Iaduwen Padahk Mehlel Kin Kasaledek Kitailla
1 Ehu ahnsou, Sises padahkiong mehn Suhs akan me kin kamehlele ih met: “Kumwail pahn dehdehki padahk mehlel, oh padahk mehlelo pahn kasaledengkumwailla.” (Sohn 8:32) Sises mahsanihki duwen saledek me kin siksang saledek me kohsang kaundahn wehi kan, saledek me aramas koaros kak ahneki—me kepwehpwe, me semwehmwe, me sukuhl oh me sohte sukuhl. Sises padahki padahk mehlel me pahn kasaledek aramas akan sang dihp oh mehla. Nin duwen me Sises kawehwehda: “mehmen me kin wiahda dihp, iei ih me lidun dihp.” (Sohn 8:34) Kitail kin kasikasik ahnsowo me aramas peik koaros “pahn maiaudahsang mouren liduwih mehla, oh pahn iang sapwellimen Koht seri kan nan arail saledek lingan”!—Rom 8:21.
2 Padahk mehlel me pid Sises oh sapwellime pwukoa nin duwen kupwuren Koht kin pil kasaledek kitailla. Padahk mehlel wet kin wehwehki me kitail ahneki loalokong me pid duwen meirong tomw me Sises ketikihda pwehki kitail. (Rom 3:24) Pil ahnsou wet, ma kitail kin alehda oh mwekidki padahk mehlel me kitail sukuhliki sang nan Pwuhk Sarawi, kitail kak saledek sang masak, pepehm en sohte koapworopwor, oh pil wiewia suwed tohto.
3 Saledek Sang Masak oh Pepehm en Sohte Koapworopwor: Kitail sohte anahne nsensuwed ahnsou me kitail kin kilang irair en sampah susuwedla pwe kitail wehwehki dahme kahrehda suwed kin wiwiawi oh pil kitail wehwehki me suwed pahn sohrala ni ahnsou keren. (Melkahka 37:10, 11; 2 Tim. 3:1; Kaudiahl 12:12) Oh pil, padahk mehlel kin kasaledek kitailla sang kamehlele padahk likamw akan me pid irair en me mehlahr akan. Kitail wehwehki me irail me mehlahr akan sohte kak lidere kitail, oh irail sohte kin isihs nan lehn kisiniei kohkohlahte, oh kitail pil wehwehki me Koht sohte kin malipe aramas akan ong mehla pwe ren kak mih reh nanleng.—Eklesiasdes 9:5; Wiewia 24:15.
4 Padahk mehlel pil sewese pahpa oh nohno men ni neira seri mehla pwehki aksident. Nohno en serio koasoia: “Sohte me kak wiliandi neit pwutako—ihte se awiawih ih en iasada ehu rahn. Aht medek sohte pahn poatoapoat.”
5 Saledek Sang Wiewia Suwed kan: Padahk mehlel sang Paipel kak kawekila ahn aramas emen ah madamadau oh irair kan, oh met pahn imwikihla saledek sang kahpwal kan. (Episos 4:20-24) Ma kitail pahn mehlel oh pwerisek en doadoahk, met pahn kasaledek kitailla sang mour en semwehmwe. (Lepin Padahk 13:4) Ma kitail pahn kasalehda limpoak oh ngehnin tohnmetei, kitail pahn ahneki nanpwung mwahu kan rehn meteikan. (Kolose 3:13, 14) Ma kitail pahn utungada koasoandi en Kristian me pid duwen tapwi, kitail pahn katikitikihala kahpwal kan nanpwungen atail peneinei. (Episos 5:33–6:1) Liksang kamamsakau, tiahk en nenek, kamwahl, simoak, oh wini en kasahliel kan pahn pil sewese kitail en ahneki roson mwahu.—Lepin Padahk 7:21-23; 23:29, 30; 2 Korint 7:1.
6 Emen mwahnakapw kesehla eh doadoahngki wini kasahliel kan mwurin a kin doadoahngki sounpahr duau. Ehu rahn, e tuhwong emen sounkalohk me wiewia kalohk nanial. E ale dahme sounkalohko kihla, oh sounkalohk koasoanehdi emen en tuhwong ih ni imweo. E tepida onop Paipel. Sounpwong riau mwuri, mwahnakapw menet uhdi douluhl sang doadoahngki wini en kasahliel oh mwurin e onop Paipel erein sounpwong waluh, e papidaisla. Ni ahnsou me rien mwahnakapwo ohl kilang me e solahr douluhl doadoahngki wini en kasahliel kan, ih oh ah pwoud lih tepida onop Paipel.
7 Sewese Meteikan Alehdi Saledek: Ong irail akan me kin mweidong padahk likamw kan en kaunda arail mour, irail pahn apwaliki wehwehki duwen saledek me kin kohsang Mahsen en Koht. Sounpadahk en Rongamwahu men mwein ele pahn anahne kaunopada mwahu oh nantihong pwehn kak lel mohngiong en aramas akan. (2 Tim. 4:2, 5) Met kin wia ahnsou mwahu en wia uwen me kitail kak nan doadoahk en ‘lohkiong me sensel kan ar saledek.’ (Aiseia 61:1) Saledek en Kristian kin inenen kesempwal. Ma kitail pahn alehdi saledek wet, e kak sewese kitail en pil alehdi mour soutuk ni ahnsou kohkohdo.—1 Tim. 4:16.