Mweidohng Siohwa en Ketin Kahluwakitailahng Saledek Mehlel

“Tehk mwahu kosonned unseko me kin kasaledekla aramas.”​—SEIMS 1:25.

KE KAK KAWEHWEHDA?

Kosonned dah me kin kaunopada aramas kan ren ahneki saledek mehlel? Ihs me kin paiekihda kosonnedo?

Dahme kitail anahne wia pwe kitail en uhdahn saledekla?

Soangen saledek dah me koaros me kin pousehlahte peikiong Siohwa pahn ahneki?

1, 2. (a) Dahme kin wiawihong ahn aramas akan saledek? Dahme kahrehda? (b) Soangen saledek dah me sapwellimen Siohwa ladu kan kin kasikasik ren ahneki?

KITAIL mi nan ahnsou ehu me noahrok, lemei oh mwamwahliki kosonned kin wie lalaudla. (2 Tim. 3:1-5) Pwehki met, palien koperment kin wiahda kosonned tohto, kakehlailihala neirail pilismen kan oh doadoahngki kamera kan pwehn kilang dahme aramas kin wiewia. Nan ekei sahpw, aramas akan kin doadoahngki dipwisou ehu me kin wer ma aramas kin song en pedolong nan imwarail kan oh pirap. Re pil kin doadoahngki loahk tohto oh pil kehl lioal kan pwehn pere pein irail. Me tohto uhdahn kin per kahrehda re sohte kak pwediei nipwong de mweidohng neirail seri kan ren mwadong kelehpw liki. E sansal me saledek me aramas ahneki kin wie tikitikla oh irair wet sohte mwomwen pahn mwahula.

² Nan mwetuwel en Ihden, Sehdan nda me aramas kak ahneki saledek mehlel ihte ma re tohrohreweisang Siohwa. Ahpw dahme wiawi sang ahnsowo kohdo kadehdehda me dahme Sehdan ndao likamw pwoat. Uwen laud en aramas ar kin wia dahme re men wia a kaidehn dahme Koht ketin mahsanih ren wia, ih pil uwen laudlahn aramas koaros ar kin wie lokolok. Sapwellimen Siohwa ladu kan pil kin iang lokolok pwehki irair wet. Ahpw kitail ahneki koapworopwor me ehu rahn aramas akan pahn saledeksang dihp oh mwersuwed oh “pahn iang sapwellimen Koht seri kan nan arail saledek lingan” nin duwen me Paipel koasoia. (Rom 8:21) Ahnsou wet Siohwa ketin kaukaunop sapwellime ladu kan ong saledeko. Ia duwen eh ketin wiewia met?

3. Kosonned dahieu me Siohwa ketikihong sapwellime ladu kan? Peidek dah kan me kitail pahn tehkpene?

³ Pwehn kaunopada sapwellime ladu kan ong saledek en ahnsou kohkohdo, Siohwa ketikihong kitail dahme Seims kahdaneki “kosonned unseko me kin kasaledekla aramas.” (Wadek Seims 1:25.) Ehu Paipel kahdaneki met “kosonned unseko en saledek.” (The New American Bible) Ni aramas ar kin medewe kosonned, re kin kalapw medewe me mie me kaun irail oh sohte arail saledek. Eri, dahkot “kosonned unseko me kin kasaledekla aramas”? Ia duwen eh kin wia met?

KOSONNEDO ME KIN KASALEDEKIHALA KITAIL

4. Dahkot “kosonned unseko me kin kasaledekla aramas”? Ihs me kin paiekihda?

⁴ “Kosonned unseko me kin kasaledekla aramas” kaidehn kosonned en Moseso. Siohwa ketikihong mehn Israel ko kosonned en Moses pwehn kasalehiong irail me re dipan oh Krais ketin kapwaiada Kosonnedo. (Mad. 5:17; Kal. 3:19) Eri mehnia kosonned me Seims koasokoasoia? E kin koasokoasoia duwen “kosonned en Krais.” (Kal. 6:2) Eri, “kosonned unseko” kin pidada soahng koaros me Siohwa ketin kupwurki sang kitail. Kristian keidi kan oh pil sihpw teikan kin paiekihda.​—Sohn 10:16.

