Koasoandi Kapw me Pid Duwen Library Nan Kingdom Hall
Sangete sounpahr samwalahr oko lel met, mwomwohdiso kan wasa koaros nan sampah kin paiekihda arail Kingdom Hall Library, me mahs adaneki Theocratic Ministry School Library. Mahs, se lemeleme e pahn mwahu ma ehuehu mwomwohdiso ahneki pein arail library. Ahpw, pwehki nan ekei wasa kan, mwomwohdiso tohto—iangahki mwomwohdiso kan me kin doadoahngki pil ehu lokaia—kin doadoahngki ehute Kingdom Hall, kahrehda met se nda me e pahn mwahu en ahneki ehute library me pwuhk koaros mie oh pwuhk kan me mie nan lokaia teiko pil mihmi loale. Nan Kingdom Hall laud kan me wasahn mihding riau mie de tohto sang, e pahn mwahu ma ehuehu wasahn mihding en mie pein arail library.
Se lemeleme me koasoandi kapw wet pahn kasohtik oh pil katikitikihala dewen library. Oh pil, kihpene library kan en mwomwohdiso riau de tohto sang pahn wiahda library mwahu kan. Ni ahnsou me library kan kohpene, mwomwohdiso kak nekidala pwuhk kan me mie riau de tohto sang pwe ehu rahn ma Kingdom Hall kapw pahn wiawihda, pwuhk kan kak kohla wasao oh sewese irail en wiahda arail library. Ma mie computer nan Kingdom Hall me Watchtower Library (CD-ROM), ekei kak doadoahngki Library wet me mihmi nan computero.
Emen brother, mehlel Sounapwalih en Theocratic Ministry School, pahn wiahla sounapwalih en library. E pahn tehk me pwuhk kapw kan mihmi nan library, oh kileledi nan pwuhk kapw kan me pwuhk pwukat kisehn Kingdom Hall Library. Pak ehu nan sounpahr ehu, e pahn tehk ma pwuhk koaros mihmi nan library oh tehk ma pwuhk kan mwamwahute. E kesempwal pwuhk koaros en mihmihte nan library nan Kingdom Hall oh sohte me pahn kihsang.
Koaros kak paiekihda oh kalahnganki Kingdom Hall library. Kitail kak kasalehda me kitail kesempwaliki koasoandi wet ni atail pahn kanahieng pwuhk kan nan library oh doadoahngki ni atail kin rapahki “loalokong me pid duwen Koht.”—Lepin Padahk 2:5.