elder kan kamwomwada mwomwen padahko iangahki tohn eh peneinei de emen brother.

⁸ Kaweid: Sounapwalih en sukuhlo pahn doadoahngki minit riau mwurin ahn emen tohnsukuhl eh padahk pwehn kihda kaping oh kaweid me pahn kak sawas sang nan pwuhken Ministry School. Ni ahnsou me sounapwalih en sukuhlo pahn pakairki ihs me pahn wia padahk, e sohte pahn pakairki mehnia iren kaweid me tohnsukuhlo pahn kapwaiada. Mwurin ehuehu padahk en tohnsukuhl kan sounapwaliho pahn anahne kihda kaping ni mehlel, pakairki iren kaweid me tohnsukuhlo kin nantihong en kapwaiada oh kasalehda ni oaritik dahme kahrehda tohnsukuhlo pweida nan ireo, de ni kadek kawehwehiong dahme kahrehda e pahn wia kamwahu ong tohnsukuhlo en kalaudehla eh doadoahngki ireo.

⁹ Tohnsukuhl kan kak diar kaweid kan nan pali 79 lel 81 nan pein nah pwuhken Ministry School. Mwurin tohnsukuhl men kanekehla eh padahk, sounapwaliho pahn sainihala ni konehng nan nein tohnsukuhlo pwuhk oh pein idek rehn tohnsukuhlo ma e wia eksersais me kileldi nan iren kaweid me e doadoahngki. Kaping kan oh pil ekei iren sawas kan kak kowohng tohnsukuhlo mwurin mihting de pil ehu ahnsou. Emenemen tohnsukuhl anahne kilangwohng sawas me e alehdi nin duwen ahnsou mwahu en kekeirda nan eh papah Koht.​—1 Tim. 4:15.

¹⁰ Ma tohnsukuhlo daulihala ahnsou me kileldiong ih, sounapwalih en sukuhlo de emen me pahn sewese ih pahn anahne wia mehkot, me duwehte kisin pehl de wia kisin ngihl ehu me pahn kasalehda ni wahu ong tohnsukuhlo me eh ahnsou nekier. Tohnsukuhlo anahne pohnese ngihlo sang ni eh pahn kanekehla ehu sentence oh doudi sang pohn wasahn wia padahko.​—Kilang pwuhken Ministry School, pali 282, par. 4.

¹¹ Koaros me warohng iang sukuhl wet ale kangoang en iang Sukuhl Ong Sapwellimen Koht Doadoahk. (Kilang pwuhken Ministry School, pali 282, par. 6.) Mehn kasukuhl me sukuhl wet kin kihda kin sewese sapwellimen Siohwa aramas kan en kalohki oh padahngki rongamwahu en Wehio ni pwoson kehlail, wahu, oh limpoak. Siohwa uhdahn ketin kupwurperenki kaping kan sang irail koaros me kin paiekihda laud sang sukuhl me kohsang reh!​—Mel. 148:12, 13; Ais. 50:4.