5. Dahme kahrehda kosonned en saledeko sohte apwal en idawehn?

⁵ “Kosonned unseko” weksang kosonned en sahpw tohto. E wiawihkihda kehkehlik oh kaweid kan me sohte apwal en wehwehki de idawehn. (1 Sohn 5:3) Sises mahsanih: “Mehn wisik me I pahn kihong kumwail me mengei, oh audepe kan me marahra.” (Mad. 11:29, 30) “Kosonned unseko” pil sohte anahne kosonned tohto. E poahsoankihda limpoak oh e ntingdi nan madamadau oh mohngiong en aramas, a kaidehn pohn pelien takai.​—Wadek Ipru 8:6, 10.

IA DUWEN “KOSONNED UNSEKO” EH KIN KASALEDEKIHALA KITAIL?

6, 7. Dahme kitail kak ndahki duwen kupwuren Siohwa kan? Dahme kosonned en saledeko kin mweidohng kitail en wia?

⁶ Mie irepen soahng kan me Siohwa ketikihong aramas pwehn wia kamwahu ong irail oh pere irail. Karasepe, medewehla koasoandi en kapikipik, me duwehte kehl me kin katengehdi soahng koaros nin sampah. Aramas sohte kin kaulimki me koasoandi pwukat kin kaloke irail. Re kin kalahnganki koasoandi pwukat pwehki irail pohnese me koasoandi ko kin wia kamwahuparail. Duwehte met, dahme Siohwa ketin kupwurki, me kitail sukuhlki sang kosonned unsek en Krais, kin wia kamwahupatail.

⁷ Kosonned en saledeko kin pere kitail oh kin mweidohng kitail en kaitarala atail anahn pwung koaros, ahpw e sohte kin kauwehla pein kitail de kasohwawih pwung oh saledek en meteikan. Eri kitail kin saledek en wia dahme kitail men wia ihte ma kitail ahneki ineng pwung. Met wehwehki me kitail anahne inengieng wia dahme Siohwa ketin kupwurperenki oh dahme e ketin kupwurki sang kitail. Kitail anahne sukuhlki en poakohng dahme Siohwa ketin poakohng oh tatki dahme e ketin kalahdeki. Kosonned en saledeko kin sewese kitail en wia met.​—Eimw. 5:15.

8, 9. Ia duwen atail kin paiekihda atail peikiong kosonned en saledeko? Menlau karasahda.

⁸ Pwehki atail soh unsek, e inenen apwal ong kitail en powehdi ineng sapwung kan. Ahpw ni atail kin loalopwoat peikiong kosonned en saledeko, kitail kak ekis ahneki saledek ahnsou wet. Karasepe, ohl emen me adaneki Jay kin apwalki uhdihsang simoak. Ni ahnsou me e tepida onopki Paipel, e sukuhlki me eh tiahk kin kansensuwedihala Koht. E anahne pilada ma eh ineng en simoak pahn kaunda ih de e pahn peikiong Siohwa. E wiahda pilipil pwung en papah Koht mendahki e inenen apwal ong ih en uhdihsang simoak. Ia eh pepehm mwurin eh uhdihsang simoak? E nda me e inenen peren oh e “saledekla.”

⁹ Saledek me sampah kin kihda kin mweidohng aramas akan ren kaitarala arail ineng kan. Ahpw nin duwen Jay eh sukuhlki, imwilahn met iei aramas akan kin wiahla ladu en dihp. Irail kan me kin peikiong sapwellimen Koht kosonned en saledeko kin pilada me sapwellime manaman en kaunda irail, oh imwilahn met irail saledekla oh kak ahneki “mour oh popohl.” (Rom 8:5, 6) Ia wasa Jay kihsang ie kehl en uhdihsang simoak? Kaidehn sang pein ih ahpw e kohsang rehn Koht. E kin kaukaule onopki Paipel, kapakapki sapwellimen Koht manaman oh ale sawas kan sang riatail kan nan mwomwohdiso. Soahng pwukat kak sewese kitail koaros en ahneki saledek mehlel. Kitail pahn kilang ia duwe.

TEHK MWAHU MAHSEN EN KOHT

10. Ia wehwehn atail en tehk mwahu sapwellimen Koht kosonned?

¹⁰ Seims 1:25 koasoia me “me kin tehk mwahu kosonned unseko me kin kasaledekla aramas, . . . oh kin dadaurete” pahn peren ni eh “kin wia” met. Lepin lokaiahn Krihk “tehk mwahu” kin wehwehki en pengidi pwehn kadehde mwahu mehkot. Met kin anahne kitail en nantihong. Eri ma kitail men kosonned en saledeko en kamwakid atail madamadau oh mohngiong, kitail anahne nantihong kaukaule onopki Paipel ni keneinei oh uhdahn doudouloale dahme kitail wadek.​—1 Tim. 4:15.

11, 12. (a) Dahme Sises mahsanih me kasalehda me kitail anahne mourki padahk mehlel? (b) Nin duwen karasaras nan pali 5 eh kasalehda, keper dahieu kitail anahne soikala ahpw mehlel ni atail pwulopwul?

¹¹ Ni ahnsowohte, kitail anahne dadaurete atail doadoahngki mahsen en Koht. Kitail anahne mourki padahk mehlel. Sises pil mahsanih­ong irail kan me kamehlele ih: “Ma kumwail pahn peikiong ei padahk kan, kumwail uhdahn pahn wiahla nei tohnpadahk mehlel. Oh kumwail pahn dehdehki dahme mehlel, oh me mehlelo pahn kasaledengkumwailla.” (Sohn 8:31, 32) Ehu dikseneri en Paipel kawehwehda me en “dehdehki” wasaht kin pidada atail wehwehki uwen kesempwal en dahme kitail ese nan atail mour. Kahrehda kitail kak nda me kitail uhdahn dehdehki de ese padahk mehlel ni atail kin wiahki met elen atail mour. Eri “mahsen en Koht” pahn doadoahk loalatail. E pahn sewese kitail en pousehla wiahda wekidekla kan rehtail pwe kitail en kak alasang mwahu Samatail nanleng.​—1 Des. 2:13.

¹² Idek rehmw, ‘I uhdahn ese padahk mehlel? I kin wiahki elen ei mour? De I kin mwahukihte ekei soangen saledek kan me sampah kin kihda?’ Sister men me tikida nan peneinei en Kristian ehu padahkihong kitail dahme wiawihong ih. Ni ahnsou me e pwulopwul, e kin kamehlele ihs Siohwa ahpw e sohte uhdahn esehla ih. E ntingihedi: “I sohte esehla ien tateki dahme e ketin kalahdeki. I sohte kamehlele me e kin ketin nsenohki dahme I kin wia. Oh I sohte esehla ien kapakap ong ih ni ahnsou me I kin lelohng kahpwal kan. I kin likihete dahme I ese, me met I esehda me uhdahn sapwung pwehki I sohte mwahn ese mehkot.” Eri sister menet esehda me eh madamadau uhdahn sapwung oh e wiahda pilipil kesempwal kei. E pil tepida papah Koht nin duwen pioneer men.

SAPWELLIMEN KOHT MANAMAN KAK SEWESE KASALEDEKIHALA KITAIL

13. Ia duwen sapwellimen Koht manaman eh kin sewese kasaledekihala kitail?

¹³ 2 Korint 3:17 koasoia: “Wasa me [“sapwellimen Koht manaman,” NW] kin ketiket ie, iei wasao me maiau kin mi ie.” Ia duwen sapwellimen Koht manaman eh kin sewese kasaledekihala kitail? E kin sewese kitail en ahneki irair kan me duwehte “limpoak, peren, popohl, kanengamah, kadek, loalopwoat, opampap, oh liksang me suwed.” (Kal. 5:22, 23) Aramas sohte kak ahneki saledek mehlel ma sohte irair pwukat, ahpw mehlel irair en limpoak. Irair en sampah rahnwet kin kasalehda met ni sansal. Mwurin wahnpoaron Pohl eh kilelehdi wahn sapwellimen Koht manaman, e ntingihedi: “Sohte kosonned ehu me kin uhwong mepwukat.” Ia wehwehn met? E kin wehwehki me sohte kosonned ehu me kin irehdi wahn sapwellimen Koht manaman de pil pahn irehdi irair pwukat en kekeirda. (Kal. 5:18) Siohwa ketin kupwurki kitail en kin kalaudehlahte atail kasalehda irair pwukat met oh pil kohkohlahte.

14. Ni ahl dah me elen madamadau en sampah kin wiahiong aramas en wiahla lidu kei?

¹⁴ Irail kan me elen madamadau en sampah kin kaunda pwehki re kak kaitarala arail ineng roporop kan ele kin medewe me re saledek. (Wadek 2 Piter 2:18, 19.) Ahpw re sohte ese me irail uhdahn lidu kei. Koperment kan anahne wiahda kosonned tohto pwehn kolokol ineng oh wiewiahn aramas pwukat pwehn dehr daulihala. Pohl pil koasoia me kosonned kan kin wiawihda “kaidehn ong aramas mwahu kan, ahpw ong irail kan me kin kalap kauwehla kosonned kan oh wia me suwed.” (1 Tim. 1:9, 10) Re pil wia lidu en dihp pwehki re kin wia ‘mehkot me paliwararail de pein arail lamalam pahn kin nsenki.’ Paliwar kin wia kaun lemei men. (Ep. 2:1-3) Duwehte ketitik kan ar kin doulong nan dahlen sukehn loangalap pwehn kaitarala arail men mwenge oh tengala nan dahlo, ih duwen aramas pwukat ar kin idawehn arail ineng sapwung oh wiahla lidu en dihp.​—Seims 1:14, 15.

SALEDEKLA NAN MWOMWOHDISOHN KRISTIAN

15, 16. Kapai dah kitail ahneki sangete atail wiahla kisehn mwomwohdiso en Kristian? Soangen saledek dah kitail ahneki nan mwomwohdiso?

¹⁵ Ni ahnsou me ke wiahla tohnmwomwohdiso en Kristain, ke sohte kin audehda doaropwe ehu me ke men iangala. Ke kohdo nan mwomwohdiso pwehki Siohwa ketin kupwurki ken mi me. (Sohn 6:44) Dahme kahrehda e ketin piluhkada? Ia duwe, e ketin mahsanih me kowe aramas pwung men me kin lemmwiki ih? Mwein ke pahn nda “Soh douluhl!” A dahme Koht ketin ­mwahngih? E mwahngih me ke pahn men peikiong sapwellime kosonned oh pwungki sapwellime kaweid kan. Sangete ahnsou me ke iangala kisehn mwomwohdiso, Siohwa kin ketin apwalih iuk ni eh kin ketin padapadahki iuk sang sapwellime Mahsen. E ketin kasaledekiukasang likamw kan oh kihlenwo kan en pelien lamalam likamw oh ketin padahkihong uhk ia duwen omw pahn alasang irair kan en Krais. (Wadek Episos 4:22-24.) Imwilahn met, ke ahneki pwais kaselel en iang wia kisehn aramas kante nin sampah me ahneki saledek mehlel.​—Seims 2:12.

¹⁶ Medewehla met: Ni omw kin iang irail kan me kin poakohng Siohwa sang arail mohngiong unsek, ke kin perki mehkot? Ni omw kin koasoakoasoiong riomw Kristian kan nan Wasahn Kaudok, ke kin pwunodki emen de pirapahla omw kopwou ape? Soh! Ke sohte kin per oh ke kin saledek. Ke kak ahneki soangen pepehmohte rehn ekei pwihn en aramas de wasa teikan? Soh! Saledek me ke ahneki nanpwungen sapwellimen Siohwa aramas akan ahnsou wet wia ekiste kisehn saledek me ke pahn ahneki ni ahnsou kohkohdo.

“IANG SAPWELLIMEN KOHT SERI KAN NAN ARAIL SALEDEK LINGAN”

17. Ia duwen en “Koht pahn ketin kasalehda irail kan me sapwellime” eh pahn sewese kasaledekla aramas?

¹⁷ Pohl ntingihedi duwen saledek me Siohwa pahn ketikihong sapwellime kan nin sampah. E nda: “Audepen lahng oh sampah koaros kin kasikasik ahnsou me Koht pahn ketin kasalehda irail kan me sapwellime.” E pil kapatahiong: “Audepen lahng oh sampah uhdahn pahn maiaudahsang mouren liduwih mehla, oh pahn iang sapwellimen Koht seri kan nan arail saledek lingan.” (Rom 8:19-21) “Audepen lahng oh sampah” kin wehwehki aramas akan me ahneki koapworopwor en mour kohkohlahte nin sampah oh me pahn paiekihda en “Koht pahn ketin kasalehda irail kan me sapwellime,” me iei me keidi kan. Kasansaldao pahn tepida ni ahnsou me me keidi kan pahn sewese Krais nanleng kasohrehla aramas suwed koaros oh kahluwahlong pokon kalaimwuno nan koasoandi kapw en sampah.​—Kaud. 7:9, 14.

18. Ia duwen saledek eh pahn laudla ong aramas peik kan? Soangen saledek dah me aramas pahn ahneki?

¹⁸ Aramas akan pahn ahneki saledek tohrohr ehu. Re pahn saledeksang wiewiahn Sehdan oh ngehn saut kan. (Kaud. 20:1-3) Ia uwen met e wia saledek ehu! Sang ahnsowo kohla, 144,000 ko me wia nanmwarki oh samworo kei pahn doadoahngki meirong en Sises pwehn kapaiada aramas akan lao irail uhdahn saledeksang mehlel dihp oh soh unsek. (Kaud. 5:9, 10) Mwurin kaimwiseklahn kasongosong en arail pwoson, aramas peik kan pahn ahneki saledek unsek me Siohwa ketin kupwurki ong irail nin tapio, me iei “saledek lingan” en sapwellimen Koht seri kan. Nna medewehla! E solahr pahn apwal ken wia dahme Siohwa mahsanih me pwung. Paliweromw, omw mohngiong oh madamadau pahn unsekla oh ke pahn kak alasang sapwellimen Koht irair kan ni unsek.

19. Dahme kitail anahne pousehlahte wia ma kitail men “iang sapwellimen Koht seri kan nan arail saledek lingan”?

¹⁹ Ke men “iang sapwellimen Koht seri kan nan arail saledek lingan”? Ma ke men, mweidohng omw madamadau oh mohngiong en pousehlahte mwekidki “kosonned unseko me kin kasaledekla aramas.” Kaukaule onopki Paipel ni keneinei. Ken mourki padahk mehlel. Kapakapki sapwellimen Koht manaman. Isaneki laud mwomwohdisohn Kristian oh padahk mehlel kan me Siohwa kin ketikihong kitail. Ke dehr mweidohng Sehdan en pitihiukedi duwehte eh pitihdi Ihp oh kahrehiong uhk ken medewe me dahme Koht ketin kupwurki nohn kakos. Mendahki Tepil uhdahn loalokong, kitail sohte anahne mweidohng en poweikitaildi “pwe kitail eseier duwen eh koasoandi kan.” Met iei me kitail pahn koasoiapene nan iren onop en mwuhr.​—2 Kor. 2:11.

[Kilel nan pali 14]

I kin mwahukihte ekei soangen “saledek kan” me sampah kin kihda?

[Kilel nan pali 14]

I kin wiahki padahk mehlel elen ei mour?